E-6B Mercury flugvél bandaríska flotans, svokölluð „Dómsdagsvél“ á að hafa verið stödd hér á landi samkvæmt upplýsingum sem bandaríska Evrópuherstjórnin gaf út á Twitter í gær.
Færslan var birt í gær, 28. febrúar en vélin var send til aðgerða á svæðinu.
A @USNavy E-6B Mercury assigned to @US_STRATCOM Wing One arrived in #Iceland recently, while conducting operations in the USEUCOM area of responsibility. The crew met w/U.S. Ambassador to Iceland Carrin Patman & other diplomatic & military leaders. #WeAreNATO @usembreykjavik pic.twitter.com/CLYdl86kP4
— U.S. European Command (@US_EUCOM) February 28, 2023
Áhöfnin á að hafa hitt sendiherra Bandaríkjanna á Íslandi, Carrin Patman ásamt fleiri embættismönnum, segir í færslunni.
Hvað gerir „Dómsdagsvélin“?
Vélin er notuð til samskipta við kjarnorkukafbáta af Ohio-gerð, í hernaðarlegum tilgangi. Hver kafbátur getur borið allt að 24 Trident II D5 skeyti sem geta borið kjarnaodda, um borð.
Upplýsingarnar birtast í framhaldi af yfirlýsingu Vladímírs Pútíns, forseta Rússlands, en í framhaldi af henni samþykkti rússneska Dúman 22. febrúar sl. lög sem binda enda á þátttöku Rússlands í Nýja START-sáttmálanum, samningi um fækkun kjarnavopna.
Upplýsingafulltrúi Isavia hafði ekki upplýsingar um málið, skv. símtali og benti á að vélin gæti verið stödd á svæði Landhelgisgæslunnar á Keflavíkurflugvelli.
Fréttin hefur óskað eftir upplýsingum frá Landhelgisgæslunni og utanríkisráðuneytinu og verður uppfærð skv. því.
Utanríkisráðuneytið svaraði:
„Umrædd flugvél er ekki hér núna en hafði stutta viðkomu hér á landi fyrir nokkrum vikum.“
