Fimm manna teymi frá Bretlandi, þar á meðal Dr. Mike Yeadon, hefur lagt fram beiðni um rannsókn hjá Alþjóðasakamáladómstólnum í Haag vegna glæpa gegn mannkyni.
Beiðnin, sem er tugir blaðsíðna, var lögð fram fyrir saksóknara Alþjóðasakamáladómstólsins (ICC) þann 6. desember 2021 af teymi frá Bretlandi og fyrir hönd fólksins, eins og það er orðað.
Beiðnin fjallar á rökstuddan hátt um brot, sem teymið heldur fram að framin hafa verið af embættismönnum í Bretlandi og alþjóðlegum leiðtogum heimsins, á Nürnberg-reglunum, glæpi gegn mannkyni, stríðsglæpi og árásarglæpi sem framdir eru gegn þegnum Bretlands.
Hópurinn sem berst fyrir réttlæti fyrir hönd alls almennings tekur fram:
„Alvarleiki og umfang glæpanna sem framdir eru í Bretlandi, mikill fjöldi fólks sem þessir glæpir hafa áhrif á, að þessir glæpir haldi áfram að vera framdir, fjölbreyttur hópur gerenda sé að verki, mynstur glæpastarfseminnar sé sífellt endurtekið og ekki séu miklar líkur á að gerendur verði sóttir til saka heima fyrir vegi allt mjög þungt við það mat að rannsóknar sé þörf fyrir dómstólnum".
Hér er hægt að lesa beiðnina og hér er móttökubréf frá dómstólnum.
Hannah Rose lögfræðingur, kemur fram fyrir hönd teymisins ásamt fleirum þeirra á meðal:
Dr. Mike Yeadon, sem er fyrrverandi aðstoðarframkvæmdastjóri og yfirvísindamaður hjá Pfizer, Piers Corbyn stjarneðlisfræðingur og lögreglumaður á eftirlaunum, Mark Sexton, John O´Loony útfararstjóri, Johnny McStay og Louise Shotbolt hjúkrunarfræðingur og mannréttindafrömuður.
Aðkoma Alþjóðasakamáladómstólsins (ICC)
Teymið tekur fram að það hafi reynt að fara með málið í gegnum breska réttarkerfið án árangurs. Þessi staðreynd sé ástæðan fyrir því að málinu hefur verið beint til Alþjóðasakamáladómstólsins.
Alþjóðasakamáladómstóllinn sé fær um að sækja til saka ef ríki geri það ekki, ekki til að koma í stað innlendra refsivörslukerfa, heldur þeim til viðbótar.
Skjölin hafa verið lögð fram hjá dómstólnum þar sem ítarlega eru tiltekin atriði er varða brot gegn Nürnberg-reglunum, glæpum gegn mannkyni, stríðsglæpi og árásarglæpum í Bretlandi.
Teymið tekur fram í beiðninni „að byggt sé á umfangsmiklum málsástæðum ásamt skjölum þeim til stuðnings og beiðnin taki til þeirra sem beri ábyrgð á fjölmörgum brotum á Nürnberg-reglunum, glæpum gegn mannkyni, stríðsglæpum og árásum í Bretlandi, en kæran sé þó ekki takmörkuð við einstaklinga í þessum löndum".
Þá tók hópurinn fram við dómstólinn: „Það er ætlun okkar að kynna fyrir ykkur vel og í smáatriðum hvernig ríkisstjórn Bretlands hefur á þessu ári, ásamt ráðherrum og háttsettum embættismönnum, brotið gegn Nürnberg-reglunum, ekki aðeins í einu atriði heldur í mörgum atriðum".
Hér á eftir koma nokkur þeirra atriða sem beiðnin er byggð á:
Tölfræðin í kringum Covid sé vísvitandi röng til að réttlæta takmarkanir á frelsi fólks
Tölur um smit og veikindi eru uppblásnar og rangar og til þess er notað ónákvæmt og marklaus PCR próf. Þá séu dánartölur ómarktækar þar sem stundað sé að skrá dauðsföll sem Covid dauðsföll þegar þau eru það ekki. Tekur teymið sem dæmi að andlát sé flokkað sem Covid andlát ef það ber að innan 28 daga frá jákvæðu PCR prófi en prófin eru ónákvæm og ekki örugg mæling. Skiptir þá engu máli hvort viðkomandi hafi látist af öðrum orsökum en Covid.
Það er án alls vafa að án þessarar tilbúnu og uppblásnu Covid tölfræði hefði ekki verið nein ástæða til að beita þeim ráðstöfunum sem gripið hefur verið til og flokkað er í beiðninni sem glæpur gegn mannkyni.
Flensa, lungnabólga og öndunarfærasýkingar voru endurnefnt
Að auki hefur önnur leið verið notuð til að blása upp Covid-19 tölfræðina þ.e. með því að endurnefna algenga inflúensu, lungnabólgu og aðrar öndunarfærasýkingar sem Covid-19. Hópurinn vísar til gagna frá Office for National Statistics (ONS) í Bretlandi sem sýna að dauðsföll árið 2018 af völdum inflúensu og lungnabólgu voru 29.516 og árið 2019 voru þau 26.398. Hins vegar voru dauðsföll árið 2020 vegna inflúensu skráð aðeins 394 og vegna lungnabólgu 13.619.
Beiðni um að fram fari heildarrannsókn
Bendir teymið á að það þurfi að fara fram heildarrannsókn á tölfræðinni sem tengist faraldrinum og því sem hún hefur verið byggð á af stjórnvöldum.
Þá þurfi að fara fram rannsókn á bóluefnunum sem séu enn á rannsóknarstigi allt fram til ársins 2023. Líka sé verið að nota nýja tækni, svokallaða mRNA tækni, sem aldrei hefur verið notað á fólki áður og engin vitneskja sé um langtímaáhrif á fólk.
Bóluefnin innihalda Graphene Hydroxide
Það réttlæti einnig kröfuna um heildarrannsókn að bóluefnin innhalda efnið Graphene Hydroxide. Bendir teymið á að Dr. Andreas Noack var myrtur, eftir að hann gerði myndband sem sýndi tilvist þess í bóluefninu. Dr. Andreas útskýrði þar hvað Graphene Hydroxide væri og hvernig það virkaði sem „rakhnífur" inni í æðum „bóluefnaþega". Vegna smæðar efnisins sést það ekki við hefðbundna krufningu. Að sögn teymisins geta „eiturefnafræðingar ekki fyrir fram gert sér það í hugarlund að til sé efni sem geti skorið upp æðar og valdið því að fólk blæði til dauða að innan svo þeim kemur ekki til hugar að leita að þessu efni."
Önnur atriði og hliðstæður við Þýskaland á fjórða áratugnum
Teymið fjallar einnig um árangursleysi gríma og bendir á að Alþjóðaheilbrigðismálastofnunin (WHO) hafi viðurkennt að engar vísbendingar séu til um gagnsemi gríma.
Hópurinn leggur einnig áherslu á að aðrar meðferðir við Covid hafa verið hunsaðar.
Þá sé stunduð ritskoðun gagnvart almenningi og að bresk stjórnvöld og ríkisstjórnir um allan heim noti „faraldurinn" til að berjast gegn tjáningarfrelsi og aðgangi að upplýsingum.
Einnig er bent á að það megi sjá ógnvekjandi hliðstæður við Þýskaland upp úr 1930 eins og eftir lifendur Helfararinnar hafa lýst því. Það séu einnig nokkrir eftir lifendur þýsku helfararinnar sem draga sterkar hliðstæður á milli Covid-takmarkana nú og upphafs helfararinnar. Þetta ásamt öðrum atriðum sem koma fram í beiðninni gefa að mati teymisins „réttmæta ástæðu til að ætla að framin hafi verið brot á Nürnberg-reglunum, þjóðarmorð, glæpir gegn mannkyni og stríðsglæpir".
Beiðninni lýkur svona:
„VIÐ VILJUM ENDURTAKA: Það er afar brýnt að dómstóllinn grípi tafarlaust til aðgerða, að teknu tilliti til þessa alls, til að stöðva útbreiðslu Covid-bólusetninga, innleiðingu ólöglegra bólusetningarvegabréfa og allar aðrar tegundir ólöglegra ráðstafana sem tilteknar hafa verið hér í dag, sem á þessar stundu er beint gegn almenningi í Bretlandi, með TAFARLAUSRI málsmeðferð dómstólsins".