Lára Hanna Einarsdóttir fyrrverandi blaðamaður og stjórnarmaður RÚV tilgreinir nokkur atriði um stjórnarhætti Ron DeSantis, ríkisstjóra Flórída, og segir þau vera dæmi um fasískar ákvarðanir ríkisstjórans sem talinn er líklegur frambjóðandi í næstu forsetakosningum í Bandaríkjunum. Fréttin fer hér yfir fullyrðingar Láru Hönnu og skoðar málið nánar sbr. svör.

„Hann bannaði umræðu um kynþætti og kynhneigð í skólum“

Flórída setti nýlega lög sem banna opinberlega alla kennslu um kynhneigð, kynjahugmyndafræði og málefni transfólks meðal grunnskólabarna á aldrinum 5 til 8 ára. Eftir þann aldur verður námsefnið að vera í samræmi og við hæfi aldurs barnanna. Eins kynnti DeSantis að í upphafi skólaárs verði foreldrum kynnt sú heilbrigðisþjónusta sem skólinn býður upp á og þeim gefið tækifæri á að afþakka þjónustuna. Foreldrum verður einnig kynnt með góðum fyrirvara ef börn þeirra eru beðin að taka þátt í könnunum í skólum varðandi heilbrigðismál, og þeim gefið tækifæri á að hafna þátttöku barna sinna.

Er það fasismi að halda þessum málaflokki frá ungum börnum eða telur Lára Hanna það viðeigandi að vera með námsefni og kennslu um kynhneigð og málefni transfólks fyrir 5-8 ára börn?

„Hann bannaði bækur“

Flórída setti lög þar sem foreldrum skólabarna er leyft að hafa skoðanir á þvi hvaða bækur börnin þeirra lesa í skólum og hverjar ekki.  Bækurnar sem voru bannaðar voru stærðfræðibækur með texta og aðrar bækur með myndum sem sýndu svart fólk aðallega í íþróttum en hvítt fólk í viðburðum sem ekki tengdust íþróttum. Bækur þar sem  „loftslagskrísan“ var sett fram sem „vísindaleg staðreynd“ voru teknar úr umferð.  Stærðfræðibækur með æfingadæmum sem tengdust kappræðum milli Al Gore og Rush Limbaugh, þar sem útgefandinn var fylgjandi rökum Al Gore út frá spurningunum í æfingunum, voru teknar úr umferð, svo nokkur dæmi séu tekin.

DeSantis hefur sagt að skólar séu til þess að mennta börnin en ekki til að innræta þau eða heilaþvo.

„Hann bannaði sóttvarnargrímur í skólum“

Þetta er rangt, hann bannaði grímuskyldu í skólum, tvennt ólíkt. Er það ekki frekar fasismi að skylda börn til að bera gagnslausar grímur (fyrir veirusmit) sem geta skaðað heilsu þeirra og þroska? Er Lára Hanna fylgjandi grímuskyldu barna í skólum?

„Hann bannaði transkonum að keppa í kvennaíþróttum“

Það eru fleiri en Flórída sem hafa bannað transkonum (með karlhormóna og karlmannslíkama) að taka þátt í kvennaíþróttum, þar á meðal alþjóða sundsambandið og alþjóða ruðningssambandið? Er það fasismi? Myndi Lára Hanna vilja keppa í íþróttum á móti transkonum sem hafa líkamlega meðfætt forskot á þær konur sem fæðast í kvenmannslíkama?

„Hann bannaði bólusetningarvottorð“

Covid bólusetningapassar brjóta á mannréttindum og frelsi fólksins og þvingar það til að fara í sprautur sem það ekki vill eða getur ekki farið í af einhverjum ástæðum. Passarnir mismuna fólki í íþróttum, atvinnumálum, skólum o.fl. Ósprautuðu fólki var bannað að stunda vinnu, o.fl. samkvæmt tilskipun Biden-stjórnarinnar. Er það fasismi að standa vörð um frelsi og val fólks í heilbrigðis-og atvinnumálum?

Þess má geta að öllum fötluðum var leyft að taka þátt í Ólympíuleikum fatlaðra í Flórída fyrir skömmu, einmitt vegna þess að bólusetningapassar voru bannaðir í ríkinu. Styður Lára Hanna mismunum gegn fötluðum í íþróttum eða bara almenna mismunum gagnvart fólki eftir því hvaða sprautur það vill fá og hvað þá sprautur sem hafa sýnt fram á algjört gagnsleysi hvað ónæmi varðar? Er hugtakinu fasisti hér ekki algjörlega snúið á hvolf? Er fasismi ekki alræðistefna sem byggir á andstöðu við lýðræði og einstaklingsfrelsi?

„Hann leyfir að bílar keyri inn í mótmælendahópa“

Þarna fer Lára Hanna frjálslega með sannleikann, og fullyrðir að DeSantis leyfi það að keyra á mótmælendur. Þetta er rangt, ríkistjórinn gaf öllu heldur lögreglu víðtækari heimildir til að bregðast við ofbeldisfullum mótmælendum, en hvergi í lögum í Flórída er heimilt að keyra á fólk.

„Hann kom á fót „kosningalögreglu“ til að fylgjast með kjósendum“

Þarna er Lára augljóslega að vísa í kosningalögreglu sem var sett á fót til að fylgjast með kosningasvindli með það að leiðarljósi að koma í veg fyrir svindl. Kosningar þar sem svindl viðgengst flokkast frekar sem fasismi enda er þers háttar framkvæmd ólýðræðisleg í það minnsta.

„Hann leyfði byssur í kirkjum nærri skólum“

Samkvæmt stjórnarskrá Bandaríkjanna er Bandaríkjamönnum heimilt að eiga og bera byssur, þetta á ekki við Flórída sérstaklega og er Flórída ekki það ríki sem er með slökustu reglurnar um byssunotkun.

„Hann leyfir einkaskóla á kostnað skattgreiðenda“

Þarna virðist Lára Hanna flokka sama fyrirkomulag og tíðkast hér á landi sem fasisma. Sem dæmi má nefna Verslunarskóla Íslands, sem er með þjónustusamning við ríkið og fær framlög úr ríkissjóði, frá skattgreiðendum. Í Flórída var hugsunin sú að aðstoða fleiri foreldra við að greiða skólagjöld í einkreiknum skólum, m.a. foreldra nemenda sem eiga við fötlun að stríða.

„Hann refsar fyrirtækjum fyrir neikvæða skoðun á ákvörðunum hans“

Þarna á Lára Hanna líklegast við sérstök skatta- og sjálfsstjórnarréttindi Disney World í Flórída sem voru afnumin eftir 55 ár. En DeSantis taldi þá skattaívilnun ólýðræðislega í eðli sínu.

„Hann hefur sett mjög hamlandi kosningareglur“

DeSantis kom á fót nýjum kosningareglum sem tryggja betur gagnsæi og öryggi í lýðræðislegum kosningum. Þýtt af vef ráðuneytisins:

Í dag skrifaði ríkisstjórinn Ron DeSantis undir frumvarp, til að tryggja að Flórída haldi áfram að vera með öruggar og nákvæmar kosningar. Þessi löggjöf mun styrkja kosningaöryggisráðstafanir með því að krefjast þess að kjörskrár séu endurskoðaðar og uppfærðar árlega, efldar kröfur um skilríki, stofnun kosningaglæpa og öryggismála til að rannsaka kosningalagabrot og þyngja refsingar fyrir brot á kosningalögum. Til að lesa meira um frumvarpið sjá hér.

Er það fasismi að tryggja að kosningar fari vel fram og komið sé í veg fyrir kosningasvindl?

„Hann hefur takmarkað ráðningartíma „of frjálslyndra“ háskólaprófessora“

DeSantis setti lög sem koma í veg fyrir æviráðningar á meðal háskólaprófessora, því hann taldi það ólýðræðislegt og geta valdið því að háskólaprófessorar misnoti aðstöðu sína með því að lauma inn svokölluðum "woke" áróðri sem hann kallar "hidden agenda" sem er í raun fasískt í eðli sínu. Þetta hefur ekkert með stjórnmálaskoðanir eða „of frjálslynda“ háskólaprófessora að gera.

Stóra spurningin sem situr eftir er:

Veit Lára Hanna hvað fasismi er?