Ingibjörg Gísladóttir skrifar:

Nýlega kom það í fréttum að Elon Musk hefði sagt auglýsendum að fara til fjandans ef þeir vildu kúga sig til að láta af þeirri stefnu sinni að hafa X (Twitter) opinn umræðuvettvang. Þeir höfðu kvartað undan því að auglýsingar þeirra birtust oft við hliðina á efni frá óæskilegum aðilum og að Musk leyfði gyðingahatur á vefnum og var hann sjálfur ásakaður um gyðingahatur er hann samsinnti notanda er sagði: „Samtök gyðinga hafa beitt nákvæmlega sömu hatursrökunum gegn hvítum og þau segjast vilja að menn hætti að nota gegn þeim.“

Þar mun Musk hafa haft ADL í huga, en samtökin sem segjast berjast gegn hatri og rasisma á netinu og vilja hafa þar öruggt svæði þar sem enginn þurfi að móðgast skilgreindu til skamms tíma rasisma sem „jaðarsetningu eða/og kúgun litaðs fólks sem byggist á félagslegu stigveldi er veitir hvítu fólki forréttindi.“ En þar sem í Bandaríkjunum er almennt litið á gyðinga sem hvítan forréttindahóp þá jók barátta ADL eðlilega á hatur og rasisma gegn gyðingum. 

Skoðanir Ye eru umdeildar  

Þetta er ekki fyrsta stríð Musk við ADL en fyrir ári síðan opnaði hann fyrir aðgang Kanye West með sínum 38 milljónum fylgenda og þá kallaði ADL eftir því að auglýsendur slaufuðu miðlinum því Kanye sem nú kallar sig Ye er mjög gagnrýninn á gyðinga, bæði sem heild og einstaka menn er hann hafði átt í viðskiptum við. Ye hefur vissulega póstað ýmsum undarlegum samsæriskenningum um gyðinga enda tilheyrir hann hópi sem telur sig vera afkomenda hinna fornu Ísraelsmanna, Black Hebrew Israelites, sem hatar núverandi Ísraelsmenn fyrir að hafa stolið af sér frumburðarréttinum ef svo má segja (sem skýrir opinskáan stuðning sumra deilda Black Lives Matter við Hamas).

Chuck Schumer ræðir heimsins óréttlæti

Gyðingahatrið í Bandaríkjunum er vissulega yfirgengilegt um þessar mundir enda hefur það fengið að grassera í háskólunum sem fylgifiskur nýmarxismans. Chuck Schumer, valdamesti gyðingurinn í bandaríska þinginu, hélt nýverið ræðu þar sem hann sagði að sumir frjálslyndir og ungt fólk básúnaði nú gyðingahatur í nafni félagslegs réttlætis. Hann sagði að ekki fyrir svo löngu hefðu hóparnir gengið saman til stuðnings svörtum og lituðum. Þeir hefðu staðið saman gegn hatri á Asíubúum, mótmælt fordómum gegn LGBTQ samfélaginu og barist fyrir rétti kvenna til fóstureyðinga vegna þess að gyðingar telji að óréttlæti gagnvart einum hópi kúgaðra sé mál allra hópa. Sumir telji þó greinilega að félagslegt réttlæti eða stuðningur sé ekki ætlað gyðingum.

Senator Chuck Schumer, the majority leader and highest-ranking Jewish official in the U.S., warned some liberals and young people on Wednesday that they were “unknowingly aiding and abetting” antisemitism in the name of social justice. https://t.co/bdxioQ0SDq pic.twitter.com/BPDILWDyII

— The New York Times (@nytimes) November 30, 2023

Hópur gyðinga segir ríkandi hugmyndafræði í BNA and-gyðinglega

Ekki eru allir gyðingar sammála um að nýmarxisminn sé eitthvað fyrir þá, né að skoðanakúgun og þöggun samræmist gyðinglegum gildum. Meira en 1.000 manna hópur gyðinga, þar á meðal Steven Pinker, Dave Rubin, Abigail Shrier og Bari Weiss, hefur sett fram yfirlýsingu þar sem segir að tjáningarfrelsinu í Bandaríkjum sé ógnað; reynt sé að þagga niður í öllum sem ekki fylgi ríkjandi hugmyndafræði en eitt grunngilda gyðinga sé opin orðræða, skoðanaskipti og virðing fyrir andstæðum sjónarmiðum. Þeir segja að samkvæmt gyðinglegri hugmyndafræði skuli einungis dæma menn af eigin hegðun sbr. Ezekiel 18:20, en samkvæmt ríkjandi hugmyndafræði í BNA byggist siðferðisleg sekt manna eða sakleysi á því  hvaða sjálfsmyndarhópi þeir séu sagðir tilheyra.

Í yfirlýsingunni frá Jewish Institute for Liberal Values segir að sakir þess að ríkjandi hugmyndafræði skapi svarthvíta heimsmynd þar sem menn séu flokkaðir í kúgara eða kúgara og kyndi undir eitruðum hugmyndum um „gyðingleg forréttindi,“ þá séu gyðingar jafnvel sakaðir um „hvíta yfirburðahyggju.“ Margir gyðingar séu áttavilltir í þessu pólitíska landslagi. Samtök þeirra hvetji ekki til umræðna um álitamál, ekki einu sinni þótt þau komi frá svörtum, og leiðtogar gyðinga hafi jafnvel fordæmt gyðinga fyrir að tjá óvinsælar skoðanir. Þeir segja að rasismi gegn svörtum sé enn vandamál en úr því verði ekki bætt með þöggun umræðunnar. Lokasetningin er: „Við meðlimir hins gyðinglega samfélags bætum röddum okkar í sístækkandi kór sem styður við frjálslynd grunngildi okkar; við höfnum því að hugmyndafræði sé þvingað upp á okkur, hvetjum til opinnar umræðu um krefjandi mál og viljum leggja okkar af mörkum til réttlátara þjóðfélags í Ameríku.“

Þessi hópur frjálslyndra gyðinga hafnar semsagt nýmarxismanum, sjálfsmyndarpólitíkinni og slaufunarmenningunni og er sammála Elon Musk um að hugmyndafræði ADL, Chuck Schumers og valdaelítunnar skapi þeim óvild og vandræði og sé ekki í samræmi við grunngildi gyðinga. Kannski væri ráð  að slaufa ADL og Schumer?