Axel Þór Axelsson er 38 ára námsmaður, tónlistarmaður og jóga unnandi. Hann fór í AstraZeneca bólusetningu 6. maí 2021 og hefur nýlega tjáð sig um veikindi sín í facebook hóp um aukaverkanir. Hann samþykkti að veita Fréttinni viðtal um málið.

Axel ætlaði sér ekki að fá AstraZeneca en honum var sagt að ekki væri um neitt annað að velja. Hann ákvað því að fara í sprautuna enda vildi hann leggja sitt af mörkum til að ná hjarðónæminu sem aldrei kom. Síðari sprautan var þó Pfizer og AstraZeneca auk þess ekki lengur í boði fyrir hans hóp. Einhverjir höfðu sagt honum að sprautan gæti jafnvel lagað kvillana eftir fyrstu bólusetninguna. En ekkert breyttist og hann fékk þar að auki Covid einhverjum mánuðum síðar. Hann glímir enn við mikla verki, mæði og ýmislegt fleira.  

Axel segir frá því að um leið og hann var sprautaður sveið honum, fékk mikla brunatilfinningu í báða handleggi og sting fyrir brjóstið, svimaði og sjónin varð óskýr. Hann fór heim og sofnaði en vaknaði með mikla verki alls staðar í líkamanum og gat ekki notað hendur eða staðið í fæturna án þess að verða illt. „Ég hélt að þetta væru bara tímabundnar aukaverkanir en síðan fór þetta ekki,“ sagði Axel.

Fljótlega fór Axel að fá stingi í allan líkamann og dofnaði meðal annars í útlimum og vinstra megin í andliti (svipað og eftir deyfingu hjá tannlækni) og aftan í hnakka. Hann varð líka mæðinn, fékk höfuðverk, síþreytu, heilaþoku, vöðvaverki, spasma og bylgjuhljóð í eyra, svo eitthvað sé nefnt.

Treystir ekki lengur heilbrigðiskerfinu

„Ég var búinn að vera í mikilli hreyfingu allt árið 2020 fram að sprautunni í maí 2021. Jóga, spinning, úti að hjóla, göngutúrar og það er algjörlega kristaltært að þessir verkir voru ekki til staðar áður en að ég fór í sprautuna. Þegar ég ætlaði að byrja aftur í ræktinni þá gat ég ekki haldið mér á hjólinu út af höndunum, þær réðu ekki við það. Ég varð mjög móður og hjartað var á fullu. Sama með jóga, ég gat ekki staðið í lappirnar í stöðunum og dofnaði upp í útlimum og andliti. Og í göngutúrum verkjaði mig í sköflung, iljar og hæla. Ég hef þyngst mikið eftir öll þessi veikindi og hreyfingarleysi, en er rétt að byrja að hreyfa mig aftur núna.“

„Ég er að taka allskonar lyf og bætiefni en þegar ég tek Ivermectin finn ég mestan mun á mér. Það virkar á margt af þessum kvillum þó svo það lagi þá ekki varanlega og þess vegna treysti ég ekki heilbrigðisyfirvöldum lengur fyrir heilsu minni þar sem þau virðast gera allt til þess að banna eða takmarka aðgengi okkar að þessu lyfi.“

„Ég er búinn að vera rosalega verkjaður og reiður núna í næstum tvö ár en ætla að vera jákvæður núna og komast yfir þetta. Það er líka skömm í manni fyrir að hafa ekki haft kraft eða kjark til þess að tala um þetta svona opinberlega fyrr en nú. Ég reyndi það á tímabili en já...þið þekkið þetta sem hafið verið að standa í þessu“, sagði Axel.

Læknar hafa engar útskýringar

„Ég er búinn að fara svo oft til læknis og alls konar sérfræðinga að það er orðið vandræðalegt. En enginn þeirra getur gefið neina skýringu. Ég nefni alltaf sprauturnar en þeir taka ekki undir það, kannski vilja þeir það ekki eða geta ekki. Það virðist vera svo mikil þöggun í kringum eftirköstin af þessum sprautum. Fékk samt þau svör að engar sérstakar tilkynningar hefðu borist varðandi mitt bóluefna-lotunúmer (Lotunr. ABW4801). Ég tilkynnti aukaverkanirnar til Lyfjastofnunar og er búinn að sækja um bætur frá Sjúkratryggingum vegna skaðans sem ég hef orðið fyrir.“

„Ég vil nota tækifærið og þakka öllum sem hafa í raun talað fyrir mig og vakið athygli á hættunni af þessum sprautum hér á Fréttinni og á samfélagsmiðlum og fengið öll óréttlátu "skítakommentin" yfir sig fyrir vikið. Endalaust gott karma á ykkur öll að eilífu. Ég óska öllum sem eru að ganga í gegnum aukaverkanir og vanlíðan góðs gengis og bata,“ sagði Axel að lokum.