Smám saman fjölgar þeim sem hafa fundist látnir eftir eldana á Maui í Havaíeyjaklasanum, þar sem 2,207 byggingar í Lahaina strandhverfinu gjöreyðilögðust, auk bifreiða og annars. Samkvæmt Mauinow.com var talan komin í 106 hinn 15. ágúst en þá hafði verið leitað á 27-32% brunasvæðisins. Fjölmargir eyjaskeggja eru reiðir yfirvöldum og hafa látið það í ljós á miðlum svo sem Gettr og Bitchute. Algengt er að menn kenni stóru fjárfestingasjóðunum, Vanguard, Blackrock og Statestreet auk Oprah Winfrey um og segi það hreint út að Lahaina hafi verið brennd af því að íbúar þar hafi hafnað því að selja sjávarlóðir sínar til auðmanna á meginlandinu.

Lahaina var höfuðborg Konungsríkis Hawaí frá 1820-1894, en þá tók Honululu við og hefur frumbyggjum eyjanna tekist að halda Lahaina út af fyrir sig að mestu þótt að ríka og fræga fólkið, s.s. Oprah, Jeff Bezos, Steven Tyler, Owen Wilson og fleiri hafi komið sér upp sumardvalarstöðum á eyjunum. Oprah bætti enn í safnið á þessu ári, Larry Ellison á nær alla Lanai eyju og Mark Zuckerberg hefur verið ásakaður um að vilja leggja undir sig Kauai eyju með lögsóknum gegn nágrönnum sínum þar.

Margt skrýtið við þessa elda

Samkvæmt CNN hefur Maui 80 almannavarnarflautur, sem ekki voru virkjaðar. Haft er eftir íbúum að þeir hefðu ekki fengið neina alvöru viðvörun gegnum símana heldur. Íbúi Lahaina sagðist aðeins hafa fengið viðvörun um hvassviðri og mögulega elda gegnum símann og annar sagði að eina viðvörunin hefði verið reykjarbólstrarnir.

New York Times segir frá því að vatn hefði nær hætt að koma úr brunahönunum þegar slökkva hefði átt eldana nærri Lahaina og vindurinn breytt bununni í úða og segist blaðið hafa fengið margar staðfestingar á því. Vatnsskorturinn hefði skapað lífshættu fyrir slökkviliðsmenn og menn spyrji sig hvernig samfélagið geti betur búið sig undir þær hættur er fylgja þurrkum og hvassviðri.

Neistar frá föllnum rafmagnslínum?

Líklegt er talið að eldar hafi kviknað á nokkrum stöðum á Maui vegna neista frá rafmagnslínum er staurar brotnuðu. Það er haft eftir lögfræðingi sem hefur unnið skaðabótamál upp á milljónir dollara gegn raforkufyrirtæki í Kaliforníu fyrir að hafa valdið gróðureldum. Engar tilkynningar um eldingar hafi borist en auðvitað geti ýmislegt myndað neista og komið af stað báli þegar jarðvegur sé skraufaþurr. Í Minnesóta 1918 var það neisti frá lestarteinum sem kom af stað eldi er kostaði 453 lífið, skv. Wikipediu. Haft er eftir sérfræðingi í loftslags og orkumálum við Stanford háskóla, Michael Wara, að það sé „engin spurning" að rafveita svæðisins hefði átt að taka strauminn af til að minnka hættu á gróðureldum þar sem hvassviðri hefði verið spáð. Slíkt sé gert í Kaliforníu, Nevada og Óregon við slíkar aðstæður. Hópmálsókn gegn Rafveitu Havaí fyrir hönd íbúa Lahaina er þegar farin í gang.

Hátækniorkuvopn notuð?

Ein þeirra hugmynda er virðist hafa náð nokkru flugi  er að hátæknivopn (háorkuleisergeislar og aðrir háorkurafsegulgeislar) sem Varnarmálaráðuneyti BNA eyði milljarði dollara árlega í að þróa hafi verið notað til að kveikja eldana. Newsweek sagði frá þeim bollaleggingum „loftslagsafneitara" og segir að þessar nýju samsæriskenningar virðist byggja á því að rannsóknastofnun flughersins hefði sett á stofn sérstaka deild til að þróa DEWs (Directed Energy Weapons) „fyrir alla umferð í lofti og á legi" nærri Hawaí árið 2007, samkvæmt grein í Wired.