Íbúar í Reykjanesbæ hafa fengið nóg af því ófremdarástandi sem ríkir í Reykjanesbæ vegna ógnandi framkomu hælisleitenda. Sigga Haralds, stjórnandi hópsins Reykjanesbær - tökum samtalið, setti inn færslu nú í kvöld sem lýsir ástandinu og þar fylgja sögur af ógnandi hegðun hælisleitendanna. Fólk er orðið skelfingu lostið ekki síst börn sem geta ekki lengur ferðast með strætisvögnum vegna áreitis frá umræddum hóp manna.

Glápa inn um glugga og brjótast inn

Sigga segir að eftir að þau hafi stofnað síðuna þá hafi þeim borist ýmsar upplýsingar frá íbúum í bænum, um mál sem þau eru ekki sátt við og má tengja við þessi svokölluð ,,útlendingamál" og að þau séu í raun komin úr böndunum.

Eitt málið snýr að tveimur konum sem búa í bænum og komu að máli við Siggu í gær, þær eru ekki alls kostar sáttar við hvernig komið er. „Önnur vaknar eina nóttina hér við að reynt er að fara inn um gluggann hjá henni en þegar hún kveikir ljósið að þá er greinilega hætt við og hlaupið í burtu. Hún er með gardínurnar hjá sér dregnar niður því hún hefur nokkrum sinnum orðið vör við útlendinga sem standa álengdar og glápa inn um gluggana hjá henni. Með henni býr dóttir hennar með lítið barn og hefur sú verið elt heim oftar en einu sinni. Hún er að láta setja upp hjá sér öryggiskerfi, hún vinnur vaktavinnu og vill ekki að dóttir hennar sé ein heima óvarin með litla barnið,“ skrifar Sigga.

Eltu og áreittu 14 ára stúlku

Annað mál snýr að 14 ára gamalli stúlku sem æfir körfubolta og býr í Innri-Njarðvík. Hún var vön að taka strætó til að komast á æfingar í Ytri-Njarðvík og hélt áfram þrátt fyrir að vinkonur og æfingafélagar væru hættar að nota strætó, því útlendingar voru að glápa á þær og jafnvel áreita í strætó. „En einn daginn þegar hún kom inn í strætó voru þar útlendingar, þeir slógu um hana hring, mældu hana út og voru með athugasemdir á máli sem hún skildi ekki. Þegar í Ytri-Njarðvík var komið flýtti hún sér út úr strætó þó hún hafi ekki verið komin á leiðarenda, til að flýja þetta ástand. Það dugði ekki til því þeir fóru á eftir henni - eltu hana. Hún komst inn í Kost - litlu kjörbúðina sem margir þekkja sem Fíakaup, þar hringdi hún í móður sína sem kom og sótti hana. Þessi unga stúlka og vinkonur hennar taka aldrei aftur strætó í Reykjanesbæ. Foreldrarnir skiptast á að aka þeim á æfingar og það sem þær þurfa að komast,“ skrifar stjórnandi hópsins.

Þriðja málið fjallar um starfsmenn IGS, sem eru þjónustuaðilar flugfélaganna. Sigga segir að til dæmis hjá IGS og Airport Associates er meirihluti starfsmanna af erlendu bergi brotnir, orðnir Íslendingar þar sem þau eru búin að vinna hér í mörg ár, borga skatta og útsvar, leigja húsnæði (þau sem ekki hafa getað keypt) eiga fjölskyldur, börn sem ganga í skóla og eru búin að gera sér líf hér. Sem sagt fullgildir Íslendingar. En margt af þessu fólki er búið að missa húsnæðið í raun þvingað út úr húsnæðinu vegna brjálæðislegrar hækkunar á leigu. Sumir hafa brugðið á það ráð að búa nokkrir saman, aðrir hafa gefist upp og flutt aftur heim til heimalandsins og einhverjir sem eru ekki reiðubúnir að gefast upp og fá að gista hjá vinum og kunningjum. „En þeim fer því miður fækkandi. Ríkið hins vegar tekur þessar íbúðir sem losna á leigu, sama hvað verðið er og þangað eru settir hælisleitendur eða flóttafólk. En þeir sem greiða útsvarið og skattana eru í húsnæðisvandræðum - á götunni,“ skrifar Sigga.

Hælisleitendur góna á börn í frímínútum

Fjórða málið fjallar um konu sem býr á Ásbrú, rétt hjá Háaleitisskóla, þar eru nokkrar blokkir sem hýsa hælisleitendur. Konan segir frá því að búið sé að koma girðingu umhverfis skólann en við hana hanga ungir karlmenn - hælisleitendur, reykjandi og góna á börnin í frímínútum þar sem þau eru að leika sér. Þeim þykir þetta ekki þægilegt og starfsfólk reynir hvað það getur til að mynda varnarvegg til að skýla börnunum. Þá segir að allt sé vaðandi í sígarettustubbum og sóðaskap eftir hælisleitendurna við girðinguna og strætóskýlið við skólann.

„Fólk er búið að fá nóg og svo er þetta vandræðaástand farið að bitna á börnunum okkar. Það þarf að fara að gera eitthvað af viti. Þetta er algjörlega óásættanlegt ástand með öllu,“ skrifar Sigga að lokum.

Fréttin tekur á móti reynslusögum af áreiti hælisleitanda þar sem fullum trúnaði er heitið. Hægt er að senda beint á [email protected]