Knattspyrnusamband Kosovo tilkynnti um helgina að knattspyrnu-og unglingalandsliðsmaðurinn Erion Kajtazi væri látinn.
Kajtazi sem var 17 ára hneig meðvitundarlaus niður í leik með Trepca á laugardag og er dánarorsök sögð hjartaáfall. Leikmaðurinn þótti afar efnilegur og hafði leikið átta leiki fyrir U17 ára landslið þjóðar sinnar og einnig æft með liðum á borð við Anderlecht í Belgíu.
Hjúkrunarteymið brást fljótt við á vellinum og sendi Kajtazi á svæðissjúkrahúsið í Prizren en endurlífgunartilraunir báru engan árangur og var hann úrskurðaður látinn.
Knattspyrnusamband Kosovo vottaði fjölskyldu Kajtazi, FC Trepça'89 og öllu fótboltasamfélaginu innilegrar samúðar vegna ótímabærs dauða leikmannsins.