Eftir Pál Steingrímsson:
„Opinberum stofnunum er óhægt að bregðast við ásökunum, einkum þeim sem byggðar eru á rökleysum, rangfærslum og Trumpisma í meðferð staðreynda.”
Þetta veit fyrrverandi ríkisskattstjóri best enda höfundur þessara orða. Engu að síður ákveður hann að stíga fram á ritvöllinn með fullyrðingar sem standast enga skoðun en eru til þess fallnar að kasta rýrð á ákveðið fyrirtæki sem starfsmönnum Heimildarinnar er hugleikið.
Fæstir ættu að þekkja betur til starfshátta skattsins en fyrrum ríkisskattstjóri. Engu að síður fullyrðir fyrrum ríkisskattstjórinn, Indriði H. Þorláksson, ranglega að rannsókn skattrannsóknarstjóra hafi sýnt fram á að lögbrot hafi verið framin. Segir Indriði að öðruvísi hefði málið aldrei verið áframsent héraðssaksóknara.
Þetta er í besta falli óskhyggja en í versta falli sett fram vísvitandi. „Þannig var ekki um að ræða framvísun máls að lokinni fullnaðarrannsókn skattrannsóknarstjóra þar sem atvik þess hefðu verið upplýst og rakin til enda […]. Er því ekki fært að leggja þá rannsókn sem fyrir lá við greinda framvísun til héraðssaksóknara að jöfnu við þær rannsóknir skattrannsóknarstjóra sem um ræddi við framvísun mála til lögreglurannsókna í þeirri skipan sem við lýði var fyrir setningu laga nr. 29/2021.” Þetta eru skjalfest orð skattrannsóknarstjóra um eigin rannsókn í þessu tiltekna málinu. Rangari geta fullyrðingar Indriða vart verið.
En ríkisskattstjórinn fyrrverandi lætur ekki staðar numið þarna. Ó nei. Hann veit til dæmis vel að það er ekki svo í öllum löndum í kringum okkur að aðilar séu látnir borga skatta af skuldum sem eru afskrifaðar eins og var gert í tilfelli Samherja. Er það uppistaða þeirrar sáttar sem gerð var að frumkvæði skattyfirvalda. Þá verður að teljast að endurálagning vegna handvalinna sjómanna erlends fyrirtækis sem er í eigu þriggja Þjóðverja, meðan yfir 90% sjómannanna voru látnir eiga sig, sé á afar hæpnum grunni.
Indriði veit líka sem fyrrverandi ríkisskattstjóri að embættið leggur ekki fram slíkt boð nema vera viss um að komast ekki lengra með málið.
Embætti skattrannsóknarstjóra skortir ekki fjármagn enda meðal annars verið handhafi hluta af sérstakri fjárveitingu til þess eins að rannsaka Samherja til viðbótar við hefðbundna fjárveitingu. Indriði heldur áfram og reynir að slá ryki í augu fólks með því að tala um 900 milljónir og ber saman við 234 milljón króna sekt sem félag Trump var dæmt til að greiða í Bandaríkjunum.
Tölum frekar um staðreyndir:
- sektin sem Samherja var boðið og samþykkti að greiða nam 15 milljónum króna. Það er eins og nýr Land Cruiser. Það er 15x lægri fjárhæð en Trump var dæmdur til að greiða.
- Viðbótarskattar sem Samherji hf. greiðir vegna 7 ára tímabils eru 60 milljónir. Það nemur 0.6% af því sem félagið greiddi á því tímabili.
- Annað félag í eigu samstæðunnar greiðir 153 milljónir í viðbótarskatta vegna tímabilsins. Hækkar það skattgreiðslur félagsins á tímabilinu um 6%. Uppistaða þessarar fjárhæðar er áðurnefnd skuld sem var afskrifuð.
- Annað sem Samherji mun greiða eru vextir og dráttarvextir. Ekki viðbótarskattar.
- Það liggur fyrir að búið er að fella niður rannsókn Héraðssaksóknara á skattamálum Samherja. Það var gert samhliða því að Skattrannsóknarstjóri bauð fram sáttina. Ástæðan var að það var ekkert refsivert.
- Fyrrum ríkisskattstjórinn gerir að því skóna að sáttin sé til að fela eitthvað. Það sé verið að svipta almenning aðgengi að bókhaldi Samherja. Þetta er álíka gáfulegt og viðhorf fyrrum seðlabankastjóra sem taldi að EF lögin hefðu verið eins og hann vildi, þá taldi hann sig geta sakað Samherja um brot. Vitleysan ríður ekki við einteyming.
Það er ekki heil brú í málflutningi fyrrum ríkisskattstjóra um 900 milljónir í skatta og 3 milljarða skattaundanskot. Og það versta er að hann veit betur. Hann skrifar þetta gegn betri vitund. Hvað gengur manninum til? Ef hann hafði ekki gert það áður þá er hann fullkomlega búinn að gengisfella sjálfan sig með þessum skrifum. Því það má benda fyrrverandi skattstjóra á að fyrirtækið borgaði 3 milljarða í skatt af sölu skipa hér fyrir nokkrum árum sem það hefði getað komist hjá að greiða á mjög svo einfaldan hátt. Forsvarsmenn Samherja kusu hins vegar að gera það ekki og sýnir það best að fyrirtækið og eigendur þess er ekki skattafælið þó sumir reyni að halda slíku fram.
Síðan bítur Indriði höfuðið af skömminni þegar hann gerir lítið úr blaðamönnum Morgunblaðsins til að upphefja sakborninga og samstarfsmenn á Heimildinni. Svona gera aðeins þeir sem hafa vondan málstað að verja. Og það gera Indriði og félagar hans á Heimildinni.
Höfundur er brotaþoli í máli þar sem NOKKRIR starfsmenn á Heimildini eru sakborningar.
Greinin birtist einnig á facebook síðu Páls.