Nokkrir vel þekktir demókratar hafa tekið höndum saman til að hvetja auglýsendur til að sniðganga Twitter ef Elon Musk stendur við loforð sitt um „óheft málfrelsi“ á samfélagsmiðlinum sem hann keypti nýlega fyrir 44 milljarða bandaríkjadala.
Tuttugu og sex frjáls félaga-og hagsmunasamtök skrifuðu undir bréf þar sem þau lýsa áhyggjum sínum yfir áætlun ríkasta manns heims, að leyfa óheft málfrelsi á Twitter.
Musk svaraði sjálfur bréfinu og spurði hver fjármagnaði samtökin. Svarið var: blanda af „myrkrum peningahópum,“ [innsk. peninga sem ekki er hægt að rekja] til dæmis stofnun George Soros, Open Society Foundation, félagasamtök stofnuð af fyrrverandi starfsmönnum ríkisstjórnar Clinton og Obama, auðugir demókratar og fjölskyldustofnanir þeirra, verkalýðsfélög og ríkisstjórnir Evrópuþjóða.
„Yfirtaka Elon Musk á Twitter mun eitra enn frekar upplýsingahringrás okkar og vera bein ógn við almannaöryggi, sérstaklega meðal viðkvæmra og jaðarsettra hópa,“ skrifuðu hóparnir.
Hóparnir vöruðu fyrirtæki við því að með því að auglýsa á Twitter væru þau að tengja nafn sitt við „miðil sem ýtir undir hatur, öfgar, rangar heilbrigðisupplýsingar og samsæriskenningar.“
Höfundar bréfsins skrifuðu: „Undir stjórn Musk er hætta á að Twitter verði að holræsi rangra upplýsinga, með vörumerki ykkar á, sem eitrar upplýsingahringrás okkar á tímum þar sem traust á stofnunum og fréttamiðlum er þegar í sögulegu lágmarki.
„Auglýsingapeningar ykkar geta annað hvort fjármagnað hégómlegt verkefni Musks eða gert honum grein fyrir ábyrgð sinni. Við skorum á ykkur að krefjast þess að Musk standi undir þessum grundvallarstöðlum um traust og öryggi samfélagsins og að þið hættið að eyða auglýsingapeningum ykkar á Twitter ef svo verður ekki.“
Musk skrifaði á Titter: „Hver fjármagnar þessar stofnanir sem vilja stjórna aðgangi ykkar að upplýsingum? Við skulum rannsaka…“
Hann bætti við: „Sólarljós er besta sótthreinsiefnið.“
Bréfið sem undirritað var af hópunum 26 var skrifað á bréfsefni með lógóum Accountable Tech, Media Matters for America og Ultraviolet.