Pútín Rússlandsforseti segir að Bandaríkin hafi fjármagnað og starfrækt lífefnarannsóknastofur í Úkraínu og framkvæmt tilraunir með kórónaveirur, miltisbrand, kóleru, afríska svínaflensu og fleiri banvæna sjúkdóma og nú sé verið að hreinsa upp og reyna að fela leynilegar áætlanir. Pútín sagði Pentagon hafa verið að framleiða íhluti sýklavopna rétt við landamæri Rússlands og að „viðvörunum okkar um að Rússum stafaði hætta af rannsóknunum hafi verið mætt með hroka af hálfu Úkraínu, Bandaríkjanna og annarra NATO ríkja.“

Alþjóðaheilbrigðismálastofnunin hefur nýlega skorað á úkraínska embættismenn að „eyða hættulegum sýklum til að koma í veg fyrir hugsanlegan leka,“ vegna áframhaldandi hættu á sprengingum í stríðinu.

Það sem menn eiga við með „lífefnarannsóknarstofum“ er aftur á móti óljóst.

Hér má heyra háttsettan starfsmann utanríkisráðuneytis Bandaríkjanna, Victoriu Nuland, svara spurningu þingmannsins Marco Rubio, um það hvort Úkraína búi yfir lífefna-eða efnavopnum. Hún svarar spurningunni ekki neitandi, vandar svar sitt og segir hægt og rólega, að Úkraína búi yfir lífefnarannsóknarstofum og segist hafa miklar áhyggjur af því að Rússar nái valdi á þeim.