Samkvæmt áreiðanlegum heimildum sem Fréttinni hafa borist, þá er það Sigríður Dögg Auðunsdóttir formaður Blaðamannafélags Íslands og starfsmaður RÚV sem gerðist uppvís að skattalagabroti í tengslum við AirBnb leiguíbúð.

Páll Vilhjálmsson bloggari hefur fjallað um málið undir rós undanfarna daga en hefur ekki viljað birta nafn Sigríðar þar sem fréttamenn RSK-miðla hafa í þrígang stefnt Páli fyrir að fjalla um byrlunar- og símastuldsmálið, þar sem fimm blaðamenn RSK-miðla hafa stöðu sakbornings. Frosti Logason fór ítrarlega yfir það mál í þætti sínum á Brotkast þar sem hann ræddi við fórnarlambið í málinu, Pál Steingrímsson skipstjóra, og má sjá hér.

Sigríður fékk samkvæmt heimildunum sérmeðferð hjá skattinum þrátt fyrir undanskot upp á tugi milljóna króna.

Þegar upp komst um skattalagabrotið fékk Sigríður að endurgreiða í gegnum einkahlutafélag með 25 prósent álagi. Aðrir i sömu sporum fengu á sig opinbera ákæru. Þetta vekur upp spurningar um jafnræði fyrir lögum.

Þess má geta að þegar að Fréttin.is var nýlega stofnuð þá gerði formaður blaðamannafélagsins sér lítið fyrir og úthúðaði miðlinum í viðtali við Stundina, og notaði einnig yfirburðastöðu sína á RÚV til að tala niður til nýs miðils á fjölmiðlamarkaði, í stað þess að bjóða nýjum eiganda og ritstjóra til viðtals, t.d. í Kastljós þar sem Sigríður er einn þáttastjórnenda. Mannlíf fjallaði einnig um málið.

Í viðtali við Stundina sagði Sigríður að Fréttin.is væri „bloggsíða sem vill láta líta á sig sem fjölmiðil og að miðillinn setji fram fréttir í ákveðnum tilgangi og starfi því ekki samkvæmt grundvallarreglum blaðamennsku.“ Þessi ummæli formanns Blaðamannafélags Íslands, hljóta því að skjóta skökku við. Þess má geta að Fréttin.is er ekki háð ríkisstyrkjum eins og ríkismiðillinn sem Sigríður starfar fyrir.

Athygli vekur að Sigríður hefur sjálf fjallað um skattalagabrot í tengslum við AirBnb útleigu og má lesa greinina hér.

Ekki náðist í Sigríði Dögg fyrir gerð fréttarinnar, þrátt fyrir ítrekaðar tilraunir.