Gunnar Ársæll Ársælsson vaxtaræktamaður og fyrrum afreksmaður í sundi segist hafa náð skjótum bata af Covid með ivermectin og eins hafi hann jafnað sig að fullu af aukaverkunum eftir Covid bólusetningar sem höfðu varað í marga mánuði.

Gunnar fór í tvær Covid bólusetningar með Moderna í maí á síðasta ári. Hann hafði aldrei hugsað sér að fara í þessa bólusetningu en fékk síðan kvaðningu frá sóttvarnalækni út frá því að vera í áhættuhópi. „Þá lét ég til leiðast,“ sagði Gunnar Ársæll í samtali við Fréttina.

Var að kafna við að ganga upp á 4. hæð

„Ég fékk engar aukaverkanir af bólusetningunni, ekki fyrr en um það bil viku eftir síðari sprautuna. Þá fór ég vera í erfiðleikum með að komast upp stigann, en ég bý á 4. hæð.“

„Þetta fór svo að ágerast, ég fór að finna meira fyrir mæði og miklum hjartslætti. Þegar ég var kominn upp á fjórðu hæð átti ég í erfiðleikum með að koma lyklinum í skrána þar sem hjartslátturinn var svo mikill að líkaminn hristist allur til. Þessu fylgdi ægileg köfnunartilfinning, þannig að þegar ég komst inn í íbúðina fór ég oft beint út á svalir til að reyna að ná andanum, köfnunartilfinningin var það sterk. Ég mætti nágrönnum mínum tvívegis á leið upp stigann sem voru skelfingu lostnir við að sjá ástandið á mér.“

„Við tók fimm mánaða tímabil þar sem ég var mjög slæmur og allir að segja mér að fara til læknis eða á bráðamóttökuna, en ég frestaði því alltaf þar sem ég þorði ekki að horfast í augu við vandann. Ég gerði mér grein fyrir að þetta gæti verið það alvarlegt og hélt satt að segja að ég væri að fara deyja og því lagði ég ekki í að fara til læknis.“

„Konan mín krafðist þess oft að ég færi bráðamóttökuna en ég treysti mér einfaldlega ekki. Það eina sem ég gerði var að hringja í heimilislækni sem skrifaði upp á astmapúst og sagði mér að fara í skoðun sem fyrst.“

Flótti frá raunveruleikanum

„Eftir á að hyggja finnst mér ótrúlegt að ég hafi ekki farið í skoðun í þessu ástandi en þetta var í raun flótti frá niðurstöðunni og því fór ég að verða meira og meira kvíðinn. Í kjölfarið hætti ég að geta sofið almennilega og hægt og rólega minnkuðu líkamsræktaræfingar og hættu síðan alveg. Þetta ástand varði hátt í átta mánuði,“ sagði Gunnar.

„En á fimmta mánuði hófst bataferlið, ég hafði keypt mér snjallúr og fór að horfast í augu við heilsuna. Ég fór að fylgjast með súrefnismettuninni þegar ég gekk upp stigann til að ná stjórn á þeirri tilfinningu að ég væri að kafna. Súrefnismettunin var sem sagt í lagi þrátt fyrir köfnunartilfinninguna.“

Fékk Covid og tók ivermectin 

„Í febrúar fór ég að finna fyrir töluverðum bata og fór að æfa aðeins meira. Síðan fékk ég Covid og var í raun búinn að gera mig kláran með meira astmapústi og lyfinu ivermectin sem vinur minn hafði útvegað mér.“

„Um leið og ég fékk einkenni byrjaði ég að veikjast mjög hratt og fékk staðfestingu á að ég væri með Covid. Þá tók ég 24 mg skammt af ivermectin og ég myndi segja að á u.þ.b. tveimur tímum hafði ég lagast um helming og á fimm tímum var þetta búið, öll einkenni horfin. Ég fékk aldrei neinar breytingar á lyktar-eða bragðskyni, þetta var einfaldlega farið,“  sagði Gunnar glaður í bragði.

Hann sagði síðan frá vini sínum sem líka byrjaði að veikjast hratt af Covid. Hann tók sama skammt og hresstist á tveimur tímum. „Mér skilst að best sé að byrja að taka lyfið inn strax, ekki bíða í nokkra daga,“ bætti Gunnar við.

Aukaverkanirnar hurfu líka

Gunnar bætti við að með því að taka ivermectin virtist það sem eftir var að aukaverkunum af bólusetningunni líka jafna sig, „það fannst mér stórmerkilegt.“

„Ég fór síðan til hjartalæknis eftir að mér batnaði og engar bólgur í hjartavöðva eða annað í kransæðakerfinu var að finna. Ég fékk sem sagt fullt hús stiga í skoðuninni.“

„Í framhaldinu fór ég að segja fólki frá þessari reynslu minni og að það væri til lyf við Covid. Nokkrir töldu mig vera að ljúga og afneituðu minni persónulegu reynslu, það var mjög súrrealísk upplifun, þ.e.a.s. að fólk skuli hafa horfi beint í augun á mér og afneitað minni eigin reynslu. Eftir á að hyggja virðist hlutfallið sem afneitaði Covid bata mínum vegna ivermectin vera u.þ.b. það sama og trúði mér ekki þegar ég sagðist vera veikur eftir sprauturnar.“

Ábyrgð fjölmiðla mikil

Gunnar Ársæll heldur því fram að ábyrgð fjölmiðla hvað varði ivermectin og faraldurinn sé mikil.

„Mér þykir ábyrgð fjölmiðla í þessu máli vera mikil, að þeir skuli ekki fylgja þessum reynslusögum eftir sem eru orðnar fjölmargar, og þeir vita af þessum sögum, einhverjum þeirra a.m.k.“

„Hvers vegna er ekki lagður meiri þungi í að fjalla um fólk sem hefur þessar jákvæðu fréttir að færa í tengslum við faraldurinn?“

„Það mætti spyrja að því hvort fjölmiðlar, sem gegna veigamiklu hluti í samfélaginu, hafi ekki líf á samviskunni vegna þess. Svo hart vil ég taka til orða,“ sagði Gunnar Ársæll.

„Þess má til dæmis geta að nýlega heimilaði New Hamsphire í Bandaríkjunum lausasölu á lyfinu. Hvers vegna voru ekki sagðar fréttir af því hér heima?“

„Við vitum það að bóluefni fá ekki neyðarleyfi ef til er lyf sem getur læknað sjúkdóminn. Því er spurning hvort það hafi einhver áhrif á umfjöllunarfælni lækna og fjölmiðla í þessu máli.“

„Það er í raun skammarlegt að fólk þurfi að verða sér úti um þetta merkilega lyf sem svo margir hafa notið góðs af, eftir krókaleiðum, en geti ekki bara gengið inn í apótek og keypt án lyfseðils, eins og víða er hægt að gera, og nú síðast í New Hampshire í Bandaríkjunum,“ sagði Gunnar Ársæll að lokum.