Hildur Þórðardóttir rithöfundur og frambjóðandi Lýðræðisflokksins, birti aðsenda grein á Vísir í vikunni sem ber yfirskriftina „Það er verið að ljúga að okkur." Greinin vakti töluverða athygli og höfðu tugir manna deilt henni og var hún mest lesna greinin í þær 24. klukkustundir sem hún fékk birtingu á fréttavefnum áður en gróf ritskoðun hófst, sem fréttastjórinn Kolbeinn Tumi Daðason ber væntanlega ábyrgð á.
Hildur greinir frá þessu á Facebook síðu sinni og segir í samtali við Fréttina hafa fengið eftirfarandi skýringu frá fréttastofunni: "Greinin stenst ekki fullyrðingar okkar um sannleiksgildi enda full af fullyrðingum sem standast enga skoðun."
Sitt sýnist hverjum um sannleiksgildi greinarinnar sem má lesa hér neðar:
Það er verið að ljúga að okkur
Þótt við myndum slökkva á öllum vélum og verksmiðjum og flytja mannkynið á einu bretti til plánetunnar Mars með öllu sem okkur fylgir, hefði það engin áhrif á hitastig jarðar, hvorki til hækkunar né lækkunar. Hamfarahlýnun er upplogið ástand, eingöngu til að hræða fólk svo auðveldara sé að stjórna því.
Í barnaskóla lærðum við að menn andi að sér súrefni og frá sér koltvísýringi og að plöntur nærist á koltvísýringi og gefi frá sér súrefni. Fullkomið sambýli plönturíkisins og mannkynsins. Nú allt í einu stafar jurtaríkinu stórkostleg hætta af koltvísýringi mannkynsins. Hvað breyttist eiginlega?
Um síðustu aldamót var því spáð að yfirborð sjávar myndi hækka stórkostlega næstu 20 árin með bráðnum jökla. Var teiknuð mynd af Reykjavík þar sem sjávarsíðan var komin upp að Elliðaám og rétt Háaleitið stóð uppúr. Þá þakkaði ég fyrir að búa í Breiðholtinu. Nú 25 árum síðar hefur yfirborð sjávar ekki hækkað um þumlung. Þetta var bara hræðsluáróður og óttastjórnun. Það er því ekki skrítið að fjórir stjórnmálaflokkar skuli ekki leggja neina áherslu á loftslagsmál.
Óþægilegur sannleikur
Hamfarahlýnunarhræðsluáróðurinn má rekja aftur til David Rockefeller auðjöfurs snemma á 6. áratugnum. Rockefeller hagnaðist gífurlega á olíuframleiðslu og leitaði allra leiða til að halda olíuverðinu uppi. Fyrst var hann með hræðsluáróður um að olíuauðlindir jarðarinnar myndu fljótt klárast en þegar sífellt fleiri lönd fundu olíu þurfti að finna eitthvað annað. Þá datt honum í hug að nýta koltvísýringsútblástur til að búa til eitthvað hræðilegt og stjórna mannkyninu í leiðinni. Rockefeller var nefnilega einn af þeim sem vildu fækka mannkyninu og kynbæta það (eugenics).
Til að koma hugmyndinni á framfæri stofnaði hann ýmis óhagnaðardrifin samtök (NGO) og styrkti marga háskóla fyrst í Bandaríkjunum og síðar í Bretlandi. Nú fær 81 háskóli styrk frá Rockefeller sjóðnum m.a. Harvard, Columbia, New York, Stanford, MIT, Cornell and Oxford og sjö háskólar í Bretlandi. Það tók nokkra áratugi að koma hugmyndinni af stað, en þegar vinstri menn vantaði eitthvað til að fylkjast um í stað sósíalisma sem þá var á undanhaldi og stukku á hugmyndina um umhverfisvernd, byrjaði boltinn að rúlla. Rockefeller sjóðurinn fjármagnaði m.s. kvikmynd Al Gore „An inconvenient Truth“ og við vitum framhaldið. Hinn óþægilegi sannleikur er auðvitað að loftslagsfræðin eru byggð á sandi.
Hörðustu mennirnir á bak við þessa kenningu eru aðallega stærðfræðingar, tölfræðingar og stjórnmálafræðingar, enda gengur kenningin út á að spá í tölur og hagræða gröfum til að fá hagstæða niðurstöðu. Þetta gætu allt eins verið spákonur og seiðkarlar því kenningin byggir ekki á neinu áþreifanlegu. Loftslagsfræðingar sem fá niðurstöðu sem samræmist ekki hinni einu viðurkenndu skoðun um hamfarir eru hunsaðir, því orðræðunni er stýrt.
Árlegar hitabylgjur eru nú allt í einu merki um hamfarahlýnun og árlegar kuldatíðir bara einstakur atburður. Ástæðan fyrir því að hitabylgjur eru óþægilegri nú en áður er að við erum búin að malbika allt í kringum okkur og malbik endurkastar hitanum. Hitamælar sem áður voru fyrir utan borgirnar eru nú komnir inn í byggð og loftkælingar blása heitu lofti beint á þá.
Golfstraumurinn notaður til að hræða Íslendinga
Eins og við vitum öll hér á Íslandi hefur engin breyting orðið á hitastigi hér á landi síðustu 15 árin. Hitinn sveiflast á milli ára eins og alla tíð. Þess vegna koma menn fram nú með kenningar um að 50% líkur séu á að Golfstraumurinn muni hætta og kólna snarlega á Íslandi. Þetta er eins og að segja að 50% líkur séu á að Esjan fari að gjósa.
Þetta er bara óþarfa hræðsluáróður, einungis til að letja fólk til að eignast börn og koma sér fyrir á Íslandi. Ef Íslendingar flytjast til útlanda í stórum stíl verður auðvelt fyrir útlendinga að eignast hér land og auðlindir.
Þýski vísindamaðurinn sem kom hingað til lands til að hræða lýðinn starfar hjá Potsdam stofnuninni (NGO) sem var stofnuð árið 1992 af stærðfræðingnum og skammtafræðingnum Schellnhuber sem er einmitt félagi í World Economic Forum.
Vissulega þurfum við að ganga vel um jörðina, hætta með plastið og menga minna. En það er lygi að útrýma þurfi bændum að því kýr prumpi svo mikið. Það er lygi að við þurfum að hætta að borða kjöt því annars muni hitastigið hækka. Það er lygi að koltvísýringsútblástur skipti sköpum um hækkun eða lækkun hitastigs.
Höfundur er rithöfundur og skipar 2. sæti Lýðræðisflokksins í Reykjavík norður.
