Kristján Hreinsson skrifar:

Hallarbylting BDSM fólks breytti Samtökunum ´78. Skyndilega var ráðandi afl í samtökunum sá hópur sem lítur á blæti sem eðlilega kynhneigð. Þessi hluti samtakanna hefur náð að kljúfa þau í herðar niður. Margt hinsegin fólk hefur yfirgefið samtökin og hinn þegjandi meirihluti samfélagsins þorir ekki annað en trúa því að það sé bara allt í lagi að leyfa ómenntuðum kennurum að kenna fag sem hefur nánast engan vísindalegan grunn.

Hinn þegjandi meirihluti

Hinn þegjandi meirihluti leyfir Samtökunum ´78 að kenna börnum að kynin séu mörg, að blæti sé eðlilegt kynlíf, að bindingar, drottnun, sadómasókistaleikir og munalosti verði að teljast eðlilegt kynlíf, að kvalalosti sé bara eðlilegur. Því er logið að börnum að alltaf sé verið að ráðast á hinsegin fólk, að hinsegin fólk eigi undir högg að sækja, að hinsegin fólk verði að berjast fyrir mannréttindum. Hið sanna er að öll þessi þvæla snýst um kynréttindi. Þetta snýst allt um að einstaklingur ráði því sjálfur hvaða kyni hann tilheyrir og þetta snýst um að leyfa hinsegin fólki að ráða ferðinni. Við verðum að leyfa hinsegin fólki að flagga fánanum sínum, við verðum að leyfa þessu fólki að fá forgang í formi sérréttinda, vegna þess að þetta fólk á svo svakalega, gasalega bágt.

Sem betur fer eru ekki allir Íslendingar svo skyni skroppnir að þeir hafa einungis rænu til að yppa öxlum. Enn er til fólk sem mótmælir þeim þvættingi sem hallarbyltingin í Samtökunum ´78 hefur skilað. Síðustu vikurnar hef ég frétt af foreldrum sem vilja fá skýr svör frá yfirvöldum og forsvarsmönnum skólamála víða um land. Ég hef frétt af fólki sem sent hefur tilteknum embættismönnum spurningar eins og: Er hinsegin fræðsla hluti af starfsáætlun og skólanámskrá grunnskóla? Er það hluti af skólastefnu að kenna börnum að BDSM sé eðlilegt kynlíf? Hafa kennarar og skólastjórnendur grunnskóla frjálsar hendur með það hvernig hugtakið „kyn“ er skilgreint og hvernig hugmyndir um kyn eru kenndar í grunnskóla?

Yfirvöld vilja ekki svara

Þeir sem ég veit að hafa sent yfirvöldum svona spurningar hafa allir verið hundsaðir. Yfirvöld vilja ekki svara. Enda kemur það skýrt fram á heimasíðu hinsegin fólks eða atilo.is að um loddaraskap er að ræða. Þar stendur þetta: „Þessi vefsíða er ekki ritrýnd og henni er ekki ætlað að vera fræðilegs eðlis. Hún lýtur því ekki fræðilegum kröfum þegar kemur að heimildanotkun. Þegar við á er vísað í þær heimildir sem byggt var á við gerð textans. Þegar heimilda er ekki getið er það almennt vegna þess að þekkingin liggur enn einkum hjá grasrótinni. Það þýðir að þekkingin ferðast um munnlega, á samfélagsmiðlum, verður til á fundum grasrótarfélaga og svo framvegis. Þetta á til dæmis við um skilgreiningar á hugtökum sem tengjast sjálfsmyndinni. Þessi þekking er mikilvæg og undirstaða allrar fræðilegrar þekkingar.“

Góðir hálsar, þarna er að finna kjarna þess „námsefnis“ sem lagt er til grundvallar hinni svokölluðu hinsegin fræðslu. Ykkur finnst þetta kannski bara allt í lagi. Leyfum hinsegin fólki að kenna börnunum okkar þvælu, þau munu hvort eð er þurfa að umgangast þvælu á vegi lífsins.

Margur engan sóma sér

og seint mun óvit þverra

ef til að bæta bölið hér

skal bent á annað verra.