Víða á Vesturlöndum eru foreldrar að vakna upp við vondan draum við það eitt að kynna sér kennsluefni yngri bekkja grunnskóla og jafnvel leikskóla. Svo virðist sem grunn- og leikskólar hafi víða tekið upp á því að kynna kynlíf fyrir börnum sem mega ekki einu sinni horfa á venjulegar spennumyndir og hvað þá klámmyndir sökum aldurs. Börnum er einnig sagt að þau séu mögulega í röngum líkama og þurfi að fá leiðréttingu á því.
Dæmin eru mörg, bæði í íslensku og erlendu samhengi.
Í myndbandinu hér les bandarísk móðir upp úr bók sem er hluti af kennsluefni hennar barns í 7. bekk, þ.e. á aldursbilinu 12-13 ára. Skiljanlega lætur hún einnig í ljós skoðanir á þessu efni. Ekki er mælt með ræðu móðurinnar fyrir viðkvæma.
Enginn skortur er á myndböndum og öðru efni í bandarísku samhengi um foreldra sem vakna upp við svipaðan draum, eða martröð.
Á Íslandi fer einnig fram kynning á kynlífstengdu efni fyrir ung börn langt undir aldurstakmörkum kvikmyndahúsanna. Í aðsendri grein í Morgunblaðinu fjallar Helga Dögg Sverrisdóttir um kennsluefni Samtakanna 78 í íslenskum grunnskólum og færir rök fyrir því að það brjóti gegn íslenskum barnaverndarlögum. Ekki verður slíkt fullyrt hér en ljóst að verið er að lauma áróðri að börnunum með ýmsum hætti eins og myndin hér að neðan, úr kennslubók í stærðfræði, ber með sér.
Ekki dugir að kynna sér efni aðalnámskrár grunnskólanna, en þar kemur orðið kynvitund ekki einu sinni fyrir. Í lögum 2019 nr. 80 1. júlí um kynrænt sjálfræði er heldur ekki fjallað um að innræta eigi börn um hugsanlega rangan líkama þeirra eða möguleikann á slíku. Innrætingin kemur því úr öðrum áttum og því þurfa foreldrar mögulega að vera í auknum mæli vakandi fyrir því sem borið er á borð barna þeirra í skólatíma og jafnvel víðar. Aukið gagnsæi er hérna lágmarkskrafa en einnig að ekki sé verið að hleypa hagsmunahópum með mjög þröngar áherslur að ungum börnum án upplýsts samþykkis foreldra. Þetta er ekki staðan í dag.