Eftir Jón Steinar Gunnlaugsson lögmann. Greinin birtist fyrst í Morgunblaðinu 22.01.2022.
Frelsi í stað valdbeitinga
„Hér er allt of miklu fórnað fyrir lítið. Persónulegt frelsi með ábyrgð telst til þeirra lífshátta sem við viljum viðhafa. Látum ekki einsýna lækna villa okkur sýn.“
Nú hefur legið fyrir um hríð að smit af kórónuveirunni verða nær eingöngu af því afbrigði sem nefnt hefur verið Ómíkron. Þar með liggur fyrir að vel yfir 99% af þeim sem smitast verða lítt eða ekki veik. Samt er haldið áfram að skerða frelsi manna í stórum stíl. Atvinnufyrirtækjum er lokað og einstaklingum er bannað að fara út úr húsi. Þetta er allt saman fullfrískt fólk sem stjórnvöld segjast beita þessu valdi til að forðast útbreiðslu smits. Beitt er hræðsluáróðri til að halda þessum stjórntökum uppi. Talað er um að „hópsmit“ sé yfirvofandi, án þess að gera grein fyrir hættunni sem af því á að stafa. Það er eins og sumir læknar telji sjálfsagt að beita menn þessu valdi. Þeir viti betur en sauðsvartur almúginn hvað honum er fyrir bestu. Samt eru það gömul og ný sannindi að bestu varðmenn hagsmuna einstaklinga eru þeir sjálfir.
Eins og bent hefur verið á, er ekki nein þörf á að beita þessum brögðum til að hindra útbreiðslu smitsins. Einfaldlega vegna þess að lítil sem engin áhætta fylgir því að smitast. Kannski er bara best að sem flestir smitist af veirunni sem nú orðið má telja saklausa. Þannig hlýtur svonefnt hjarðónæmi að nást fyrr en ella.
Múgsefjunin sem stjórnar þessu er ekki bara ráðandi hér á landi. Við sjáum að á Evrópumótinu í handbolta er leikmönnum, sem hafa smitast, skipað að halda sig inni á hóteli og bannað að taka þátt í kappleikjunum, þó að þeir séu fullfrískir. Má segja að mótið hafi verið eyðilagt með þessum furðulegu háttum. Höfum við Íslendingar ekki farið varhluta af þessu.
Hér er allt of miklu fórnað fyrir lítið. Persónulegt frelsi með ábyrgð telst til þeirra lífshátta sem við viljum viðhafa. Látum ekki einsýna lækna villa okkur sýn. Kannski eru þeir bara að búa til stöðu sem þeir telja að þrýsti á um hærri framlög úr ríkissjóði (les: frá skattgreiðendum) til Landspítalans? Hlustum frekar á þá virðingarverðu starfsbræður þeirra sem vilja ekki taka þátt í þessu ofríki og mæla með afléttingu valdbeitingarinnar.
One Comment on “Frelsi í stað valdbeitinga – ,,látum ekki einsýna lækna villa okkur sýn“”
Sjúkir embættismenn láta ekki af hendi það vald sem þeim hefur verið gefið. Það þarf að taka það frá þeim.
Sóttvarnarlæknir hefur sýnt öll einkenni þess að kunna ekki að fara með vald og hvað þá að draga sig sjálfviljugur í hlé þegar allt annað fólk sem enn hefur til að bera heilbrigða skynsemi sér að sérstakra aðgerða sé ekki þörf.
Áslaug Arna er eini ráðherra ríkistjórnarinnar sem virðist hafa dug og þor til að fara gegn geðrofi samfélagsins og segja upphátt að nú sé nóg komið.
Hvenær ætla aðrir í ríkisstjórn að þora stíga upp með Áslaugu og og binda enda á þessa martröð, eða trúa þau ennþá á Grýlu sem allir sem það vilja vita er skáldskapur notaður til að hræða börn til hlýðni?