Helgina 15. - 17. apríl fór fram ráðstefna í Stavanger í Noregi þar sem meðal ræðumanna var breski þingmaðurinn Andrew Bridgen.  Bridgen var kjörinn á þing fyrir Íhaldsflokkinn sem er nú með hreinan meirihluta á þingi. Í janúar sl. var honum tímabundið vikið úr flokknum fyrir að tala um bóluefnaskaða og dauðsföll af völdum Covid sprautanna.

Margrét Friðriksdóttir, ritstjóri Fréttarinnar, hitti Bridgen og náði óvæntu spjalli við hann sem tekið var upp á síma og sjá má hér neðar.

Hætt við bólusetningu smábarna eftir þingræðu Bridgen

Bridgen, sem er menntaður í vísindum og veirufræðum, sagði að þann 13. desember sl. hafi hann viðrað áhyggjur sínar í þingsal eftir að að Lyfja-og heilbrigðiseftirlitið (MHRA) í Bretlandi hafði óskað eftir því við þingið að Covid bóluefnin yrðu líka gefin smábörnum niður í 6 mánaða aldur. Bridgen sagði að börnunum stafaði engin hætta af Covid en töluverð hætta af tilraunaefninu, auk þess sem bóluefnin yllu meiri skaða en ávinningi og vísaði hann í rannsóknargögn Pfizer sem halda átti leyndum í 75 ár.  Bridgen sagði síðar í spjallinu að eftir þessa ræðu hans í þinginu vildu BBC eða aðrir helstu fjölmiðlar ekki lengur taka hann í viðtal, hann væri kominn á „svartan lista“ hjá þeim.

„Og það vildi svo vel til að ríkisstjórnin lét ekki verða af þessari áætlun með börnin, en snemma í janúar setti ég inn færslu á Twitter og skrifaði:  Eins og einn hjartalæknir sagði við mig, þetta [Covid bólusetningar] er stærsti glæpur frá því að helförin átti sér stað.

Leiðtogar Íhaldsflokksins sögðu þetta vera gyðinga-og kynþáttahatur og hentu mér úr flokknum,“ sagði þingmaðurinn með bros á vör.

Umframdauðsföll og WHO „faraldurssáttmálinn“

Bridgen segir umframdauðsföll í Bretlandi nú vera 21% yfir meðaltali síðustu fimm ára og á hefði engin skýring verið gefin. Hann hafi í marga mánuði óskað eftir umræðu um málið í þinginu en enginn vill ræða það. Hann hefur einnig óskað eftir umræðu um „faraldurssáttmála“ Alþjóðaheilbrigðisstofnunarinnar (WHO) sem snertir öll aðildarríki og eina ástæðan fyrir því að að málið komst á dagskrá er vegna þess að yfir 150 þúsund manns skrifuðu undir áskorun um að málið færi fyrir þingið.

Aðspurður hvort honum þætti ekki undarlegt að menn vildu ekki ræða þessi mál sagði hann að „þögnin um þessi mikilvægu mál væri meira smitandi en sjálf veiran og ég vonast nú til að hugrekkið verði jafn smitandi. Við þurfum fleiri vísindamenn, lækna og stjórnmálamenn til að stíga fram og ræða þessi mál og fólkið þráir leiðtoga sem það getur treyst.“

Bridgen segir að aðeins tveir þingmenn af 650 í breska þinginu hafi stigið fram og rætt um skaðann tengdan bóluefnunum, en margir þingmenn úr öðrum flokkum hefðu gefið sig á tal við hann og sagt hann hafa rétt fyrir sér, en aðeins í einrúmi, og það væri langur vegur frá því og að hafa kjark til að stíga fram í þinginu eða sjónvarpi og ræða málin.

Einmanalegt í þinginu og erfið staða fjölmiðla

„Þingið er hræðilegur staður fyrir mig að vera á eins og er, fáir tala við mig, en huggunin er sú að þar eru um 4000 starfsmenn, venjulegt fólk; öryggisverðir, kokkar og hreingerningafólk sem talar alltaf við mig og þakkar mér fyrir það sem ég er að gera, og það gerir starfið bærilegra. Það sama á við um ókunnugt fólk sem ég hitti úti á götu“, sagði þingmaðurinn.

Bridgen segir mikla gjá vera milli þings og þjóðar og einnig helstu fjölmiðla og þjóðarinnar „og ég held að fjölmiðlar eigi ekki eftir að ná sér eftir þetta og þeir eiga það heldur ekki skilið,“ bætti hann við.

Varðandi fjölmiðla segir hann að okkur hafi verið seld sú hugmynd að við hefðum frjálsa fjölmiðla sem myndu rannsaka málin, en það er ekki satt og benti á að við værum að horfa upp á „Kínavæðingu,“ og ef við tökum ekki til okkar ráða þá verði hér ekkert lýðræði.

Blair vill taka við af Klaus Schwab

Bridgen segir að Tony Blair, fyrrum forsætisráðherra, vildi taka við stöðu framkvæmdastjóra af Klaus Schwab í Alþjóðaefnahagsráðinu (World Economic Forum - WEF). Hann sagði fólk tala um samsæriskenningu þegar bent væri á völd WEF, þar sem ríkasta fólk og helstu fyrirtæki heims ráða för „en sjáið til, þegar Klaus Schwab lýsir heimssýn sinni, þá hlaupa allar ríkisstjórnir til og innleiða stefnurnar, hvort sem það eru stafrænir gjaldmiðlar, stafræn vegabréf, heilsupassar, 15 mínútna borgir eða annað. Þetta eru ókjörnir fulltrúar sem hafa engu ábyrgðarhlutverki að gegna gagnvart fólkinu, þeir tala um hagsmunaaðila fyrirtækja og stilla sér upp með ríkisstjórnum. Þetta er í grundvallaratriðum fasismi,“ sagði þingmaðurinn.

Bridgen talar um Sameinuðu þjóðirnar og Alþjóðaheilbrigðisstofnunina sem heimsstjórn og að „stóru tapararnir“ yrði almenningur sem verið væri að gera að verslunarvöru. Og hvað nýju heimsblokkina BRICS [Brasilía, Rússland, Indland, Kína og Suður-Ameríka] varðar tók hann Macron Frakklandsforseta sem dæmi sem sagði fyrr í mánuðinum að við þyrftum að fjarlægja okkur frá dollaranum, þannig að m.a.s. hann er að snúa baki við Biden. Og þegar það verður enginn „petdrodollar“ (notkun á dollar í heimsviðskiptum á olíu og almennt sem forðamyntar heimsins) þá mun það hafa gríðarlega áhrif á efnahag og verðbólgu í Bandaríkjunum.

Snýst ekki lengur um hægri og vinstri pólitík

Bridgen, segir að „deila og drottna“ stefnan væri áberandi í heiminum; árás á fjölskylduna, karlmönnum stillt upp gegn konum, svörtum gegn hvítum, ólíkum trúarbrögðum gegn hvert öðru. Við þurfum að brjótast í gegnum þetta allt saman, því þetta er árás á mannkynið, á okkur öll og við verðum að vinna slaginn. Og þetta snýst ekkert um hægri og vinstri pólitík lengur. „Ég er hægra megin í pólitík, sumir myndu segja lengst til hægri, vilji þeir sýna mér vanvirðingu, en ég á líka stuðningsfólk sem er til vinstri, því það veit að þetta snýst ekki um hægri og vinstri lengur heldur rétt og rangt.“

Hlutfall aukaverkana mjög hátt

Bridgen minntist á bresku fjölmiðlasamsteypuna BBC og að sumir starfsmenn þeirra hafi dáið strax eftir Covid-bólusetningar, jafnvel útvarps-og sjónvarpsfólk, til dæmis Liza Shaw, en samt reynir fréttastöðin að gera lítið úr því og segir blóðtappa af völdum bóluefnisins „vera mjög, mjög sjaldgæfa“, en þeir eru ekki mjög sjaldgæfir. „Ég fékk sjálfur tvo skammta af Astra Zeneca og fékk aukaverkanir. Astra Zeneca var svo slæmt að þeir tóku það hljóðlega úr umferð, án þess að segja nokkuð. En það má ekki gagnrýna Pfizer eða Moderna, en öll gögn sem ég hef kynnt fyrir þinginu sýna að a.m.k. einn af hverjum 990 fái alvarlegar aukaverkanir eftir Pfizer örvunarskammt, dauðsföll þar á meðal, og Moderna er enn verra, þar er hlutfallið einn af hverjum 662.“

„Það er ótrúlegt hversu margir heilbrigðisráðherrar í faraldrinum vilja ekki lengur vera á þingi. Við grínumst með það að kannski vilji þeir verja meiri tíma með óútskýrðum auðæfum sínum,“ sagði Bridgen og hló.

Draga þarf til ábyrgðar þá sem stóðu fyrir bólusetningunum

Margrét spurði þingmanninn hvort hann ætli að flytja sig yfir í annan flokk eða kannski stofna sinn eigin. „Sjáum til, það verður fundur á næstunni þar sem ákveðið verður hvort flokkurinn muni henda mér út fyrir fullt og allt. Staðreyndin er sú að þeir hafa enga ástæðu til að henda mér út, öll vísindin eru mér í hag og ég held að enginn muni koma fram með einhverja skýrslu núna og segja að bóluefnin séu þrátt fyrir allt „örugg og áhrifarík.“ Ef þeir halda að ég muni segja það, þá hafa þeir rangt fyrir sér, ég mun ekki biðjast afsökunar á neinu sem ég hef sagt, öll mín gögn munu sýna að það sem ég hef sagt er rétt og hvað varðar bóluefnaskaða og dauða þá hef ég gert mitt til að minnka skaðann meðal fólksins. (Þess má geta að Bridgen var endanalega rekinn úr Íhaldsflokknum í gær 26. apríl).

Í sumar verðum við í allt annarri stöðu hvað þetta varðar, upplýsingarnar eru að berast hraðar og hraðar þessa dagana, á veldishraða. Fólk er að vakna, ég tel að hlutfallið í Bretland sé um 15-20%, og það mun hratt fara í 40%, og þegar fólk uppgötvar hvað er búið að gera því og öðrum þá splundrast sýn þeirra á hvernig heimurinn virkar. Allar stofnanirnar sem settar eru á fót til að verja fólkið brugðust illilega, það þarf uppgjör og þeir sem stóðu meðvitað fyrir þessu verður að draga til ábyrgðar.“

Myndi láta handataka Bill Gates

Bridgen segir: „Væri ég forsætisráðherra og Bill Gates stigi fæti á landið okkar, myndi ég láta handtaka hann. Gates er maður sem getur fengið allt sem hann vill, þegar hann vill, þannig að hvert var aðdráttarafl "Epstein Island" fyrir honum, hann fór þangað margoft? Hvers vegna er þessi maður að ráðleggja okkur um heilbrigði og vísindi? BBC leyfði honum að þrýsta á bólusetningar á sama tíma og hann var einn helsti fjárfestir í bóluefnunum. Síðan selur hann stóran hlut af bréfum sínum fyrir u.þ.b. átta vikum og innleysti gríðarlega hagnað. Hann mætir svo aftur í sjónvarpið og segir að bóluefnin hafi ekki virkað það vel og að nú þurfum við betri bóluefni. Ég held að það sé eitthvað mjög mikið að honum, hann hafi jafnvel flogið of nálægt sólinni [sem hann vill reyna að dempa til að draga úr hlýnun jarðar], segir hann hlæjandi.

Hlakkar til að heimsækja Ísland

Bridgen segist hlakka til að heimsækja Ísland sem hann sagði vera „frjálst og lýðræðislegt,“ og fagnaði því ef hægt væri að halda svipaða ráðstefnu hérlendis eins og í Stavanger.

Það hvort Ísland væri eitthvað frjálsara og lýðræðislegra en til dæmis Bretland var ekki rætt frekar að þessu sinni.

Í lokin

Þingmenn eins og Bridgen eru ekki einsdæmi í veröldinni. Á Íslandi stigu margir fram, en þó engir þingmenn, og vöruðu við afleiðingum sóttvarnaraðgerða af ýmsu tagi en hlutu litlar undirtektir. Varúðarorð þess fólks hafa svo sannarlega ræst í dag, því miður. Núna blasir við að uppgjör þarf að eiga sér stað svo mistök fortíðar endurtaki sig ekki í framtíðinni.