Í Berlín hefur LGBT klúbburinn Busche verið starfandi í tæp 40 ár en nú óttast rekstrarstjórinn, Carla Pahlau, að hún verði að loka honum fyrir fullt og allt. Á tíma Þýska alþýðulýðveldisins var hann eini hinseigin klúbburinn austan Járntjaldsins. Í Busche er boðið upp á tónlist frá ýmsum tímaskeiðum, m.a. diskó, og er þar dansgólf á tveim hæðum. Fólk hefur jafnvel komið þangað frá Brandenburg, segir í nýlegri grein Bild.

Carla hefur ritað borgarstjóra Berlínar (Kai Wegner, CDU) bréf þar sem hún segir að glæpum er beinist gegn hinsegin fólki í Berlín hafi fjölgað mjög á síðustu mánuðum og í langflestum tilfellum séu afbrotamennirnir hælisleitendur frá löndum múslima og nú þegar opna skuli gistiheimili fyrir allt að 650 menn frá Tyrklandi, Afganistan og Sýrlandi hinum megin við götuna þá sjái hún ekki fram á að gestirnir þori lengur að koma.

Í greininni er haft eftir Wiebke Neumann, talsmanni SPD í hinseiginmálum, að hún sjái ekki neitt að staðsetningu þessa nýja búsetuúrræðis fyrir hælisleitendur því eftir að félagsráðgjafar hafi útskýrt þær reglur er gildi í nýja landinu þá verði ekki lengur aukin hætta á árekstrum. Ekki er þó víst að fastagestir klúbbsins hafi sömu tröllatrú á hæfileikum þýskra félagsráðgjafa og hún.

Fyrrum farfuglaheimilið á Warschauer Platz verður gistirými fyrir 650 flóttamenn - diskóið er beint á móti

Mönnum sem koma frá íslömskum löndum mun hafa verið innprentað frá barnæsku að samkynhneigð sé algjör viðbjóður (það stendur í sjaríalögum) og í hadíðunum má jafnvel finna þau fyrirmæli Spámannsins að menn er stunda mök hvor við annan skuli taka af lífi. Ólíklegt er að sú innræting hverfi við viðtal við félagsráðgjafa og Busche klúbburinn því í hættu.

Eldur Deville, formaður Samtakanna 22, hefur það á tilfinningunni að reynt sé að útrýma samkynhneigðu fólki á Vesturlöndum (rétt eins og er gert víðast hvar í heiminum). Pólitískir aktívistar hafi víðast hvar tekið yfir samtök LBG-fólks og berjist hatramlega gegn þeim sem finnst að gamla hugmyndafræðin hafi bara verið stórfín. Það kom vel í ljós á Hinsegin dögum þegar fólk sem er gamaldags hinsegin átti alls ekki að fá að halda málþing.

Þeir er stjórna nú Samtökunum 78 eru fylgjandi opnum landamærum, en eins og kom í ljós fyrir nokkrum árum er samtökin mótmæltu því við rússneska sendiráðið að Kadyrov, leiðtogi Tsjetseníu ætlaði sér að útrýma hommum og tvíkynhneigðum körlum úr samfélaginu fyrir upphaf Ramadan þá vita þeir vel að strangtrúaðir múslimar eru hreint ekki hliðhollir hinseginfólki. Samt vilja þeir fá slíka menn til landsins og þegar svo er krotað yfir regnbogamálninguna eða fánar þeirra fjarlægðir  þá kvarta þeir undan hatri í sinn garð og kalla eftir meiri peningum.

Þýski miðillinn Bild greinir frá.