Ingibjörg Gísladóttir skrifar:
Margir vinstri menntamenn hafa hrifist af íslam en það hefur ekki alltaf reynst þeim vel
Skyldi RÚV hafa tekist að eyðileggja þátttöku okkar í Eurovision með undirróðri gegn keppninni? Það eru jú líkur á að Ísrael verði með á næsta ári, eins og það hefur gert frá 1973, tilneytt til að leita eftir samstarfi við Vesturlönd eftir að nágrannalöndin útilokuðu það úr sínum hópi með Khartúm yfirlýsingunni (enginn friður, engir samningar, engin viðurkenning). Þó eru um 70% Ísraela ættaðir frá Miðausturlöndum.
Vinstri pressan, en þó aðallega RÚV, hefur lengi flutt okkur hlutdrægar fréttir af málum fyrir botni Miðjarðarhafsins, eins og af svo mörgu öðru. Hugmyndafræðilega er sem fréttastofan sé enn á bak við hinn „andfasíska múr“ er kommúnistar reistu í Berlín 1961 og líti líkt og A-Þjóðverjar gerðu, á Palestínumúslima sem samherja í baráttunni gegn kapítalismanum.
Gyðingar eru sagðir hafa stolið landinu frá hinum réttmætu frumbyggjum, en gyðingar eru eini hópurinn sem hefur haft sitt eigið ríki í landinu helga og hafa haft þar samfellda búsetu frá því fyrir daga Krists. Palestínumenn urðu hins vegar ekki til sem þjóð fyrr en með stofnun PLO 1964. Ion Mihai Pacepa lýsti því í viðtali við Wall Street Journal 2003 hvernig KGB kom Arafat til valda. Reyndar voru „Palestínumenn“ lengi ósáttir með að vera skráðir sem slíkir og sögðust Suður-Sýrlendingar, allt til 1977 en það ár sagði Zahir Muhsein, einn af leiðtogum PLO, í viðtali við hollenska blaðið Trow að það væri enginn munur á Jórdönum, Palestínumönnum, Sýrlendingum og Líbönum. Það að halda fram sérstöðu Palestínu kæmi aðeins til vegna baráttunnar gegn Ísraelsríki.
Gyðingar hafa byggt upp landið helga. Þeir ferðamenn er fóru þar um á 19. öld, svo sem Herman Melville, Mark Twain, Arthur G.H. Hollingsworth og fleiri lýsa landinu sem að mestu í auðn og helst byggðu bedúínum, en eftir að flóttagyðingar frá Rússlandi fóru að koma, fyrst 1882, þá fjölgaði aröbum stórlega á svæðinu því ólíkt Ottómönum sem skattlögðu þegna sína í drep þá fylgdi gyðingunum uppbygging. Sem fréttaritari Boston Post í Palestínu fyrir stofnun Ísraelsríkis þá sagði Robert Kennedy frá því að gyðingar landsins væru stoltir af því að hafa skapað millistétt araba í landinu og enn hafa arabar það betra í Ísrael en í nágrannalöndunum.
Þriðjungur starfsmanna HÍ virðist styðja Hamas. Væntanlega munu menntamennirnir þó hafa kynnt sér stofnyfirlýsingu Hamas (Hamas Covenant) frá 1988. Þar má fyrst lesa að múslimar séu bestir allra þjóða (úr Kóranversi 3.110). Í yfirlýsingunni kemur skýrt fram að Hamas eigi í trúarlegu stríði, það sé vilji Allah að landið tilheyri honum einum og í sjaríalögbók þeirri sem er í gildi í Palestínu, Relience of the Traveller, segir um jíhad að það sé skylda að berjast gegn þeim sem ekki séu múslimar. Í endurskoðuðu yfirlýsingunni frá 2017 er ítrekað að Ísrael eigi ekki tilverurétt.
RÚV hefur lengi kynnt Hamas sem e.k. góðgerðasamtök en á Gasa hafa þeir stjórnað eins og Ottómanarnir gerðu, arðrænt og kúgað. Í stað þess að byggja upp þennan hluta af Palestínu, sem þeir ráða einir, sem ferðamannaparadís (flottar strendur) hafa þeir lagt alla áherslu á jíhadið með linnulítilli eldflaugaskothríð á bændur við landamærin og tilraunum til að ræna Ísraelum eða myrða þá, eins og þeim sóttist svo vel hinn 7/10 síðastliðinn.
Vinstri menntamenn, svo sem Foucault, studdu Khomeini erkiklerk til valda í Íran 1979 en „Slátrarinn frá Teheran“ sem er nýlátinn í þyrluslysi, dæmdi marga vinstrimenn í landinu til dauða fyrir andíslamskar skoðanir og í Indónesíu voru kommúnistar fjöldamyrtir 1965. Ungir múslimar gengu þar um götur að undirlagi yfirvalda og strádrápu alla þá sem voru grunaðir um að tilbiðja Marx eða Lenín, því eins og segir í Kóraninum (t.d. í versi 20.14) þá skal tilbiðja Allah einan.
Íslamistar eru því ekki traustir bandamenn, nema við niðurrif vestrænna gilda og menningar. Lönd múslima samþykktu aldrei Mannréttindayfirlýsingu SÞ. Jafnrétti kvenna á við karla er þar stór ásteytingarsteinn, sem og réttindi minnihlutahópa.
Fréttastofa RÚV tekur sér að jafnaði stöðu með stríðsmönnum Allah. Hún flutti t.d. daglega í tvo mánuði fréttir af hvarfi Sádans Khashoggi sem vann sér það til óhelgi að rita lofgreinar um Múslimska bræðralagið (móður allra hryðjuverkasamtaka nútímans) í Washington Post og er hópar jíhadista í borgaralegum klæðum drápu ítrekað landamæraverði í Mjanmar, eins og hafði gerst á árum áður, og herinn stökkti stórum hópum Róhingja á flótta þá var stjórnvöldum í Mjanmar alfarið kennt um.
Fréttamenn RÚV telja það ekki hlutverk sitt að segja fréttir. Þeir eru í pólitískri krossferð gegn kapítalismanum og íslenskri menningu sem birtist m.a. í Samherjamálinu og afbökun íslenskunnar. Það er gott og blessað að gagnrýna græðgiskapítalisma en að líta á jíhadista sem samherja mun ekki skila neinu góðu. Geti RÚV ekki skammlaust haldið utan um þátttöku okkar í Eurovision þá þarf að fela öðrum umsjón keppninnar.
