Evrópuþingmaðurinn Clare Daly ásakar ESB um að kynda undir stríðinu í Úkraínu

frettinIngibjörg Gísladóttir, PistlarLeave a Comment

Elítan á Evrópuþinginu er veruleikafirrt. Hinn 7. apríl var samþykkt með yfirgnæfandi fjölda atkvæða að banna innflutning á olíu, kolum, kjarnorkueldsneyti og gasi frá Rússlandi nema landið drægi her sinn til baka frá Úkraínu og virti alþjóðlega samþykkt landamæri. Menn þar vilja sem sagt matvælaskort og orkukreppu í Evrópu (því þótt menn gætu fengið eldsneyti annars staðar frá þá yrði það mun dýrara) og áframhaldandi stríð í Donbass og stríð á Krímskaga trúlega líka.

Evrópuþingmaður einn, hin írska Clare Daly, vakti athygli á því daginn fyrir samþykktina að viðskiptaþvinganir hefðu aldrei fengið nokkra þjóðarleiðtoga til að skipta um stefnu, þær myndu aðeins orsaka skerðingar á kjörum almennings. Hún ásakaði ESB um þjónkun við hagsmuni bandarískra hergagnaframleiðenda og NATO; ESB ætti að vinna að því að koma á friði en ekki kynda undir ófriðnum með vopnasendingum, slíkt geri ESB samsekt.

Utanríkisráðherrar vorir hafa viljað að íbúar Krímskaga þjáist undir stjórn Úkraínumanna

Hatur hins vestræna heims á Rússum (sem hefur kraumað lengi) þjappar þeim saman eins og gerðist hjá okkur í Hruninu. Við samþykktum ekki að vogunarsjóðir fengju að rýja okkur inn að skinni. Stemmingin var: Nei, kemur ekki til greina - frekar þjóðargjaldþrot og útskúfun. Íslensk stjórnvöld elta samt ESB gagnrýni- og skoðanalaust að því er virðist. Er Rússar lýstu því yfir að Krímskagi tilheyrði sér, enda að mestu byggður Rússum og eingöngu flokkaður með Úkraínu sakir Krúsjoff, þá fylgdum við ESB í að krefjast þess að hann yrði afhentur Úkraínu. Utanríkisráðherrum okkar fannst ekkert að því að íbúar Krímskaga þyrftu að þola hið sama og íbúar Donbass, stríð og fjöldaflótta frá svæðinu og ef eitthvað hefur heyrst frá þeim um að rétt væri að halda sig við Minsk samkomulagið þá hefur það ekki farið hátt.

Hækkandi matvælaverð í heiminum

RÚV var nýlega með frétt um að vísitala matvælaverðs í heiminum hefði hækkað um 12.6% eftir innrás Rússa í Úkraínu 24. febrúar því Rússar og Úkraínumenn eru meðal þeirra þjóða sem framleiða mest af hveiti, byggi, maís og sólblómaolíu. Verð á sykri og mjólkurafurðum hafi einnig hækkað umtalsvert, sagði í fréttinni. Rússar framleiða nefnilega áburð. Í grein í Deutsche Welle má lesa að mörg lönd í Evrópu og Mið-Asíu fái meira en 50% áburðar síns þaðan. Þar segir að Rússar framleiði 15% köfnunarefnisáburðar og 17% þess kalís sem fer á heimsmarkað. Að auki komi 20% af jarðgasi þaðan og það sé sé notað til að framleiða tilbúinn áburð. Þjóðverjar fái 30% af orkugjöfum í landbúnaði frá Rússum og ekki sé mögulegt að fá þá annars staðar frá í náinni framtíð, segja þeir.

Fari menn ekki að vinna að því að koma á friði í Úkraínu með því að virða tilverurétt íbúa Donbass og Krímskaga þá er augljóslega matvæla- og orkuskortur framundan í Evrópu. Margir fátæklingar munu þurfa að velja á milli þess að borða eða hita hýbýli sín og sumir er búa í illa einangruðum húsakynnum munu deyja úr kulda. Allt af því að elítan í Brussel og BNA vill hefna sín á Rússum og vopnaframleiðendur vilja græða. Það átti að rústa rúblunni en eftir að Pútín tilkynnti að greiða yrði fyrir Rússagasið í rúblum þá styrktist hún bara. Fyrirsjáanlegt er að refsingar ESB lenda helst á alþýðu ESB landanna sjálfra rétt eins og refsiaðgerðir okkar gegn Rússum hafa nær eingöngu bitnað á okkur.

Skildu eftir skilaboð