Björn Bjarnason skrifar:
Á það var bent á Facebook að slagorðið Látum náttúruna njóta vafans fengi á sig annan blæ þegar staðið væri frammi fyrir skorti á heitu vatni og rafmagni í Reykjanesbæ og Suðurnesjum.
Þeir sem helst nota þetta slagorð starfa undir merkjum samtakanna Landverndar. Þegar framkvæmdastjóri þeirra var spurð að því á dögunum hvað henni þætti um áform um að reisa varnargarða til að halda hraunflæði frá mikilvægum mannvirkjum og mannabyggð í nágrenni jarðeldanna, sagðist hún þurfa að hugsa málið fram yfir helgi!
Menn geta rétt ímyndað sér hvernig staðan væri í Grindavík ef farið hefði verið að reglum um umhverfismat og öllu sem því fylgir áður en hafist var handa um gerð varnagarðanna.
Í stað þess að fallast á sjónarmið þeirra sem vilja auka framleiðslu á sjálfbærri orku láta þeir sem vilja að náttúran njóti vafans eins og skynsamlegra sé að slökkva á einhverju sem fyrir er, þrengja að frekar en fjölga orkugjöfunum.
Atburðirnir nú sýna að miklu meiri fyrirhyggja er nauðsynleg í mörgu tilliti til að tryggja stöðu mannsins í sambúðinni við náttúruöflin hér á landi. Við töku lykilákvarðana verður að hugsa mun lengra fram í tímann en mörgum er tamt að gera við töku ákvarðana á stjórnmálavettvangi.
Starfsmenn HS Orku vinna enn eitt þrekvikið til að sigrast á hrauninu og koma heitu vatni á Suðurnes. Vegur hefur verið lagður yfir nýja hraunið og unnið er að leggja leiðslu yfir það. (Mynd HS Orka.)
Það er til dæmis ótrúlegt að enn skuli fyrrverandi borgarstjóri, Dagur B. Eggertsson, tala fyrir flugvelli í Hvassahrauni í von um að geta lokað Reykjavíkurflugvelli. Undir merkjum þess að náttúran eigi að njóta vafans hefur Dagur B. beitt sér gegn því að skógur sé grisjaður í Öskjuhlíð til að tryggja betur flugöryggi á vellinum í Vatnsmýrinni.
Oft hefur verið spurt í áranna rás hvaða flóttaleiðir kynnu að vera opnar úr Reykjavík ef til hamfara kæmi nær höfuðborginni en nú er.
Í um aldarfjórðung hefur verið rætt um nýja leið til og frá borginni, Sundabraut. Á 10 ára ferli Dags B. sem borgarstjóra komst málið ekki af umræðustigi. Hvað með leið frá Álftanesi yfir Skerjafjörð í stað ofurdýrrar pjattbrúar sem kynnt hefur verið úr Kársnesi í Nauthólsvík?
Það eru ekki aðeins virkjanir sem lenda í undandrætti vegna þess að náttúran á að njóta vafans heldur einnig flutningsleiðir orku. Við núverandi ástandi vegna orkuskorts mætti bregðast með nýrri raflínu milli norður og suður hluta landsins. Þessi lína kemst ekki í gegnum frumskóg regluverksins.
Á sama tíma og við blasa þáttaskil vegna jarðelda á Reykjanesi fjölmenna þeir sem vilja galopna landamærin til mótmæla því við lögreglustöðina í Reykjavík að farið sé að lögum um brottvísun þeirra sem hafa ekki lögheimild til að dveljast hér.
Við neyðaraðstæður loka ríki landamærum sínum en galopna þau ekki eða fara á svig við lög til að flóttamenn njóti vafans.
Frumskylda stjórnvalda er að gæta öryggis eigin borgara. Bregðist þau þeirri skyldu er voðinn vís