Fegurðardísin Gleycy Correia, sem kjörin var Ungfrú Brasilía árið 2018, er látin 27 ára gömul af völdum mikilla blæðinga og hjartaáfalls, nokkrum dögum eftir hefðbundna hálskirtlaaðgerð. Hún lá í dái í tvo mánuði eftir hjartastoppið í apríl.

Correia var frá borginni Macae í suðausturhluta Brasilíu og  lést á einkareknu sjúkrahúsi á mánudag og var lík hennar sent til Macae til krufningar.

Presturinn fjölskyldunnar, Lidiane Alves Oliviera, sagði: „Hún fór í aðgerð til að láta fjarlægja hálskirtla og eftir fimm daga heima hjá sér fékk hún blæðingu og hjartaáfall.“

Séra Jak Abreu, sem þekkir fjölskyldu Correia, skrifaði á samfélagsmiðla að ættingjar hennar teldu að um læknisfræðileg mistök hafi verið að ræða við aðgerðina.

Hann bætti við: „Guð valdi þennan dag til að sækja prinsessuna okkar. Við vitum að hennar verður sárt saknað, en hún mun nú lýsa upp himininn með brosi sínu...“

Daily Mail sagði frá.