Bret Michaels, söngvari í hljómsveitinni Poison, var fluttur á sjúkrahús á fimmtudagskvöld í Tennessee í Bandaríkjunum, og neyddist hljómsveitin til að hætta við tónleika sína á Nissan leikvanginum í Nashville.

Samkvæmt miðlinum Nashville Tennessean komu hljómsveitarfélagar Michaels inn á sviðið til að tilkynna áhorfendum fréttirnar fyrir áætlaða tónleika.

Í Instagram færslu sagði Michaels að hann hafi orðið fyrir „ófyrirséðum fylgikvilla af lyfjum“ sem leiddi til sjúkrahúsvistar hans. Hann gaf engar frekari upplýsingar um ástand sitt, annað en að segja að hann vinni að því að komast aftur til fullrar heilsu mjög fljótlega.