Í fréttum í síðustu viku var sagt frá unglingspilti sem hafði farið á Heilsugæsluna vegna mikilla öndunarörðugleika þar sem hann var greindur með kvíðakast. Pilturinn reyndist síðan vera með blóðtappa í báðum lungum. Viðtal var við unga piltinn og föður hans á Stöð 2 fyrir helgi þar sem segir að Covid veikindi hans hefðu leitt til blóðtappa. Fram kemur að unglingurinn hafi fengið fyrsta skammt af bóluefni fyrir ekki svo löngu. Undir lokin segir faðirinn að hann ætli ekki að taka þátt í umræðu um hvort orsökin sé bóluefnið eða Covid en segir að þeim hafi verið sagt að það væri Covid og á þá væntanlega við lækna.

Hvaða læknir skyldi hafa sagt að Covid væri orsökin af blóðtappa hjá ungri manneskju? Þennan meinta Covid kvilla er ekki einu sinni að finna á upplýsingasíðu landlæknis. 

Valtýr Stefánsson Thors barnasmitsjúkdómalæknir segir: „Það er mjög skiljanlegt að hafa áhyggjur af börnunum sínum í kringum Covid. Ég hef sagt áður að þetta er sýking sem þarf að bera virðingu fyrir. Hins vegar er það þannig að í langflestum tilfellum er þetta mjög mildur og vægur sjúkdómur hjá börnum. Í raun og veru er engin ástæða til að vera óttaslegin yfir því.“

Einmitt, mildur sjúkdómur þegar kemur að börnum en síðan gerist það í fyrsta sinn hér á landi að barn er lagt inn inn á spítala vegna Covid og því er haldið fram að Covid sýkingin hafi valdið blóðtappa í báðum lungum. Drengurinn var nýlega bólusettur með bóluefni sem fljótt var þekkt fyrir að valda blóðtöppum en læknar sjá engin tengsl eða kjósa að sjá þau ekki. Þeirra skýring á tengslum Covid og blóðtappa er álíka út í hött og greining lækna á Heilsugæslunni, að öndunarerfiðleikarnir stöfuðu af kvíðakasti.

Fyrirspurn var send á upplýsingafulltrúa Landspítalans um hvort búið væri að staðfesta orsakasamanband Covid og blóðtappana hjá unglingnum. Eins var óskað eftir upplýsingum um hversu margir hafi fengið blóðtappa eftir Covid sýkingu og þá í hvaða aldursflokki. Ekkert svar.

Vonandi nær drengurinn sér fljótt og ef skaðinn verður að einhverju leyti varanlegur, þá má sækja skaðabætur til Sjúkratrygginga sem hafa tekið að sér að greiða bætur fyrir misheppnaða bóluefnaframleiðslu lyfjafyrirtækjanna.

Viðtalið má sjá hér að neðan.