Björn Bjarnason skrifar:
Þórdís Kolbrún Reykfjörð Gylfadóttir, fjármála- og efnahagsráðherra, komst vel að orði þegar hún sagði mánudaginn 22. janúar að aðgerðir ríkisstjórnarinnar vegna Grindvíkinga miðuðu að því að færa óvissu af eignatjóni og vegna framtíðar byggðar í Grindavík frá íbúunum sem yfirgefið hafa heimili sín og eignir yfir á ríkisvaldið.
Enginn veit enn með vissu hvað felst í þessari skuldbindingu. Allir vona að aftur verði búseta og blómlegt atvinnulíf í bæjarfélaginu. Óvissa verður hins vegar áfram og mikilvægt er að minnka áhyggjur vegna hennar sem best.
Það væri með öllu ábyrgðarlaust af ríkisstjórn og alþingi að láta eins og fjárhagslegar skuldbindingar vegna þessarar ákvörðunar stjórnvalda hefðu ekki almenn áhrif á fjárhagslega getu ríkissjóðs. Bjarni Benediktsson, utanríkisráðherra og fyrrv. fjármála- og efnahagsráðherra, benti á þetta augljósa samhengi hlutanna og þar með tilmæli til ríkisins um að grípa til millifærslna vegna kjarasamninga sem nú eru á döfinni.
Hér eru stjórnmálamenn að ræða um ráðstöfun á skattfé almennings og hvernig forgangsraða beri nýtingu þess. Hvort sem tekið verður lán eða leitað annarra úrræða til að tryggja greiðslugetu ríkissjóðs lendir reikningurinn að lokum á skattgreiðendum.
Fréttamaðurinn gaf sér ranga forsendu og bjó til ágreining úr orðum Bjarna. Til hvers? Til að fá „frétt“? Til að sverta Bjarna eða koma illu af stað í kjaraviðræðunum? Til að setja lausn á vanda Grindvíkinga í sömu skúffu og kjaramálin eins og Ragnar Þór gerði?
Í Morgunblaðinu í dag er leitað álits verkalýðsforingja á orðum Bjarna Benediktssonar. Í fréttinni segir:
„Sólveig Anna [Jónsdóttir. formaður Eflingar] segir að þessi ummæli hafi ekki spillt fyrir samtalinu sem breiðfylkingin eigi við Samtök atvinnulífsins.“
Og einnig:
„Vilhjálmur [Birgisson, formaður Starfsgreinasambandsins] er ekki þeirrar skoðunar að ummæli Bjarna hafi verið olía á eldinn. „Við lítum svo á að ávinningur ríkissjóðs af því að þetta verkefni [gerð kjarasamninga] takist skili sér margfalt til baka.“
Hér skal áréttuð ábendingin um að gefi fréttamenn viðmælendum sínum rangar forsendur verður niðurstaðan röng og fréttin marklaus.
One Comment on “Dæmi um hannaða frétt”
Það er fallegt að lesa fagurgalan eftir þig Björn Bjarnason um frímúrara systkini þín hana Kolbrúnu og Bjarna.
Fyrst þú ert að fagurgala upp innihaldslaus loforðin hennar Kolbrúnar þá ætti ég að minna þig á að það væri nú gott að hafa aðgang að fjáraustinu sem hún Kolbrún sendi til þjóðernissinnans og vinar ykkar hans Volodymyr Zelenskyy á undanförnum árum til að tryggja áframhaldandi einræði vina ykkar fyrir vestan álinn á heiminum, eða kannski væri fínt að hafa fjármagnið úr hamfarasjóðunum sem gufaði upp og eingin veit um aða hefur áhuga á að leita af sem af sjáfsögðu hvarf á vakt sömu aðila og þú ert að lofsama hér að ofan?
Þú Björn Bjarnason talar um „hannaða frétt“
Það er stundum talað um að skjóta sig í fótinn, þetta sem hann Björn Bjarnason er að skrifa kalla ég að sprengja undan sér báða fæturna!
Björn Bjarnason er „hannaður spillingarstjónmálamaður“ úr smiðju sjálftökufólksins sem hefur stjórnað Íslandi með harðri hendi meira og minna frá lýðveldisstofnun.
Ég held að þér Björn Bjarnason væri nær að hafa hendurnar á þér bara í vösunum enn ekki á lyklaborðinu til að ausa þínum innihaldslausa áróðri sem gerir engum venjulegum manni gagn.