Belgíska lögreglan og þýskir rannsakendur gerðu í dag áhlaup á höfuðstöðvar mið-hægriflokks Evrópska þjóðarflokksins (European People's Party, EPP) sem hluta af þýskri rannsókn. Frá því greina Reuters og fleiri erlendir miðlar í dag.
Flokkurinn, sem á flesta þingmenn á Evrópuþinginu, sagði í yfirlýsingu að fulltrúar yfirvalda frá Belgíu og Þýskalandi hefðu heimsótt höfuðstöðvar hans í Brussel á þriðjudag.
Heimsóknin tengdist rannsókn þýska sambandsríkisins Þýringalands (þ. Thüringen), segir í yfirlýsingu frá EPP, án frekari skýringa. Ekki væri hægt að gefa frekari upplýsingar þar sem rannsóknin í Þýskalandi standi yfir.
The European People’s Party confirms that representatives from the Belgian and German police authorities visited the party headquarters in Brussels today. The visit is connected to an ongoing inquiry in Thuringia, Germany.
— EPP (@EPP) April 4, 2023
Grunur um mútuþægni
Samkvæmt dagblaðinu Thüringer Allgemeine var lögregluaðgerðin í tengslum við yfirstandandi spillingarrannsókn á Mario Voigt, leiðtoga miðstjórnar Kristilegra demókrata (CDU) í Þýringalandi, vegna aðildar hans að stafrænni kosningabaráttu EPP í Evrópukosningunum 2019.
Mario Voight er grunaður um spillingu.
Mario Voigt var stafrænn kosningastjóri Manfred Weber (CSU), leiðtoga EPP, í kosningabaráttunni í Evrópu 2019. Spurningar hafa vaknað um úthlutun samnings vegna stafrænnar kosningaherferðar til fyrirtækis í Þýringalandi, samkvæmt þýskum fjölmiðlum.
Rannsóknin snýst um ásakanir um að Voigt hafi fengið endurgreiðslur frá fyrirtækinu sem fékk umræddan samning á meðan á herferðinni stóð. Frá því í september 2022 hafa þýsk yfirvöld gegn spillingu verið að rannsaka Voigt vegna gruns um mútuþægni.
Fulltrúi EPP sagði að þetta væri „mál á milli verktaka sem starfaði fyrir EPP í herferðinni 2019 og eins af undirverktökum hans í Þýskalandi.“
Elstu og valdamestu flokkasamtök ESB
EPP eru evrópsk flokkasamtök íhaldssamra flokka, sem eru aðskilin frá þingmannahópi EPP á Evrópuþinginu. Þó að einingarnar tvær heiti sama nafni, eru þær með sitthvora skrifstofuna í þinghúsinu í Brussel.
Lögfræðingar Voigt höfnuðu ásökunum saksóknara sem ástæðulausar og sögðu rannsóknina óhóflega, á meðan saksóknarar í Þýringalandi fengust ekki til að tjá sig.
EPP samanstendur af nokkrum af þekktustu stjórnmálamönnum Evrópu, þar á meðal Ursula von der Leyen, forseta framkvæmdastjórnar Evrópusambandsins, Roberta Metsola, forseta Evrópuþingsins, Kyriakos Mitsotakis, forsætisráðherra Grikklands, og Ulf Kristersson, forsætisráðherra Svíþjóðar.
EPP er með flokka í yfir 27 ESB-aðildarríkjum, og einnig utan sambandsins, svo sem á vesturhluta Balkanskaga, í Noregi, Sviss og Úkraínu.