Þorsteinn Siglaugsson skrifaði eftirfarandi pistil á bloggi sínu.

Fæddi hún þá son sinn frumgetinn, vafði hann reifum og lagði hann í jötu af því að eigi var rúm fyrir þau í gistihúsinu. (Lúk.2.7)

Mismunun fólks eftir því hvort það hefur kosið að þiggja bóluefni við Covid-19 eða ekki tekur sífellt á sig nýjar myndir.

Skammt er síðan ungum verðandi föður var meinað að vera viðstaddur fæðingu barns síns á Landspítalanum. Ástæðan var sú að foreldrarnir höfðu hvorugt þegið þriðja skammt efnisins, því aukaverkanir hinna fyrri voru svo alvarlegar að móðirin óttaðist um líf og heilsu ófædds barns síns.

Nú bregður svo við að yfir jólin er fólki sem ekki hefur þegið bóluefnin verið meinað að heimsækja ástvini á Landspítalanum. Líkt og meðfylgjandi mynd sýnir er þó enginn munur á smitum meðal þiggjenda lyfjameðferðarinnar og annarra og þar með bersýnilegt að engu minni líkur eru á að þiggjendurnir smiti aðra af pestinni.

Tilgangur þessara reglna getur því ekki verið sá að draga úr hættu á að gestir smiti sjúklinga á spítalanum. Líklegra er að tilgangurinn sé sá að þvinga þá sem ekki hafa þegið meðferðina til að þiggja hana. Vafalaust hafa þeir sem þær settu þær sérstaklega í huga það markmið að þvinga ung börn til að þiggja þessa meðferð, sem er þeim alveg gagnslaus, en áhættusöm, enda eru 75 sinnum hærri líkur á aukaverkunum vegna hennar en hefðbundinna bólusetninga við inflúensu.

Það er vel til fundið hjá stjórnendum spítalans að setja slíkar reglur á jólunum, fæðingarhátíð Jesú Krists, sem fæddist í fjárhúsi því foreldrum hans var úthýst úr gistihúsi. Þessi ákvörðun þeirra ber nefnilega svo glöggan vott um það siðferðilega gjaldþrot sem hræðsluáróðurinn og sefjunin undanfarin misseri hefur leitt af sér.

Við þessa jólahugvekju Þorsteins má bæta við að Hjálpræðisherinn þurfti að vísa 300 manns frá sem höfðu skráð sig í jólamat fyrir þessi jól vegna sóttvarnareglna. Af þeim voru 150 börn. Eins tók Mæðrastyrksnefnd Reykjavíkur upp á því að meina óbólusettum aðgang að húsnæði sínu fyrir jólin. Fólkið mátti þó sækja matarpoka utandyra.