Utanaðkomandi ráðgjafar FDA, Matvæla- og lyfjaeftirlits Bandaríkjanna, greiddu einróma atkvæði í dag um að mæla með að stofnunin heimili Moderna og Pfizer-BioNTech kórónuveirubóluefni fyrir mjög ung börn, ráðstöfun sem gæti orðið til þess að eftirlitsaðilar veiti neyðarleyfi fyrir bóluefnið síðar í vikunni.

Þriggja skammta bóluefnið frá Pfizer er fyrir börn á aldrinum 6 mánaða til 4 ára, en Moderna er með tveggja skammta bóluefni fyrir börn 6 mánaða til 5 ára. Ríki hafa þegar pantað milljónir skammta, segir í frétt New York Times. Embættismenn Hvíta hússins hafa sagt að lyfjagjöfin gæti hafist næsta þriðjudag ef eftirlitsaðilar FDA veita neyðarleyfið.

FDA hefur sagt að gögn úr klínískum rannsóknum frá fyrirtækjunum sýni að bóluefnin uppfyllti skilyrði um öryggi og virkni fyrir yngsta aldurshópinn.

Lyfjafyrirtækin verða að sprauta yngstu börnin til að komast hjá lögsóknum

Menn gætu spurt sig hver neyðin sé hjá ungabörnum og upp í 4 til 5 ára með Covid. Eða liggur neyðin kannski frekar hjá lyfjafyrirtækjunum?

Í þætti kanadísku fjölmiðlakonunnar Laura Lynn Tyler Thompson kemur fram að lyfjafyrirtækin verði að hljóta opinbera viðurkenningu á Covid bóluefninu fyrir börn yngri en 12 ára til að fá undanþágu frá lögsóknum og skaðabótaábyrgð eftir að bóluefnin hafa fengið fullt markaðsleyfi.

Lögmaður samtakanna Children´s Health Defence, Robert F. Kennedy Jr., sem hefur ótal sinnum á sínum ferli lögsótt hin ýmsu lyfjafyrirtæki, útskýrði lagalegu hlið málsins:

Lyfjafyrirtækin munu aldrei markaðssetja bóluefni, þ.e.a.s. að veita almenningi aðgang að samþykktu bóluefni án þess að vera varin fyrir lögsóknum. Nú þegar Covid bóluefnin eru á neyðarleyfi (EUA - Emergency Use Authorization), þar á meðal Moderna og Pfizer eru framleiðendur þeirra varðir fyrir lögsóknum samkvæmt bandarískum lögum, n.t.t. PREP ACT og CARES ACT.

Svo lengi sem menn fá bóluefni sem er á neyðarleyfi er ekki hægt að lögsækja lyfjafyrirtækin. Þegar fyrirtækin hafa aftur á móti fengið fullt samþykki fyrir bóluefninu, er hægt að lögsækja þau, NEMA að opinberlega hafi verið mælt með því fyrir börn. Ástæðan er sú að öll bóluefni sem opinberlega er mælt með fyrir börn, fá þessa lagalegu vernd, jafnvel þótt aðeins fullorðnir einstaklingar fái bóluefnið.

Þess vegna verða fyrirtækin að bólusetja börnin. Lyfjafyrirtækin vita að lyfin muni skaða fjölda barna, en þetta þurfa þau að gera til að fá vernd gegn skaðabótaábyrgð og lögsóknum, segir lögmaður samtakanna í áðurnefndum þætti.