Ingibjörg Gísladóttir skrifar:

Danir eru nú að bræða það með sér hvort skuli banna að brenna, skemma eða fara óvarlega með trúarrit (lesist Kóraninn). Þörfin á því er sögð skrifast á Rasmus Paludan sem hefur verið mjög iðinn við að meðhöndla Kóraninn með óvirðulegum hætti, bæði í Danmörku og í Svíþjóð, og eftir að hann brenndi Kóraninn fyrir framan sendiráð Tyrkja í Stokkhólmi þá hafa Tyrkir gefið út handtökuskipan á hann. Í viðtali við Tommy Robinson á Rumble þá furðar Rasmus sig á því að Tyrkir telji sig hafa rétt á því að handtaka mann vegna iðju sem framkvæmd er löglega í öðru landi. Hann segir að það sé sakir ótta við öfgaíslam sem Danir vilji gera Kóraninn friðhelgan en segir slíkt bann ekki standa til í Noregi eða í Svíþjóð, þar sem flóttamaður frá Írak virðist hafa tekið við kefli hans hvað Kóranbrennur varðar.

Rasmus segist ekki fá leyfi lögreglunnar til að búa heima hjá sér og alls ekki leyfi til neinna mótmæla, öryggisstigið sé svo hátt um þessar mundir. Hann segir frá því að reynt hafi verið að drepa sig með grjóthnullingi í hnakkann og sumarið 2020 hafi múslimi frá Líbanon ætlað að drepa sig með stórum hnífi, en verið skotinn af lögreglu sem gerir greinilega sitt besta til að verja hann bæði í Danmörku og Svíþjóð þótt hann segist vita að þeir myndu gjarnan vilja sjá sig dauðan. Hann er spurður hvort hann myndi ekki telja sig bera neina ábyrgð ef lögreglumaður yrði drepinn við að verja sig og svarar því neitandi. Sá sem drepi lögreglumann beri á því ábyrgð.

RÚV er hætt að kalla Rasmus fasista sem kalli eftir útrýmingu múslima en kallar hann nú „öfgaþjóðernissinna". Kjarninn er málefnalegri og kallaði hann „umdeildasta stjórnmálamann Danmerkur" í grein um hann 2020. Í viðtalinu við Tommy, sem nú er í sjálfskipaðri útlegð frá Bretlandi vegna heimildamyndar er hann gaf út, segir Rasmus að menn þurfi ekki að vera hvítir til að vera Danir en að uppruni Dana og menning skipti máli. Rasmus segir að vandamálið með múslima í Danmörku sé hið stærsta sem landið eigi við að eiga, því nái þeir völdum sé engin leið til baka. Aðspurður segist hann myndu vilja að allir sem ekki séu danskir ríkisborgarar og fremji glæpi; séu á bótum eða hafni reglum samfélagsins, þar með töldu almennu siðgæði, ættu að frá frest til að yfirgefa landið eða vera fluttir burt ella.

Hann vill meina að ein ástæðan fyrir kröfunum um opin landamæri sé löngun „menningarmarxistanna" til að rústa vestrænni menningu og byggja upp nýtt og réttlátara þjóðfélag úr rústunum en þeir Tommy eru sammála um að múslimar séu ekki réttu samstarfsaðilarnir. Woke hugmyndafræðin byggi á fórnarlambshugsun en múslimar fyrirlíti veiklundað fólk. Tommy minnir á að í borgarastríðinu í Líbanon hafi múslimar snúist gegn vinstrisinnuðum samstarfsmönnum sínum og drepið þá líka.

Tommy hefur ekki verið dæmdur fyrir hatursorðræðu en Rasmus segist hafa fengið sex dóma, flesta fyrir að fara með tölfræðiupplýsingar um nauðganir, greindarstig einstakra þjóða og þess háttar. Hann segir að birting tölfræðiupplýsinga í Danmörku sé refsiverð sé hún sett fram á niðrandi hátt. Sannleikurinn sé þar refsiverður. Í lok viðtalsins er hann spurður hvort hann muni halda áfram að brenna Kóraninn verði það gert refsivert með allt að tveggja ára fangelsisvist en hann segist trúlega hætta því - það sé hægt að mótmæla með öðrum hætti. Hann talar um að hinn almenni borgari segi sig ljúga ef hann tali um að íslam sé ömurleg trúarbrögð og alls ekki trúarbrögð friðar en segir jafnframt að íbúar borga þar sem orðið hafi óeirðir í kjölfarið á mótmælum sínum geti ekki lengur haldið slíku fram, svo honum finnst sem hann hafi fengið einhverju áorkað.

Fréttin greindi kosningabaráttu Rasmus Paludan í maí 2022, sjá hér.