Gústaf Skúlason skrifar:

Íbúar í Evrópu hafa séð, hvernig hömlulaus fólksinnflutningur hefur gjörbreytt heimalöndum þeirra undanfarin 30 ár. Nú hótar heimsendaspámaðurinn og fv. varaforseti Bandaríkjanna, Al Gore, að minnsta kosti einum milljarði loftslagsflóttamanna til viðbótar við aðra flóttamenn, nema að löndin falli á kné fyrir honum og kasti peningum í grænu tækin hans.

Það er enginn vafi á því að hinn mikli fólksinnflutningur til Evrópu hefur leitt til þess að löndin hafa gerbreyst. Það er heldur ekkert launungarmál að meirihluti fólks í Evrópu telur hömlulausan innflutning hafa gengið of langt.

Flóttamenn undanfari pópúlisma og einræðisstjórna

Fyrrum varaforseti Bandaríkjanna, Al Gore, hótar því núna, að milljarður „loftslagsflóttamanna“ muni myndast ef heimurinn bregst ekki skjótt við og stöðvi meinta loftslagsógn. Gore segir við CNN:

„Ef við bregðumst ekki við, þá gæti að mati vísindamanna allt að milljarður loftslagsflóttamanna farið yfir landamæri á næstu áratugum. Nokkrar milljónir flóttamanna hafa lagt sitt af mörkum til öldu af pópúlisma og einræðisstjórnum, svo hvað myndi þá ekki milljarður þeirra gera? Við ráðum ekki við það. Við myndum missa möguleikann á sjálfstjórn.“

Málar upp hættuna á auknu ofbeldi

António Guterres, framkvæmdastjóri Sameinuðu þjóðanna, hefur áður sagt að „loftslagsbreytingar séu vaxandi ógn við frið og velmegun.“ Helena Lagercrantz, talsmaður Svíþjóðar og Finnlands hjá flóttamannastofnun Sameinuðu þjóðanna UNHCR, segir samkvæmt Expressen:

„Við vitum að við eigum á hættu að sjá aukið ofbeldi vegna minnkandi velmegunar og að það knýr flóttamannastraumana áfram. Einnig er hætta á, að loftslagskreppan leiði til aukinnar félagslegrar spennu og kyndi undir þau átök sem þegar eru til staðar.“

Að sögn Lagercrantz munu 70% allra loftslagsflóttamanna koma frá löndum eins og Afganistan, Kongó, Sýrlandi og Jemen. Lagercrantz segir:

„Við verðum einfaldlega að bregðast við, ef við viljum forðast stóran straum flóttamanna í framtíðinni.“

Loftslagspostular reyna að hræða fólk til hlýðni

Loftslagsspámenn og fjármálaelítan vita, að íbúar Evrópu eru orðnir þreyttir á öllum fólksinnflutningnum og óttast framhaldið. Vindar hafa breyst og að sífellt fleiri gera sér grein fyrir vandanum. Núna er sá kvíði notaður af páfum eins og Al Gore til að grenja út meiri græna peninga úr vasa skattgreiðenda á Vesturlöndum. Boðskapur Guterres forstjóra Sameinuðu þjóðanna er, ef þið greiðið ekki meiri peninga munuð þið stikna í helvíti. Boðskapur Al Gore er: Ef þið borgið okkur ekki óteljandi milljarða króna til að koma í veg fyrir heimsendi af völdum hamfarahlýnunar, þá munu lönd ykkar verða yfirfull af loftslagsflóttamönnum frá löndum sem við vitum, að þið hafið slæma reynslu af.