Eftir Geir Ágústsson: 

Framkvæmdastjórn Evrópusambandsins og Alþjóðaheilbrigðismálastofnunin (WHO) hafa nú tekið höndum saman í þróun á „stafrænu frumkvæði til að efla lýðheilsuöryggi á heimsvísu“.  Með öðrum orðum, rakningarforritið sem Evrópusambandið þróaði með glæsibrag á tímum COVID-19 fær nú alþjóðlegan sess. Upplýsingar um sprautur og fyrri smit einstaklinga rata í stóra gagnagrunna sem má fletta upp í og úrskurða í kjölfarið hvort viðkomandi einstaklingar geti eða megi hitt og þetta. Þetta verður, að sögn, fyrsta skrefið í átt að fyrirbæri sem kallast á ensku „WHO Global Digital Health Certification Network (GDHCN)“ eða einhvers konar alþjóðlegu vottorðakerfi sem þekur jarðarkringluna. Til hagræðingar skulum við kalla þetta kerfi ÞRÆLL – Þægileg Rakning á Æfidögum Liðlausra Leppa.

ÞRÆLL mun draga á tækniþekkingu Evrópusambandsríkja sem gerði sambandinu mögulegt að loka á ferðalög og atvinnufrelsi íbúa þess með miklum ágætum. WHO orðar þetta öfugt: ÞRÆLL gerði sambandinu mögulegt að liðka fyrir ferðalögum og ferðaþjónustu. Þeir sem tóku rétt lyf þurftu ekki að láta prófa sig eins og aðrir og gátu borið veirur og smit með sér óhindrað á meðan heilbrigðir einstaklingar án lyfjagjafarinnar sátu heima eða sættu prófunum og skerðingum.

ÞRÆLL verður settur af stað strax í þessum mánuði og smátt og smátt ná utan um bæði sprautur og fyrirbyggjandi lyfjagjöf til varnar hverri þeirri ógn sem lýst verður yfir af hálfu WHO, auk lausna sem WHO samþykkir. Sérstök áhersla verður á að ná til lágtekjuríkja sem höfðu ekki efni á að innleiða skerðingar og eftirlit til að forðast eina veiru umfram aðrar.

Væntanlega verður ÞRÆLL innleiddur í íslensku samfélagi áður en langt um líður. Í kjölfarið kemur væntanlega næsta apabóla eða kvefpest, auk ferskra skammta af nýjum sprautum.