Frétt mbl.is:

Nýjasti gestur bræðranna Gunnars og Davíðs Wiium í hlaðvarpsþættinum Þvottahúsið er engin önnur en Guðrún Bergmann, en hún hefur í rúm 30 ár verið verið ötull talsmaður þess að velja náttúrulegar leiðir til betri heilsu og bættra lífsgæða. Hún hefur haldið ótal námskeið og verið einkum afkastamikill rithöfundur á sviði heilsu, sálar og líkama. Guðrún, sem einnig gæti skilgreinst sem einskonar aktivisti, segist vera manneskja mikillar réttlætiskenndar í bland við djúpt innsæi sem hún hefur öðlast í gegnum sína andlegu vinnu í öll þessi ár.

„Innri réttlætiskennd og innri sannfæring og ég er eins og ég er, fólk segir, af hverju getur þú ekki bara hætt og gert svona eða hinsegin? En þetta er ég, ég þarf að ýta við fólki og vara það við,“ segir Guðrún og bætir við:

„Þetta er bara mín innri sannfæring, að þetta væru efni sem ég þyrfti að vara við og að þetta væri ekki eins og það liti út við fyrstu sín.“ 

Í þessari réttlætiskennd segist hún finna sig knúna að berjast á móti spillingu og því sem hún kallar glæpi gegn mannkyni. Þessu tengt fengu bræðurnir Guðrúnu til sín til að ræða málefni sem snúa að Covid19, sóttvarnaraðgerðum ríkja og þeirri bólusetningaherferð sem er í gangi allsstaðar í heiminum um þessar mundir í síendurtekningu.

Guðrún hefur verið áberandi síðustu tvö árin í umræðunni um veiruna og mögulegar aðgerðir gegn henni. Hún hefur tjáð sig opinskátt um þetta ferli á vægast sagt samsæriskenndan hátt meðal annars með greinaskrifum. Meðal annars hefur hún deilt skoðunum sínum um uppruna veirunnar sem hún vill meina að sé tvímælalaust manngerð og í raun efnavopn en ekki bara eitthvað smitslys úr leðurblöku yfir í mann. Hún hefur einnig verið mjög gagnrýnin á bóluefnin sem hún reyndar talar um sem tilraunalyf, með góðum rökstuðningi sér til handa hvað það varðar.

Það er líka athyglisvert að veiran kemur upp í Whuan og svo kemur hún upp í Ítalíu og svo í Seattle í Bandaríkjunum. Halló! Hvernig flaug hún á milli, hver dreifði henni? Yfirleitt er það faraldsfræðilegt eftir landi sem smitast yfir í næsta land," segir Guðrún í mikilli efahyggju um það sem okkur annars er sagt.

,,Myndir af veirunni eru rosa flottar, rauðar, bláar, grænar og allavega litaðar en þetta eru bara tölvumyndir segir Guðrún sem líka segir að veiran sem slík hafi aldrei verið einangruð eða séð.“ 

Varðandi bóluefnin talar hún um þá gríðarlegu hættu sem hún telur að fylgi þeim og í því samhengi nefnir hún allar þær aukaverkanir eða verkanir, sem vitað er að þau geta valdið og hafa leitt til viðvarandi skaða og í mörgum tilvikum til dauða.

Einnig talar hún að þegar mRNA bóluefnum er sprautað í fólk þá rjúfi það einn hlekk í DNA-inu og geri umbreytingu á því, sem leiði til erfðabreytingar. Hún vill meina að hlekkurinn sem sé rofinn hafi með umburðarlyndi og samkennd að gera sem svo gerir það að verkum að aðskilnaðarstefnan er gerð auðveldari sem og beiting valds löggæslu, hvað varðar að kveða niður allt sem geti túlkast mótmæli gegn meintum mannréttindabrotum og ofbeldi ríkis gegn sínu eigin fólki.

Nýjasta grein Guðrúnar um Covid19 ber heitið ,,6 áfangar endurræsingarinnar miklu.“ Gunnar las greinina og segist í kjölfarið hafa upplifað mikinn ótta í garð framtíðarinnar sem og reiði gegn því sem langflestir túlka sem einlæga tilraun til að ná stjórn á heimsfaraldri.

„Minn skilningur er að með PCR sé verið að safna DNA úr okkur,“ segir Guðrún. Gunnar spyr hana í hvaða tilgangi það ætti að vera og hún svarar: ,,Framtíðarheimurinn byggir upp á því að endurræsingin mikla eða New World Order vill búa til foreldralaust samfélag og bara framleiða börn, bara í kössum.“

Greinin lýsir því í smáatriðum á vægast sagt reyfarakenndan hátt hvernig covid fárið, sem og allur þessi bóluefnaferill sem við stöndum í, sé ekkert nema hluti af plani, enduræsingu sem felur í sér að öðlast betri stjórn og yfirsýn yfir almenning. Einnig að ferlið feli í sér að fækka mannfólki á jörðinni og nefnir hún í því samhengi, fækkun úr rúmum 7 milljörðum niður í aðeins um hálfan milljarð jarðarbúa, og þá sem viss niðurskurður í hagræðingarskyni.

„Eins og ég segi, fólk verður að vakna! og það skiptir ekki máli hvort þú hafir fengið sprautu í upphandlegginn eða ekki. Það er verið að ljúga að okkur og það er verið að stýra okkur inn í svona framtíðar útópíu einhverja örfárra manna, það er talað um að 3000 manns standi á bakvið hinu miklu endurræsingu,“ segir Guðrún og heldur svo áfram.

„Til að gera okkur að enn meiri þrælum, hefta ferðafrelsi, ég meina þú kemur kannski til með að þurfa fá leyfi til að skreppa upp á Skaga í framtíðinni.“

Guðrún talar um það í lok viðtalsins, hvernig við sem manneskjur getum snúið við þessu ferli sem snýr að aðskilnaðarstefnu, stjórn og stríði.

„Það er að verða alger umbylting á jörðinni, sem verður yfirleitt á 12 þúsund ára fresti. Við getum undirbúið okkur undir hana með því að halda innri ró og jafnvægi, til dæmis með hugleiðslu og með því að hækka tíðni okkar upp í kærleika, í stað þess að lifa í ótta og reiði, sem er ráðandi tilfinning þessa dagana og á mjög lágri tíðni."

Burt séð frá því hvort kenningar Guðrúnar halda vatni eða ekki þá er þetta ótrúlega áhugaverður og á margan hátt upplýsandi þáttur sem og mikilvægur í umræðunni um frelsi mannsins sem og þjáningar.