Komið hefur í ljós að starfsmenn RÚV höfðu gert ráðstafanir til að unnt væri að afrita síma Páls Steingrímssonar áður en byrlað var fyrir honum. Þetta kemur fram hjá fjölmiðlamanninum Frosta Logasyni í þættinum Harmageddon, á hlaðvarpsveitunni Brotkast.

Frosti segir að honum hafi fundist frásagnir Páls Vilhjálmssonar reyfarakenndar og nánast ótrúverðugar, og því ákveðið að bjóða Páli í viðtal til sín. Frosti ákvað síðan að grennslast fyrir og hefur nú gögn undir höndum sem sanna þátttöku fjölmiðlafólks á símastuldi Páls í byrlunarmálinu svokallaða.  Um er að ræða Þóru Arnórsdóttur fv. ritstjóra Kveiks á RÚV, Þórð Snæ Júlíusson, Aðalstein Kjartansson, Inga Frey Vilhjálmsson og Arnar Þór Ingólfsson hjá Stundinni og Kjarnanum, sem í dag heitir Heimildin og starfa þeir allir í dag hjá þeim miðli, en Þóra er komin til Landsvirkjunar herma heimildir.

Frosti segir frá því að það sé nokkuð augljóst af gögnum málsins sem hann hefur undir höndum, bæði í sjúkra- og lögregluskýrslum, að byrlunin hafi svo sannarlega átt sér stað. Byrlunin var lífshættuleg og olli Páli skipstjóra miklu tjóni; bæði líkamlega og andlega. Þá er einnig augljóst í gögnum málsins að síma Páls hafi verið stolið á sjúkrabeði hans og síminn fluttur upp í höfuðstöðvar RÚV í Efstaleiti, þar sem hann var afritaður og afritin síðan notuð til að byggja upp samræmdan fréttaflutning Stundarinnar og Kjarnans, nú Heimildin, þannig að á gögnum málsins má sjá að blaðamennirnir hafi verið í ákveðnu samkrulli með byrlaranum – „það lítur allavega þannig út“, segir Frosti.

Þá kemur fram að samkvæmt gögnum málsins, höfðu blaðamennirnir í aðdraganda byrlunarinnar keypt símanúmer á kennitölu RÚV og síma til að geta afritað síma Páls á meðan hann lægi meðvitundarlaus á spítalanum.

Frosti greinir frá því að glæpurinn hafi verið svo vel skipulagður að keypt var símtæki sem var nákvæmlega sömu tegundar og farsími Páls Steingrímssonar og keypt var símanúmer sem er nánast það sama og skipstjórans, til þess að samskipti byrlarans við starfsmenn RÚV gætu verið misskilin sem samskipti við Pál þegar yfirlit símareikninga yrði skoðað.

„Þá er auðvitað orðið morgunljóst að þetta samkrull er talsvert umfangsmeira heldur en það að blaðamaður taki við gögnum frá heimildarmanni og vinni upp úr þeim fréttir – þetta er allt annað mál og mun alvarlegra“, segir Frosti.

Frosti greinir svo frá því að „aðeins tveimur vikum eftir þessi ofangreindu tölvupóstasamskipti lögreglunnar og Stefáns Eiríkssonar útvarpsstjóra kom það eins og þruma úr heiðskíru lofti að Þóra Arnórsdóttir ritstjóri Kveiks væri að hætta hjá RÚV – manneskja sem er margverðlaunaður blaðamaður og virtist una sér vel í þessu starfi; allt í einu var tilkynnt að hún væri að hætta – tveimur vikum eftir tölvupóstsamskiptin.

Frosti vekur einnig athygli á því að enginn fjölmiðill hefur vakið athygli á þessu alvarlega sakamáli, og sakborningarnir hjá Heimildinni hafa reynt að gera lítið úr málinu og stefndu síðan Páli Vilhjálmssyni blaðamanni og bloggara fyrir að fjalla um málið á bloggsíðu sinni.

Þess má þó geta að Fréttin.is hefur endurbirt meirihluta af skrifum Páls Vilhjálmssonar um þetta mál og einnig skrif Páls skipstjóra.

Klippu úr þættinum má sjá hér: