Ingibjörg Gísladóttir skrifar:
Skoðanakönnun er gerð var á vegum Birzeit háskólans eftir innrás Hamas í Ísrael sýnir yfirgnæfandi stuðning Palestínumanna við ódæðisverkin. Á Vesturbakkanum studdu 83.1% svarenda innrásina en 63.6% íbúa Gaza. Í heildina studdu meira en 75% Palestínumanna innrásina en 74.7% studdu palestínskt ríki „frá ánni til sjávar," þ.e.útþurrkun Ísraels. Nær enginn munur var á svörum karla og kvenna. Þessar tölur fá stuðning af myndböndum er árásarmennirnir sjálfir tóku og sýna fölskvalausa gleði þeirra vegna drápanna og margir almennir borgarar eru taldir hafa tekið þátt í ránum og morðum á samyrkjubúunum í Negev eyðimörkinni.
Önnur könnun gerð af Palestinian Center for Policy and Survey Research í mars á þessu ári sýndi að nær 70% Palestínumanna styddu að hryðjuverkasveitir myndu vopnbúast til að ráðast gegn Ísraelsríki. Sem sagt mikill stuðningur við þriðju Intíföduna, þótt þær fyrri hafi ekki skilað þeim neinu nema mannfalli (píslarvætti), aðskilnaðarveggjum og ferðatakmörkunum.
Í júlí kom út skoðanakönnun á vegum Washington Institute sem sýndi að 62% Gazabúa vildi að vopnahlé Hamas við Ísrael héldi og helmingur (50%) vildi að Hamas hætti að kalla eftir eyðingu Ísraels en myndi samþykkja varanlega tveggja ríkja lausn, byggða á landamærunum 1967. Hamas nýtur ekki mikilla vinsælda þar samkvæmt þessarri könnun því 70% aðspurðra vildi frekar að Palestínska heimastjórnin tæki við stjórnartaumum á Gaza. Heyrst hefur að Hamas hafi viljað afla sér stuðnings með innrásinni en fátt bendir til að Íranir eða Líbanir komi þeim til hjálpar og Jemen er of langt í burtu.
Vinsældir Hamas og Hezbollah dala
Vinsældir Hamas meðal helstu arabaríkja virðast í frjálsu falli. Í grein Washington Institute (Fikra Forum) segir að stuðningur við Hamas í Sameinuðu arabísku furstadæmunum hafi verið kominn niður í 17% í ágúst á þessu ári og í 10% hjá Sádum en 48% þeirra höfðu mjög neikvæða sýn á Hamas. Stuðningur við þá fellur líka í Katar, Bahrein og Egyptalandi og hefur fallið enn meira í Jórdaníu.
Hezbollah, hinn sjálfskipaði verndari Palestínumanna, verður líka stöðugt óvinsælli meðal arabaríkja en innan við 10% studdu þá árið 2020 í Egyptalandi, Jórdaníu, Kúwait, Katar, S-Arabíu og í Furstadæmunum. Jafnvel í Líbanon hefur stuðningur við þá fallið jafnt og þétt, úr 50% árið 2017 í 34% er hann var mældur síðast 2020. Tiltölulega fáir íbúar arabaríkjanna telja að góð samskipti við Íran (helsta stuðningsaðila Hamas) skipti máli, eða 19% Sáda og 17% íbúa Furstaríkjanna, skv. síðustu könnun.
Hatursinnræting í skólum UNRWA
Íbúum Arabaríkjanna virðist líka betur við Ísraela en Palestínumenn. Þau virðast hafa lagt jíhadið til hliðar, a.m.k. í bili, en palestínskum börnum er enn innrætt jíhad og gyðingahatur í skólum UNRWA. Frá 2017 hafa komið út skýrslur frá UNWatch og IMPACT-SE um að kennsla hjá UNRWA sé hreint ekki í lagi, kyndi undir hatri í stað þess að hvetja til friðsamlegra lausna og eitri hug palestínskra barna. Bent hefur verið á að margir kennaranna hvetji til hryðjuverka og kennslubókunum standi að gyðingar hafi engan rétt til að búa í Palestínu; því afneitað að þeir eigi þar helga staði, s.s. Grafhýsi ættfeðranna í Hebron, og Ísrael ekki sýnt á landakortum.
Ný skýrsla frá IMPACT-SE var kynnt fyrir Bandaríkjaþingi fyrr í þessum mánuði. Þar segir að sjá megi skýr tengsl á milli kennslu í skólum UNRWA og fjöldamorðanna hinn 7 október. Í henni segir að 58% af því fé er rennur til UNRWA fari til menntamála og kennslubækur útgefnar af Palestínsku heimastjórninni séu notaðar bæði á Gaza, á Vesturbakkanum og í Austur Jerúsalem. Þar segir að ekkert hafi breyst: Enn sé í bókunum gyðingahatur og hvatt til ofbeldis, jíhads og píslarvættisdauða en ekki minnst á að friður sé æskilegur, eða jafnvel mögulegur kostur. Öfga þjóðernisstefna og íslömsk hugmyndafræði sé rauði þráðurinn í námsefninu, jafnvel í kennslu í stærðfræði og vísindagreinum.
Eitt dæmið í skýrslunni um óæskilegt kennsluefni er lesskilningsverkefni fyrir 9 bekk þar sem eldsprengjuárás á strætisvagn í Ísrael er lýst sem „grillveislu" og annað dæmi frá Gaza er að fimmtu bekkingum sé kennt að dáðst að Dalal Mughrabi, þekktu hryðjuverkakvendi.
Biðlað til Bandaríkjamanna
Forstöðumaður IMPACT-SE, Marcus Sheff, krefst þess að fjármögnun UNRWA skólanna sé gerð háð því að hatursinnrætingu sé hætt og þar sem Bandaríkin séu stærsti stuðningsaðilinn þá geti þau haft áhrif. Haft er eftir honum í greininni að ESB hafi fordæmt UNRWA og Palestínsku heimastjórnina fimm sinnum fyrir að kenna hatur og sum Evrópuþing hafi sent inn kvörtun til Heimastjórnarinnar og UNRWA og ýmist hætt að borga eða fryst framlögin.
Samkvæmt Morgunblaðinu, hinn 14. nóvember, höfum við Íslendingar sent tæpa tvo milljarða til Palestínu frá 2011 og hafi féð aðallega farið til UNRWA. Við höfum sem sagt trúlega eytt milljarði í að kenna palestínskum börnum að hata gyðinga en að elska jíhad og píslarvættisdauða og í stað þess að segja UNRWA til syndanna þá ætlum við að auka við framlögin næstu árin. Friðelskandi þjóð? Gyðingahatur meðal Íslendinga (innræting RÚV) er pínlega augljóst. Ef til vill kemur að því að gyðingahatur mælist lægra hjá Sádum en okkur. Það væri nú saga til næsta bæjar.
