Fréttin hefur verið uppfærð.

„Það kom okkur verulega á óvart að þessar kröfur væru settar á okkur núna þegar við fengum tilkynningar frá Alþjóða Handknattleikssambandinu (IHF), m.a. um skyldubólsetningu leikmanna á heimsmeistaramótinu í Svíþjóð og Póllandi í janúar næstkomandi,“ sagði Róbert Geir Gíslason, framkvæmdastjóri HSÍ.

Fréttin hafði samband við Róbert og leitaði frekari upplýsinga um áskilnað og kröfur á leikmönnum og þjálfurum og hvort þeir ætluðu að sætta sig við þessar reglur.  Ísland er eins og kunnugt er meðal þátttökuþjóða í þessari lokakeppni og er raunar spáð góðum árangri í mótinu.

Róbert sagði að enn væri að berast ítarefni frá IHF um þessi mál og önnur um mótshaldið, en að bæklingarnir breyttust frá einum tíma til annars og nú væri von á þriðja bæklingnum.

„Við áttum ekki von á þessu, enda hefur faraldrinum verið aflýst og öllum takmörkunum aflétt,“ sagði Róbert. Hann sagði HSÍ vera að greina stöðu leikmanna sem flest allir væru búnir að fá Covid og flest allir einhverjar bólusetningar, og eins væru þeir að bíða eftir frekara ítarefni frá IHF. „Það gæti verið að þetta hefði áhrif á 10 leikmenn eða 20 leikmenn..., það á eftir að koma í ljós,“ sagði Róbert.

Hvað varðar áhættu Covid efnanna á heilsuna, sagði Róbert að þeir hefðu nýverið heyrt frá mjög þekktum breskum hjartalækni sem var á ráðstefnu í Noregi fyrir stuttu og sá varaði eindregið við því að leikmenn færu í bólusetningar, það gæti haft veruleg áhrif á þeirra feril. (innsk. blm., líklega er um að ræða hjartalækninn Aseem Malhotra sem var á ráðstefnu í Osló nú í nóvember, sjá neðar).

Róbert greindi í þessu sambandi einnig frá eigin reynslu. Hann sagðist fyrst hafa fengið Janssen og „korteri síðar“ var Janssen ekki lengur leyft vegna hjartavandamála, því næst fékk hann Moderna og „korteri síðar“ var Moderna ekki lengur leyft vegna hjartavandamála, og svo loks fékk hann Pfizer sem einnig hefur verið tengt við hjartavandamál.“

IHF svarar ekki spurningum 

Fréttin hefur árangurslaust reynt að fá svör frá IHF, m.a. með milligöngu starfsmanna mótsins í Svíþjóð, við þessum kröfum sambandsins.

Meðal þess sem Fréttin spurði sambandið var hver tilgangurinn með frekari sprautum væri, sérstaklega í ljósi þess að þær koma ekki í veg fyrir dreifingu smita, hvort sambandið óttaðist lögsóknir vegna þessara skilyrða, á hvaða lögum þessar kröfur sambandsins um sprautuskyldu byggðust, hvort sömu kröfur væru gerðar til milljóna áhorfenda á mótinu, hvort sambandið væri meðvitað um áhættuna af sprautunum, svo sem hjartavöðvabólgu, blóðtappa, o.fl.

Fréttin mun halda áfram að reyna fá svör frá Alþjóða Handknattleikssambandinu varðandi þessar undarlegu kröfur gagnvart ungum og fullfrískum íþróttamönnum.

Uppfært kl. 19.35.

Svar barst frá IHF þar sem segir að sambandið sé að funda í þessari viku og að í næstu viku verði Covid-19 reglurnar fyrir mótið birtar á síðu heimsmeistaramótsins. Ef spurningar vakna eftir það,  má senda frekari fyrirspurnir á Kirstin Burr hjá IHF.

Annað svar barst einnig þar sem segir að það muni taka aðeins lengri tíma að svara spurningunum, þar sem einhverjar þeirra væru þess eðlis að leita þurfi álits sérfræðinga.

Hér má heyra í breska hjartalækninum Aseem Malhotra sem var á ráðstefnu í Osló fyrr í mánuðinum.