Undanfarnar nætur hafa verið unnin skemmdarverk á bílum lögreglu þar sem þeim hefur verið lagt í bifreiðastæði aftan við Brekkustíg 39 á milli verkefna, þetta kemur fram í tilkynningu frá Lögreglunni á Suðurnesjum.
Búið er að brjóta hliðarrúður í þremur bílum eins og sjá má á meðfylgjandi ljósmyndum.
Lögreglan biður þá sem upplýsingar hafa um málið að vera í sambandi í síma 444-2000.
Miklar umræður hafa skapast um málið á síðu lögreglunnar á Facebook. Sigurjón Hafsteinsson íbúi á Suðurnesjum spyr hvort það sé ekki kominn tími á íbúafund og taka spjallið með yfirvöldum og íbúum og merkir hann Guðrúnu Hafsteinsdóttur, dómsmálaráðherra við spurninguna. Sigurjón bendir á að Reykjanesbær sé á tímamótum fjölmenningar sem ekki verður aftur snúið frá. Skilaboðin séu skýr, „þetta ástand hér á Suðurnesjum kallar á fjölgun í lögreglunni og nýtt mannsæmandi húsnæði undir alla starfsemi lögreglunnar, ástandið í dag er ekki boðlegt, hvorki lögreglunni né íbúum til framdráttar,“ segir Sigurjón.
Kolbrún Jóna Pétursdóttir, lögfræðingur Lögreglunnar á Höfuðborgarsvæðinu og íbúi á Suðurnesjum virðist þó koma af fjöllum, og spyr undir færslu Sigurjóns, hvað þetta komi fjölmenningu við. Íbúum finnst innlegg hennar skjóta skökku við því ítrekað hafa komið upp vandamál í Reykjanesbæ er tengjast hælisleitendum, sem hafa ógnað öryggi íbúa og barna í bænum á undanförnum árum, hér má lesa um eitt slíkt mál og annað hér.
Í gær birti Mbl.is frétt þess efnis að 72 erlendum brotamönnum hafi verið vísað af landi brott vegna ýmiss konar refsilagabrota og má lesa hér. Þá greindi Páll Winkel fangelsismálastjóri frá því nýlega að um 80% gæsluvarðhaldsfanga séu útlendingar.
Færslu lögreglunnar í heild sinni má sjá hér neðar og skjáskot af innleggi Sigurjóns.
