Ingibjörg Gísladóttir skrifar:

Viðbrögðin við fjöldamorðunum í Ísrael hinn 7. október hafa komið mörgum á óvart. Í stað þess að einfaldlega fordæma þau, eins og gert var í dæmi Breivik, þá hafa stigið fram á Vesturlöndum hópar sem ýmist fagna þeim eða bera blak af Hamas.

Hópar Palestínumanna fögnuðu víða. Í Sydney, Ástralíu hafði óperuhúsið verið lýst upp í fánalitum Ísraels en um 1000 manna hópur mætti með palestínska fánann og söng „Gas the Jews" og „F*ck the Jews". Yfirvöldum var brugðið; þetta væri ekki sú fjölmenning sem stefnt væri að í Ástralíu.

Fögnuðu morðum og mannránum

Samdægurs fóru Palestínumenn víða út á göturnar til að fagna morðum og mannránum á almennum borgurum. Samnýtt sýndi hinn 8. október slíkar myndir frá Helsingborg, Malmö og Växjö í Svíþjóð og frá Birmingham, Rotterdam, Berlín og London. Hvar er þetta Evró-íslam sem mönnum var lofað? Stórir hópar innflytjenda hafa greinilega tekið jíhadið með sér. Jíhad er skilgreint svo í sjaríalögbókinni Reliance of the Traveller, sem er í gildi í Palestínu: Jíhad merkir að fara í stríð gegn þeim sem ekki eru múslimar ... og það er hið minna jíhad.

Í Chicago setti BLM fram stuðningsyfirlýsingu við Hamas með mynd sem sýndi mann á svifvæng með palestínska fánann áfestann. Undir myndinni stóð „Við stöndum með Palestínu". Að meðlimir BLM dýrki ofbeldi ætti ekki að koma á óvart, svo sem. Eitt átrúnaðargoða þeirra er Assata Shakur sem drap ungan þjóðvarðliða með köldu blóði 1977 og flýði til Kúbu

Í New York héldu Democratic Socialists of America göngu til stuðnings Palestínu. Um 1000 manns mættu skv. Politico sem segir að menn hafi kyrjað „Hernumið fólk hefur rétt til andspyrnu".

Gaza hernumið af Hamas

Langflestir Demókratar fordæmdu þó göngumenn. Ritchie Torres, fulltrúi Bronx sagði á X: „NYC-DSA sýnir sitt rétta andlit sem andgyðinglegur blettur á sál stærstu borgar Ameríku. Það er sérstakur staður í Helvíti frátekinn fyrir þá er upphefja kaldrifjuð morð á almennum borgurum og börnum". Það hafa annars engir ísraelskir hermenn verið á Gaza frá 2005, Gaza er nú hernumið af Hamas.

Meðlimir Fatah, samtaka Abbas opinbers leiðtoga Palestínumanna, hafa ekki heldur samúð með myrtu fólki í Ísrael. Palwatch.org birtir videó frá einni deild Fatah þar sem má m.a. sjá hermann svífandi yfir korti af Ísrael og mynd þar sem skór í fánalitum Palestínu kremur litla rottu er liggur á bakinu. 

Bandaríska pressan hefur sýnt misjöfn viðbrögð. Andrea Mitchell hjá MSNBS var t.d. ótrúlega smekklaus er hún var með hjá sér í viðtali konu vegna þess að Hamas hafði rænt ungum sonum hennar og spurði hana hvort hún hefði samúð með fólkinu á Gaza. Anderson Cooper (CNN) var hins vegar mjög nærgætinn og skilningsríkur er hann ræddi við móður Shani Louk, ungu konunnar sem Hamasliðar keyrðu um hálfnakta og meðvitundarlausa á bílpalli og Jake Tapper á CNN sagði hinn 11. október, fimm dögum eftir árásina að „þessir síðustu dagar hefðu virkilega opnað augu margra - margra Demókrata, margra Umbótasinna (progressives) - fyrir gyðingahatri vinstri manna".