Fréttin hefur verið uppfærð.
Morgunblaðið segir frá því í dag að andlát hafi verið óvenju tíð á dvalar- og hjúkrunarheimilum að undanförnu, eins og andlátstilkynningar gefa til kynna.
Blaðamenn Morgunblaðsins spurðu Pálma V. Jónsson, yfirlækni á öldrunarlækningadeild Landspítala og prófessor í öldrunarlækningum við Háskóla Íslands, hvort andlát eldra fólks hafi verið óvenjutíð undanfarið og hvort rekja megi mörg þeirra til Covid-19-sýkinga?
„Ég er ekki með nákvæma tölfræði við höndina en það virðist vera aukin tíðni andláta þessa dagana. Ég hef heldur ekki upplýsingar um dánarorsakir,“ svaraði Pálmi.
„Ég tel mikil líkindi fyrir því að kórónuveiran sé nú að verki og valdi þessari aukningu í ár. Þá er einnig nokkuð líklegt, að mínu mati, að dánartíðnin sé heldur meiri en í meðalári, þar sem sóttvarnir hafa verið miklar í tvö ár og fólk haldið sér til hlés. Nú er hins vegar dregið úr sóttvörnum almennt talað og smit í samfélaginu í hæstu hæðum. Þá er það svo að bæði gestir og gangandi og einnig starfsfólk á sjúkrastofnunum veikist. Öllum þessu sýkingum fylgir ákveðinn tími í byrjun veikinda, þar sem fólk er talsvert smitandi en einkennalaust eða lítið og sá tími getur verið hættulegur viðkvæmu fólki.
Pálmi telur líklegt að kórónuveiran sé að verki þrátt fyrir að langflestir eldri borgarar hafi verið þríbólusettir við veirunni og hafi áfram búið við heimsóknartakmarkanir á öldrunarheimilum, þrátt fyrir opnun samfélagsins.
Fréttin.is sendi Pálma tölvupóst og spurði hvort læknar telji Covid bóluefnin sem sögð voru koma í veg fyrir alvarleg veikindi og dauða af veirunni, séu ekki að veita þessa vörn eftir allt saman.
Uppfært k. 14. 42.
Svar barst frá Pálma sem segist hafa móttekið póstinn en væri því miður upptekinn og hefði ekki tök á að svara þessum spurningum og bætti við að þegar kæmi að þessum málum væri gjarnan leitað til farsóttarlæknis eða staðgengils hans.
Pósturinn hefur verið áframsendur til landlæknis og sóttvarnalæknis.
