Mynd: Jóhanna Henze t.h.

Jóhanna Henze er 44 ára íslensk kona og búsett í Þýskalandi. Hún varð fyrir þeirri skelfilegu lífsreynslu að lamast fimm dögum eftir síðari Pfizer sprautuna. Hún missti einnig 95% sjón og var því blind um tíma en hefur endurheimt sjónina að mestu leyti.

Jóhanna var mjög heilsuhraust tveggja barna einstæð móðir áður en hún fór í Covid sprautuna í maí 2021. Hún var að vinna á ferðaskrifstofu á þeim tíma, en áður hafði hún starfað sem flugfreyja hjá Lufthansa flugfélaginu.

Jóhanna fór fyrst að finna fyrir undarlegri tilfinningu í fótum og lýsir því eins og maurar væru að skríða á henni sem olli miklum pirringi. Síðan fór hún að missa máttinn í fótum og er lögð inn á sjúkrahús þegar allur máttur í fótum var farinn. Jóhanna var á sjúkrahúsinu í marga mánuði, en á meðan hún var sem veikust, lömuð og blind, fékk hún sent uppsagnarbréf frá ferðaskrifstofunni.

Notast við hjólastól

Jóhanna notast í dag við hjólastól en getur einstöku sinnum stuðst við göngugrind. Hún er nýbyrjuð að geta farið ein á salernið sem hún segir mikla breytingu, en það er eina athöfnin sem hún nær að gera ein og án aðstoðar.

Móðir Jóhönnu hefur verið hjá henni og aðstoðað hana með börnin og heimilisverkin og sonur hennar hefur líka verið duglegur að hjálpa til, segir Jóhanna.

Til að bæta gráu ofan á svart þá hefur Jóhanna fengið lítinn sem engan stuðning frá þýska ríkinu. Hún fær aðeins 310 evrur á mánuði sem gerir um 46.500 kr., til að halda fjölskyldunni uppi. Það sé ógerlegt því unglingar borði mikið og því dugi þessar sárabætur ekki. Hefur hún því þurft að leita á náðir ættingja.

Vara áður heilsuhraust

Jóhanna segir að líf sitt sé í raun ónýtt frá því sem var, og það sé mjög vont að vera í þeirri stöðu að geta ekki ávallt verið til staðar fyrir börnin sín. Nú eru börnin að hugsa um móður sína en ekki öfugt. Áður var Jóhanna dugleg við að fara í leikfimi fimm til sex daga vikunnar, var mjög heilsuhraust og lifði heilbrigðu lífi.

Blaðamaður spurði hvort hún væri komin með lögmann því nú væri verið að greiða skaðabætur í ýmsum löndum til þeirra sem hafa hlotið skaða af völdum Covid bóluefna. Hún sagði að svo væri ekki en að hún vilji fara með málið lengra og ætli því að skoða það núna.

Enginn innan heilbrigðiskerfis Þýskalands hefur bent Jóhönnu á að tilkynna bóluefnaskaðann til lyfjastofnunar og lítil sem engin aðstoð hefur borist í framhaldinu og verður því Jóhanna nánast alfarið að treysta á ættingja.