Gústaf Skúlason skrifar:
Prófessor Bernd Raffelhüschen, sérfræðingur í lífeyriskerfum, hefur kannað hversu mikið fólksinnflutningurinn til Þýskalands kostar landið og tölurnar eru stjarnfræðilegar – áætlað er að kostnaðurinn sé um 6.000 milljarðar evra yfir lífsferilinn.
Bernd Raffelhüschen segir að innflytjendur muni hvorki bjarga þýska hagkerfinu, lífeyrissjóðunum né félagslega kerfinu, þvert á móti. Hann hefur skoðað muninn nánar á milli greiðslna og kostnaðar út frá lífsferilssjónarmiðum og bendir á að innflytjendur kosti meira og leggi til minna.
Í Þýskalandi eldast íbúarnir og vinnuafli fækkar. Að sögn Raffelhüschen er bilið á milli tekna hins opinbera og kostnaðar yfir ævina næstum 500% af landsframleiðslu. Án innflytjenda væri bilið 350% af landsframleiðslu. Mismunurinn samsvarar tæpum 6.000 milljörðum evra.
![](https://i0.wp.com/frettin.is/wp-content/uploads/2024/01/Bernd-Raffelhuschen.jpeg?resize=768%2C460&ssl=1)
Prófessor Bernd Raffelhüschen.
Alls hafa innflytjendur hingað til kostað Þýskaland heilar 5,8 billjónir evra og ef fólksinnflutningurinn heldur áfram í sama mæli, þá er áætlað að bilið fari upp í 19,2 billjónir evra (13,4 billjónir evra án innflytjenda). Bernd Raffelhüschen segir í viðtali við Bild:
„Þetta er kostnaðurinn fyrir innflytjendur í núverandi kerfi okkar.“
Fólksinnflutningurinn íþyngir velferðarkerfinu
Að meðaltali þurfa innflytjendur sex ár til að aðlagast og öðlast réttindi á þýska vinnumarkaðnum og greiða lítið til almannatryggingakerfisins á þeim tíma. En jafnvel eftir þetta þéna innflytjendur umtalsvert minna en þýskir kollegar sínir og greiða minni skatta og framlög til félagslega kerfisins. Ein niðurstaðan er því sú, að í framtíðinni muni Þýskaland ekki lengur hafa efni á að hafa velferðarríki eins og er í dag.