Að minnsta kosti fimm eru látnir og 22 særðir eftir sprengjuárásir úkraínska hersins á borgina Donetsk í Donbass héraði í Úkraínu í gær. Frá því greinir m.a. Reuters í dag, 14. júní 2022.

Fyrir sprengjunum urðu m.a. markaðstorg og fæðingarspítali, en óstaðfestar fréttir herma að yfir 300 sprengjum hafi verið varpað á borgina. Um sé að ræða mestu árás á Donetsk frá því að borgarastyrjöldin á milli úkraínskra stjórnvalda og sjálfsstæðissinna í Donbass hófst árið 2014. Á meðal þeirra sem féllu voru kona og ungur sonur hennar. 

Engin hernaðarátök eiga sér stað í borginni sem er fyrir utan átakalínur Rússlands og Úkraínu, og haft er eftir fulltrúa Sameinuðu þjóðanna af þessu tilefni, Stephane Dujarric:

„Árásir á borgaraleg mannvirki, sérstaklega heilbrigðismannvirki, er skýrt brot á alþjóðalögum.“

Amnesty International birtir ásakanir sama dag

Rússneski herinn er að sögn með það á stefnuskrá sinni frá því að hin „sérstaka hernaðaraðgerð“ hófst í febrúar síðastliðnum, að hlífa borgaralegum mannvirkjum og almennum borgurum. Í skýrslu sem birtist í gær, 13. júní, sakar Amnesty International Rússland um stríðsglæpi í Kharkiv, næststærstu borg Úkraínu. Amnesty heldur því fram að þar hafi hundruð almennra borgara farist í sprengjuárásum Rússlands frá í febrúar sl.

Úkraínski herinn hefur á móti verið sakaður af Rússum og fleirum um að nota almenna borgara sem mannlega skildi. Dæmi um það var að finna í Azov-stálverksmiðjunni í Mariupol auk fjölda frásagna almennra borgara sem voru lokuð inni í byggingum sem barist var í. Auk þess að ráðast á almenna borgara og mannvirki í Úkraínu á svæðum sem þykja of hliðholl Rússlandi eða aðskilnaðarsinnum í Donbass, og að sprengja landamærabyggðir í Rússlandi.