Hrönn Sigurðardóttir, fitnesskona og eigandi BeFit Iceland, sem var greind með mjög sjaldgæft krabbamein í maí á síðasta ári er látin. Eiginmaður hennar Sæmundur Bæringsson tilkynnti þetta nú í morgun.

„Ástkær eiginkona mín Hrönn Sigurðardóttir er látin einungis 44 ára gömul eftir gríðarlega erfiða baráttu við íllvigt krabbamein. Hún barðist eins og ljón fram á síðustu stundu eins og henni var einni lagið en gat ekki meir.“

Hrönn var nýlega í ítarlegu viðtali hjá DV þar sem hún sagði sögu sína. Hún sagði mikinn seinagang hafa verið í heilbrigðiskerfinu áður en hún fékk að vita um veikindin. Hún var í fyrstu send heim og sögð vera við góða heilsu. Í maí 2022 varð hún síðan fyrir miklu áfalli þegar hún greindist með krabbamein í nýrnahettum. Fyrir þann tíma sagðist hún hafa fundið fyrir einkennum og hafi byrjað að leita sér læknishjálpar í nóvember 2021. Hrönn átti að byrja í lyfjameðferð í janúar 2023, en ákvað heldur að fara í annars konar meðferð í Danmörku.

Hrönn var fyrir stuttu flutt mjög veik út til Spánar þar sem hún átti að gangast undir stofnfrumumeðferð.

Hrönn lætur eftir sig fjögur börn.

Fréttin sendir aðstandendum Hrannar innilegar samúðarkveðjur.