Hæstiréttur Flórída hefur fallist á beiðni ríkisstjórans Ron DeSantis um skipun kviðdóms í Flórídaríki til að rannsaka framleiðendur mRNA Covid sprautuefna og þá hvort ástæða sé til ákæru.
DeSantis tilkynnti í desember að hann myndi óska eftir að kviðdómur rannsakaði „allar misgjörðir“ í Flórídaríki varðandi COVID-19 bóluefnaframleiðendur.
„Það er andstætt lögum að villa um og veita rangar upplýsingar, sérstaklega þegar talað er um virkni lyfs,“ sagði DeSantis og vísar þar til þess að svo kölluð Covid bóluefni væru sögð „örugg og áhrifarík“ og að alvarlegar aukaverkanir væru afar sjaldgæfar, svo sem hjartavöðvabólga.
Kviðdómnum verður heimilt að rannsaka hópa sem tóku þátt í hönnun, þróun, klínískum prófunum, markaðssetningu og dreifingu bóluefnanna sem sögð voru koma í veg fyrir COVID-19 sýkingu, einkenni og smit.
DeSantis hélt því fram að það væri útbreidd trú að COVID-19 bóluefnið kæmi í veg fyrir að sjúkdómurinn breiddist út, sem leiddi til bólusetningaskyldu á almenna borgara, heilbrigðisstarfsmenn og hermenn.
„Það er ómögulegt að ímynda sér að svo margir áhrifamiklir einstaklingar hafi komist að þessari skoðun á eigin spýtur. Frekar er líklegt að einstaklingar og fyrirtæki hafi séð sér hag í halda þessari skoðun á lofti í fjárhagslegum ávinningi,“ segir í beiðni DeSantis til dómstólsins.
Í beiðninni er sérstaklega bent á fullyrðingar Moderna og Pfizer um að efnin kæmu í veg fyrir COVID-19 sjúkdóminn með „94,1% virkni“ og „91,3% bóluefnavirkni“.
Fyrsta ríkið til að mæla gegn sprautunum fyrir börn
Í mars sl. varð Flórída fyrsta ríki Bandaríkjanna til að mæla opinberlega gegn Covid sprautum fyrir börn. Dr. Joseph Lapado, landlæknir ríkisins vísaði til rannsókna sem sýndu annars vegar að Covid dauðsföll meðal heilbrigðra barna væru fátíð og hins vegar að aukin hætta væri á aukaverkunum eins og hjartavöðvabólgu meðal ungra bólusettra drengja sérstaklega.
Í sumar sagði ríkisstjóri Flórída að „FDA (matvæla-og lyfjaeftirlitið) væri í grundvallaratriðum dótturfyrirtæki lyfjarisanna og því hagaði stofnunin sér í samræmi við það og styddi því Covid bólusetningar barna sem snérust um hagnað.“