Innviðaráðuneytið býður kjörnum fulltrúum og starfsfólki sveitarfélaga til fræðslufundar um hinsegin málefni. Samtökin ´78 sjá um fræðsluna en markmiðið er auka þekkingu sveitarstjórnarfólks á réttindum og félagslegri stöðu hinsegin fólks.

Þetta kemur fram í tölvupósti frá ráðuneytinu þar sem segir að þetta sé í annað sinn sem ráðuneytið stendur fyrir slíkri fræðslu og að verkefnið er liður í aðgerðaáætlun í málefnum hinsegin fólks fyrir árin 2022-2025. Í áætluninni segir að  varið verði 40 milljónum kr. samtals til verkefna sem styðja við málefni hinsegin fólks á vegum ráðuneyta á tímabilinu.

Í póstinum segir að hinsegin fólk þurfi að eiga greiða leið að þjónustu í sínu nærumhverfi og að þjónusta og viðmót skuli vera laust við fordóma og mismunun en bein og óbein mismunun og útilokun getur stafað af þekkingarskorti þeirra sem þjónustuna veita. Jafnframt segir í boði ráðuneytisin að til að bæta stöðuna og draga úr fordómum og þekkingarskorti sé mikilvægt að efla þekkingu kjörinna fulltrúa og starfsfólks sem sinnir þjónustu við almenning. 

Fræðslan tekur um klukkustund og er opin öllum kjörnum sveitarstjórnarfulltrúum og starfsfólki sveitarfélaga og fer fram á fjarfundi (Teams) og hægt er að velja tvær tímasetningar, þriðjudaginn 2. maí eða miðvikudaginn 3. maí kl. 16.

Ráðuneytið hvetur til þess að viðburðurinn sé kynntur meðal starfsfólks sveitarfélaganna og kjörinna sveitarstjórnarfulltrúa, ýmist á innri vef eða með því að áframsenda póstinn.

Fróðlegt verður að sækja fundinn og heyra hvað þar er í sambandi við réttindi og stöðu hinsegin fólks sem kallar á sérstakan fræðslufund um málefnið.

Auglýsingu um viðburðinn má sjá hér: