Eftir Guðrúnu Bergmann

Jörðin er að fara inn í Photon-beltið (Ljóseindabeltið), í gegnum það sem breski jarðfræðingurinn og jarðlíffræðingurinn Rory Duff kallar The Galactic Sheet, þar sem hún mun verða næstu 2000 árin. Við erum rétt að koma inn í beltið og þess vegna er mikil ólga í orkunni.

Hið gamla er að hrynja í burtu og því fylgir mikil óreiða en orkan er að lyfta okkur upp. Við erum gerð úr líffræðilegum ljóseindum (bio-photons) og þær ljóseindir flytja upplýsingar á milli allra frumna í líkama okkar. Ljóseindirnar eru tengslanetið í líkamskerfi okkar, en sú orka sem við erum að taka á móti núna eru ljóseindir sem geta verið í mun fleiri víddum á sama tíma.

LJÓSIÐ er því mun þéttara og þykkara og við erum að umbreytast úr þéttum efnislíkama yfir í LJÓSLÍKAMA. Jafnframt erum við að umbreytast í fjölvíddaverur, vegna þess að ljóseindirnar geta farið um fleiri víddir samtímis, því þær snúast svo hratt. Á sviði ótakmarkaðra möguleika er þetta sérlega spennandi og tengist heimsfræðinni. Meira um þetta má finna með því að skoða vefsíðuna hjá Rory Duff.

Sjá einnig bók mína: LEIÐ HJARTANS, þar sem ég fjalla nánar um þessar breytingar.

ÁHRIFARÍKAR AFSTÖÐUR ÁRIN 2020-2021

Samkvæmt stjörnuspekinni er aukinn skriðþungi framundan. Allt þetta ár sem er að kveðja hafa margar plánetur verið á ferð aftur á bak um sporbaug sinn. Flestar þessar plánetur eru nú komnar í stefnu fram á við en þegar kemur að 22. janúar koma allar pláneturnar til með að vera á stefnu fram á við alveg fram í júní 2023.

Alveg frá upphafi árs 2020 hefur verið erfið samstaða á milli Plútó og Satúrnusar. Sú samstaða hefur verið táknræn fyrir samdrátt og stjórnun frá valdhöfum að ofan. Sögulega séð hefur þessi afstaða alltaf verið tengd misnotkun á valdi. Stjörnuspekingar vissu ekki hvernig þessi samstaða myndi birtast í samfélögunum, þótt það sé nú öllum ljóst, enda varði þessi samstaða út árið 2021.

SPENNA MILLI SATÚRNUSAR OG ÚRANUSAR

Allt árið 2021 og 2022 hefur svo verið níutíu gráðu spennuafstaða á milli Satúrnusar og Úranusar. Satúrnus er táknrænn fyrir gamla heiminn, Úranus fyrir þann nýja. Satúrnus tengist því hvernig við höfum alltaf gert hlutina, Úranus vill brjóta það mynstur upp. Satúrnus tengist stjórnvöldum og stjórn valdhafa að ofan og niður, reglum og reglugerðum og miðstýringu.

Úranus vill dreift vald, fylgir ekki reglum og reglugerðum, heldur vill hann brjótast undan oki þeirra til að einstaklingurinn geti sjálfur valið hvað hann vill gera – auk þess sem Úranus tengist mjög framtíðinni og frelsi.

Spennuafstaðan milli þessara pláneta hefur verið ráðandi árin 2021 og 2022 og við höfum séð áhrif hennar mjög skýrt, í gegnum uppreisnir og mótmæli um allan heim, en einungis hefur verið fjallað um fáeinar þeirra í meginstraumsfjölmiðlunum. Við höfum hins vegar vitað af þeim til dæmis í Íran, Brasilíu, Hollandi, svo og víðar!

Hið áhugaverða er að þessi ráðandi spennuafstaða milli Satúrnusar og Úranusar er að leysast upp, því pláneturnar eru að fjarlægjast hvor aðra. Úranus er að taka yfirhöndina í „samskiptum“ þeirra og frelsið og framtíðin haldast í hendur.

NÝJA OFURTUNGLIÐ

Nýja ofurtunglinu kveiknar á fyrstu gráðu og þrjátíu og tveimur mínútum í Steingeit þann 23. desember kl. 10:16 fyrir hádegi hér á landi. Tunglið kveiknar einungis tveimur dögum eftir Vetrarsólstöður sem gerir þetta ofurtungl enn öflugra, en ofurtunglin eru nær Jörðu en önnur Tungl og það eykur kraftinn frá þeim. Þetta er líka annað nýja Tunglið í röð af fimm Tunglum, sem verð á fyrstu gráðu í merkjum  sínu, en sú gráða er táknræn fyrir nýtt upphaf.

Fleiri plánetur og afstöður gefa til kynna hið „nýja“ á þessum tímapunkti. Þetta er því frábær tímasetning til að setja frá ásetning sinn, um það sem þið viljið að verði að veruleika í lífi ykkar.

Um er að ræða TVÖFALT upphaf, því bæði Vetrarsólstöðurnar og nýja Tunglið marka nýtt upphaf og orkan sem er mjög mögnuð, virkar eins og vindur í seglin. Ásetningurinn þarf bara að vera ein setning – svo ekki gera málið flókið. Finnið bara út hvaða setning það er og vinnið með hana – eða fleiri ef það er málið.

FIMM PLÁNETUR Í STEINGEIT

Á þessu nýja Ofurtungli eru fimm plánetur í Steingeit. Þær eru Tunglið og Sólin sem alltaf eru í samstöðu á nýju Tungli – og svo Venus, Merkúr og Plútó. Þetta er mikil samþjöppun, því þarna er helmingurinn af plánetunum samankominn. Steingeitin tengist því að raungera hugmyndir og byggja upp fyrir langtímaframtíð. Það er því þýðingarmikið að skipuleggja og úthugsa vel hvað það er sem við viljum byggja upp fyrir framtíðina.

Áhugavert er að sjá að Merkúr skuli vera á tuttugu og einni gráðu og þrjátíu mínútum í Steingeit – en sú afstaða er í rúmlega einnar gráðu fjarlægð frá þeim stað sem Satúrnusar/Plútó samstaðan varð í janúar árið 2020 – en hún varð á tuttugu og tveimur gráðum og fjörutíu og fimm mínútum í Steingeit. Með þessum umskiptum í orku og í viðhorfum (Merkúr) – sem vænta má í kringum þetta nýja Tungl, er spurning hvort verið sé að veita okkur nýja sýn á þá röð atburða sem hófst í janúar 2020.

Líklegt er að svo verði, því aukin vitundarvakning á eftir að veita okkur allt aðra sýn á hlutina, en það mun væntanlega skila einstaklega góðum árangri á leið okkar fram á við.

TUNGL OG JÚPITER

Á þessu nýja Tungli er líka mjög þétt níutíu gráðu spennuafstaða á milli nýja Tunglsins og Júpiters, sem er á núll gráðu í Hrút. Núll gráðan frá 0-1 í Hrútnum, sem er fyrsta stjörnumerkið í stjörnumerkjahringnum, kallast skapandi gráðan og markar gjarnan upphaf einhvers ferlis.

Með Júpiter á þessari gráðu, megum við eiga vona á aukinni velgengni, útþenslu og jafn viðurkenningu, en þessi afstaða er mjög mikilvæg fyrir þá sem eru með Sól, Tungl eða Rísinguna fremst í Hrútnum. Það tekur Júpiter um tólf ár að fara einn hring um sporbaug sinn, svo það er hægt að skoða hvað var að gerast hjá okkur fyrir ellefu til tólf árum, til að sjá hvers megi vænta núna, bara í æðra veldi.

Staða Júpiters á núll gráðu í Hrút, bæði á Vetrarsólstöðum og þessu nýja Ofurtungli er enn eitt merkið um nýtt upphaf.

MANWE Í SAMSTÖÐU VIÐ JÚPITER

Enn þýðingarmeira er að Kuiper-beltis dvergplánetan Manwe, sem er á tuttugu og níu gráðum og þrjátíu og þremur mínútum í Fiskum, er í samstöðu við Júpiter á 0 gráðunni í Hrút. Manwe er í einungis 27 mínútna fjárlægð frá núll gráðunni, en skríður inn í Hrútinn undir lok janúar á næsta ári, en það tekur Manwe 289 ár að fara einn hring um sporbaug sinn.

Manwe er eitt stærsta táknið sem við höfum fyrir nýja Jörð en í goðsögninni sköpuðu Manwe og kona hans Varda Alheiminn. Hann er æðsti erkiengillinn, næstur huga Guðs og æðsta uppspretta guðlegrar greindar, samkvæmt niðurstöðum úr rannsóknum stjörnuspekings Kelley Hunter. Tilvist Manwe er óháð tíma og rúmi, hann hefur helgað sig endurnýjun heimsins, hann skapaði Alheiminn í upphafi og kemur til með að geta gert það aftur og hann er einarður í því að LJÓSIÐ skuli sigra Myrkrið.

SÓL, TUNGL OG IXION

Sól og Tungl eru á þessu nýja Tungli í samstöðu við Ixion sem er á annarri gráðu og þrjátíu og fimm mínútum í Hrút. Ixion var í goðsögninni þekktur sem hinn löglausi bróðir Plútó. Í lægri birtingu sinni hafði hann enga siðferðisvitund, myrti tengdaföður sinn og hann var útskúfaður af himnum af hinum Guðunum. Seifur gaf honum hins vegar annað tækifæri en Ixion misnotaði það og reyndi að nauðga eiginkonu Seifs. Þá var honum þeytt út í eilífðina á brennandi hjóli.

Teljið þið að þetta þema um skort á siðferðisvitund og á því að greina hvað sé rétt og hvað sé rangt sé að birtast í samfélaginu í dag? Kannski sjáið þið það?

Hærri birtingin af Ixion er hins vegar sérlega falleg og táknræn fyrir nýja Jörð, því í þeirri birtingu er Ixion táknrænn fyrir að hver og einn fari sína eigin sérstöku leið, finni gleði í einfaldleikanum og gleðiríkara lífi. Eitthvað sem er mjög áhugavert tákn um nýja Jörð – og munið að ný Jörð er ekki staður, heldur tíðni.

JÚPITER OG ÚRANUS

Enn ein afstaðan á þessu nýja Tungli er semi-spennuafstaða (45 gráður) á milli Júpiters á núll gráðu í Hrút og Úranusar á fimmtán gráðum í Nauti. Það er margt sameiginlegt með þessum tveimur plánetum. Þær tengjast báðar frelsi, framtíðinni, aukinni vitundarvakningu, því sem markar tímamót og skyndilegri framrás (Úranus) til hækkaðar meðvitundar (Júpiter). Við megum því vænta þess að svona breytingar verði hjá mörgum í kringum Vetrarsólstöðurnar.

Þar sem Júpiter er í Hrút og verður þar fram í maí á næsta ári, er mikilvægt fyrir okkur ÖLL að hugsa um nýtt upphaf, nýjar leiðir og nýjar aðferðir á öllum sviðum lífsins. Hugsa líka um hugrekki, frelsi, sjálfræði, styrk einstaklingsins og sjálfstæði.

Við erum meðskapendur, meðframleiðendur og þátttakendur í þessum breytingum, ekki bara áhorfendur. Við erum ekki bara að taka á móti öllum þessum stjörnuspekilegu upplýsingum, heldur erum við að móta úr þeim. Við erum frumherjarnir sem eru að byggja nýju Jörðina, eitthvað sem við höfum aldrei áður tekið jafnmikinn þátt í.

Því fylgir félagsleg ábyrgð, sem felst meðal annars í því að vera meðvitaður um hvaða hugsanir og tilfinningar við erum að senda frá okkur, allan sólarhringinn. Í þeim felast nefnilega byggingarefni okkar sem við notum til að móta með hina nýju Jörð. Allt sem við sendum frá okkur – og við erum stöðugt að senda eitthvað frá okkur, hvort sem við eru meðvituð um það eða ekki – hefur áhrif. Við þurfum því að vera mjög meðvituð um hvað við erum að senda frá okkur. Við getum það með því að halda fókus á því hver stefna okkar er og aðlaga fókusinn ef þörf krefur.

JÁKVÆÐNI, KÆRLEIKUR, GLEÐI

Ef ykkur finnst lífið erfitt núna – og það er það hjá mörgum – reynið þá að beina fókusnum í aðeins jákvæðari átt. Takið ykkur nokkrar mínútur á dag til að skynja ást ykkar á börnum ykkar, maka og foreldrum, vinum og jafnvel gæludýrunum ykkar. Þakkið fyrir kærleikann sem þið berið í brjósti og þakkið fyrir þá og það sem í lífi ykkar er.

Notið HJARTAÖNDUNIN nokkrum sinnum á dag, því það hjálpar okkur að skynja að styrkur okkar kemur innanfrá og út – en byggist ekki á einhverju utanfrá. Það hjálpar okkur að umbreyta orku okkar og við finnum til meiri innri friðar. Þessi æfing er ekki bara að hjálpa okkur, heldur allri heildinni.

Næstu mánuðir sem framundan eru skipta afdrifaríku máli og því er mikilvægt að við nýtum þá til að leggja grunninn að nýrri Jörð. Lengi hefur verið sagt að hin Gullna Öld hefjist ekki fyrr en 2032, en við stöndum okkur vel sem heild og erum því aðeins á undan áætlun með ýmislegt.

Við erum að gera þetta og við fáum mikla hjálp frá orkunni sem streymir til Jarðar og stuðlar að hækkun meðvitundar okkar. Pláneturnar eru með orkunni sem þeir senda frá sér, að senda okkur „leirinn“ sem við þurfum að móta framtíðina úr. Mótum eitthvað fallegt úr honum.

PLÚTÓ Í SAMSTÖÐU VIÐ PLÚTÓ

Þann 27. desember verður svo þriðja nákvæma samstaðan á milli Plútó í transit og Plútós í korti Bandaríkjanna. Hún mun hafa öflug áhrif og þar sem Plútó fer einn hring um sporbaug sinn á 246-248 árum, munum við finna fyrir afleiðingum þessarar samstöður í nokkur næstu ár. Þessi afstaða verður sú þriðja nákvæma á þessu eina ári.

Líklegt er að afleiðingar þessarar samstöðu valdi algjörri umbyltingu á gildismati, efnahag, stjórnmálum, réttarkerfi, stjórnarskrá og jafnvel landfræðilegu svæði sambandsríkisins. Það verður spennandi að fylgjast með því, vegna þess að hvað sem gerist í Bandaríkjunum á eftir að ganga eins og flóðbylgja yfir alla aðra hluta heims.

OKKAR EIGIN TÍMALÍNA

Við veljum okkar eigin tímalínu nánast á hverju augnabliki og við getum tryggt að við séum á hæstu tímalínunni hverju sinni – bara með því einu að vera í kærleiksorkunni. Finna að við séum að senda kærleik frá okkur, nánast með hverri útöndun, alla daga.

Framundan er það sem margir kalla hátíð gleði og friðar. Við getum gert þessa hátíð að enn meiri gleði- og friðarhátíð með því einu að senda öllum vinum og vandamönnum kærleiksríkar hugsanir, hvort sem þetta fólk er sama sinnis og við eða ekki – og með því að halda okkur sjálfum í kærleika, friði, þakklæti og gleði alla daga.

Ef þér fannst þessi grein áhugaverð deildu henni þá endilega með öðrum.

Þér er velkomið að skrá þig á PÓSTLISTANN minn til að fá reglulega sendar greinar um sjálfsrækt, andleg málefni, stjörnuspeki og náttúrulegar leiðir til að styrkja heilsuna.

Myndir: CanStockPhoto /sarayut

Heimildir: Útdráttur úr skýringum breska stjörnuspekingsins Pam Gregory, sem þýddar eru með hennar leyfi. Skýringar hennar í fullri lengd má finna á Youtube rás hennar. Sjá einnig vefsíðu hennar: www.pamgregory.com