Grunnskólar um land allt hafa verið að senda tölvupósta fyrir hönd Heilsugæslunnar um bólusetningar barna 12-15 ára. Villandi upplýsingar má finna í póstunum sem sendir eru á alla foreldra en þar segir orðrétt:

"Bóluefnið sem verður notað er frá Pfizer/BioNTech og er það bóluefni sem fyrst fékk markaðsleyfi, bæði fyrir fullorðna og síðar fyrir börn á þessum aldri. Það er komin töluverð reynsla á notkun þess fyrir þennan aldurshóp erlendis og hefur gengið mjög vel.

Eins og við aðrar bólusetningar eru algengustu aukaverkanir óþægindi þar sem stungan var gerð og slappleiki/þreyta, hiti og verkir (höfuðverkur eða vöðva- og liðverkir) fyrsta sólarhringinn eftir bólusetninguna, stundum í nokkra daga. Það má nota parasetamól eða íbúprófen í skömmtum skv. fylgiseðli við þessum aukaverkunum.

Það eru líka til sjaldgæfar aukaverkanir þar sem kemur fram bólga í gollurshúsi (poki utan um hjartað) eða í hjartavöðvanum sjálfum, 2-3 vikum eftir bólusetninguna, oftast eftir seinni skammt og algengara hjá piltum en stúlkum. Þótt þessar aukaverkanir geti verið óþægilegar og jafnvel uggvekjandi, þá jafnar ástandið sig oftast með hvíld og bólgueyðandi verkjalyfjum. Ef barn fær brjóstverk, talar um skrítinn hjartslátt eða virðist andstutt í hvíld eftir bólusetninguna þarf að leita til læknis.

Það er verið að skoða hvort breytingar á tíðahring, bæði litlar eða miklar blæðingar, hafi tengsl við bólusetningu með þessu bóluefni. Stúlkur á aldrinum 12-15 ára hafa sumar þegar byrjað á blæðingum en aðrar ekki. Það er ekki víst að allar stúlkur á þessum aldri átti sig á því ef breytingar verða þar sem blæðingar eru yfirleitt óreglulegar fyrsta árið eftir að þær hefjast. Eins finnst þeim mörgum óþægilegt að ræða um slíkt og láta ekki endilega vita ef eitthvað er öðruvísi en áður. Það er því mikilvægt að þær fái upplýsingar um að það sé rétt að ræða þetta og hafi tækifæri til að gera það, ef ekki heima þá mögulega við skólahjúkrunarfræðing eða annan heilbrigðisstarfsmann."

Það sem rangt er í þessari tilkynningu skólana er að bóluefnið frá Pfizer hefur ekki fengið markaðsleyfi. Í Bandaríkjunum eru lyfin á neyðarleyfi (emergency authorization) og á Íslandi og í Evrópu eru þau á skilyrtu leyfi sem er sambærilegt við neyðarleyfi í Bandaríkjunum.

Þessar villandi upplýsingar hefur forstjóri Lyfjastofnunnar einnig staðhæft í fjölmiðlum.

Í tölvupóstum skólanna sem síðast voru sendir út í gær segir að bólusetningar hafi gengið vel án þess minnst sé á að a.m.k. sex tilkynningar um alvarlegar aukaverkanir hjá börnum hafi borist Lyfjastofnun en ein þessara alvarlegu aukaverkana er hjartavöðvabólga en hún dregur allt að helming þeirra sem greinast með hana til dauða innan fimm ára.

Til samanburðar má geta þess að ekkert barn eða ungmenni hefur þurft að leggjast inn á spítala vegna Covid.