Nýju lögin voru samþykkt á þýska þinginu fyrir helgi og segir Karl Lauterbach heilbrigðisráðherra Þýskalands að ætlunin sé að draga úr umsvifum svarta markaðsins og koma betur í veg fyrir kannabisnotkun barna og ungmenna.

Lauterbach  segir orðræðu andstæðinga löggjafarinnar jafngilda því að „stinga höfðinu í sandinn.“ Grasneysla ungmenna hefur vaxið gífurlega í Þýskalandi unfanfarin ár og ofneysla efnisins getur haft skaðlegar afleiðingar á heilaþroska í för með sér. Kannabisefnin sem eru til sölu ólöglega í dag séu orðin töluvert sterkari en þau voru og erfitt að fylgjast með gæðum þessara efna sem ungt fólk og börn nota í svo ríkulegum mæli.

Lögleiðing kannabisefna hefur verið til umræðu í Þýskalandi í mörg ár. Frumvarpið var að lokum samþykkt með 407 atkvæðum gegn 226.

Samkvæmt umfjöllun Guardian nota um sjö milljón Þjóðverjar kannabis með reglulegu millibili og þar af margir í lækningaskyni. Kannabisnotkun barna verður áfram ólögleg sem og notkun efnisins í grennd við skóla og leikskóla.

Ekki eru allir á eitt sáttir við þessa þróun og hefur landstjórn Bæjaralands hreyft mótbárum. Hinn íhaldssami Kristilegi demókrataflokkur sem er þar í meirihluta hefur til að mynda beðið ríkisstjórnina um að endurhugsa löggjöfina.

„Við höfum tvö markmið: að berjast gegn svarta markaðnum og bæta vernd barna og ungmenna,“ sagði heilbrigðisráðherrann í upphafi harðvítugrar umræðu, þar sem stjórnarandstaðan sakaði hann um að stuðla að fíkniefnaneyslu.

Þessi nýja löggjöf gerir Þýskaland að þriðja Evrópusambandsríkinu til að lögleiða kannabis til einkanota á eftir Möltu og Lúxemborg.