Hallur Hallsson skrifar:
Ísland reið á vaðið meðal vestrænna ríkja með pólitísk réttarhöld þar sem ríkisvaldi var gróflega misbeitt í boði Jóhönnu og Steingríms. Sérstakur saksóknari skipaður og verðlaunaður með feitu embætti. Nú er rúmur áratugur frá því Geir Haarde var dæmdur af Landsdómi fyrir að halda ekki ráðherrafundi fyrir Hrun 2008. Það þótti langt til seilst í pólitískum ofsóknum með RÚV klappandi á 1. bekk. Ísland var með óbragð í munni og margir þingmenn sem véluðu hafa beðið Geir afsökunar. Í Ameríku fetar Biden í fótspor þeirra skötuhjúa þó hafa beri í huga að réttarhöldin hér voru örútgáfa af því sem nú á sér stað í Vesturheimi. Mjór er mikils vísir. Hryllingur pólitískra réttarhalda Stalíns og Hitlers lifir með mannkyni.
248 milljóna áhorf á Trump
Í Ameríku fjölgar ákærum á hendur 45. forseta Bandaríkjanna, Benjamítanum Dónaldi Jóni Trump með rætur á Suðureyjum. Síðasta ákæra var gefin út í Georgíufylki. Átján eru ákærðir með Trump. Trump var ekki meðal frambjóðenda repúblikana í umræðum á FoxNews, en var í viðtali við Tucker Carlsson á Twitter. Á hádegi 25.08 höfðu 248 milljónir manns horft á samtal þeirra. Fox garmurinn með 11.1 milljón að sögn CNN með sitt öráhorf 500 þúsund að meðaltali, amerískir falsmiðlar í sjokki. Svona bregst Ameríka við pólitískum ofsóknum.
Trump í Fulton prison
Trump gaf sig fram við Fulton Prison í nótt þar sem Johnny Carson söng forðum. Við fáum að sjá mugshot af Trump líkt og hverjum öðrum sakamanni. Aldrei í sögu Vesturlanda hefur jafn svakalegu hatri verið beint að einum pólitíkus. Trump er ákærður fyrir að reyna hnekkja úrslitum kosninganna 2020. Þetta er súrealískt. Rúmu ári fyrir kosningar er honum bannað að tjá sig um málaferlin. Múlbundinn Trump þarf líklega að verja tugum milljarða í málsvarnir. Þrátt fyrir ofsóknir eða kannski þeirra vegna ber Trump höfuð og herðar yfir aðra stjórnmálamenn að vinsældum í Ameríku. Hann fékk 75 milljónir atkvæða 2020 og 248 milljóna áhorf með Tucker !!!
Séníll mafíósi ákærandi
Seníll mafíósi Joe Biden er í praxís ákærandi. Stöðugt bætist við syndaregister þeirra feðga Joe og Hunter. Biden verndaður af FBI og CIA er ofar lögum; above the law. Bandaríkin eru höfuðból spillingar í veröld stýrt af prenturum dollars, Big Pharma og Hermaskínu sem hefur tæmt lager sinn í Úkraínu. Davíð Oddsson kallar mál Bidenfeðga mesta spillingarahneysklið. Fréttafólk okkar tíðar lætur sér lynda að lepja fréttaskeyti Reuters og elta CNN, New York Times í eigu Blackrock og Vanguard sem eiga allar eignir veraldar til að halda lýðnum í myrkri. Íslenskir ríkis- og ríkramiðlar láta sem allt sé með felldu í Ameríku. Engar umræður eru leyfðar; efasemdir úthrópaðar Election Denial.
Foringjar framkvæmdasveitar
Svo bara tveir séu nefndir, þá leiða Bogi Ágústsson á RÚV og Kolbeinn Tumi á Stöð 2 útburð spunaveitna hinna ofsaríku um endalausar styrjaldir, linnulausar plágur og loftslagsvá. Þeir eru foringjar í framvarðasveit ríkislögreglustjóra, málpípur ofvaxins ríkisvalds sem hefur gengið glóbalizma á hönd og framselt fullveldi þjóðar. Titlunum var úthlutað í covidplágu gegn ríkisfé. Ömurlegir titlar að bera. Þeir hafa lagt orðstýr sinn að veði ónýtum málstað. Bogi leiðir RÚV í samstarfi evrópskra ríkismiðla um eina og sömu frétt á rauntíma. Svartara verður það ekki. Þeir eru í skjóli valds en vindar snúast svo sem við öll þekkjum. Abraham Lincoln sagði: „Þú getur stundum blekkt fólk og sumt fólk alltaf en þú getur aldrei blekkt alla öllum stundum. You can fool all people some of the time and some people all the time. But you can never fool all people all the time.“
Af hverju lýgur Isavia?
Í stað friðar er Ísland hervætt. Nato-stöðin orðin atómstöð með B-2 váfugla hlaðna kjarnorkusprengjum, Helguvík er kjarnorkukafbátalægi, vígadrekar Nato tíðir gestir í höfnum. Þöggun ríkir um Nord Stream gasleiðslurnar og íslenska aðild. Þrír B-2 váfuglar ögruðu og skelfdu Reykvíkinga með yfirflugi og háværum drunum á sólríkum ágústdegi. Váfuglarnir hófu sig til lofts í norðvestur frá Keflavíkurflugvelli yfir Leiruna og tóku hægri beygju áleiðis til Reykjavíkur á vegum Pentagon í samvinnu við Gæsluna, Isavia með samþykki Dísu ráðfreyju. Af hverju lýgur Isavia að váfuglarnir hafi flogið í 17 þúsund feta hæð þegar þeir voru í lágflugi í um fimm þúsund fetum? Af hverju er logið að þoturnar hafi beygt yfir Reykjavík vegna „anna við flugleiðsögu.“ Ef satt væri hversu vanhæft batterí er Isavia að hleypa þremur váfuglum meðal borgaralegrar flugumferðar? Isavia veit sem er að fjölmiðlar okkar sópa öllu sem sópa þarf undir teppi. Kolbeinn Tumi blaðraði við Albert Jónsson, Mogginn skrifaði um herlegheit og gæsir sem ærðust og ruv.is kvað frétt sína um váfuglana „því miður ekki vera til“ svona eins og sópa undir teppi, suss suss. Þetta er ekki hægt að skálda.
Prigozhin og Pútín
Nú hefur þota Prigozhin hrapað í Rússlandi með þeim afleiðingum að Wagnerforinginn fórst ásamt átta eða níu manns. Hann var á farþegalista. Myndir sýna eld í vinstri væng þotunnar þegar hún hrapaði til jarðar. Ríkis- & ríkramiðlar okkar kváðu strax uppúr um að Pútin sé að verki. RÚV segir þá sem styggja Pútin vera drepna. RÚV virðist þekkja vel að tjaldabaki í Kreml þó Haukur Hauksson fréttamaður sem búið hefur í Moskvu í 30 ár sé á svörtum lista ríkismiðilsins. Pútin var kennt um Nord Stream hryðjuverkið. Það er þaggað og Vesturlönd komu í veg fyrir rannsókn Öryggisráðs Sameinuðu þjóðanna. Svo mikið um vestræna sannleiksást.
Nú hef ég ekki hugmynd um hvort Pútin sé að baki dauða Prigozhin. Það má þó heita merkilegt að Pútin drepi Prigozhin til þess að gleðja Úkra á þjóðhátíðardaginn og skapa umræðu um eigin illsku á BRICS ráðstefnunni í S-Afríku dagana sem Suður-Arabía, Íran, Argentína, Egyptaland, Sameinuðu furstadæmin og Eþíópa ganga í samstarf um gjaldmiðla á gullfæti. Dagar pappírsdollars eru taldir og ameríska öldin á enda. En auðvitað kemur það ekki upp í huga Alberts sem er að skapa sér nafn sem nato-albertí. Guðlausir kenna að manneskjan komi úr myrkrinu þar sem ekkert er, rotni og morkni í moldinni að loknu lífshlaupi. Er furða þó guðlaus Vesturlönd séu í kreppu.
Prigozhin og Pútín