Lyfjastofnun hefur sent frá sér uppfærða sundurliðun á tilkynntum alvarlegum aukaverkunum vegna Covid bólusetninga. Grunaðar alvarlegar aukaverkanir eru nú 268 en alls eru tilkynningar um aukaverkanir 5982. Tilkynningum hefur fjölgað um 41 frá  6. janúar sl. þar af eru 7 alvarlegar.

Fram kemur í frétt Lyfjastofnunar að 171 tilkynning varði sjúkrahúsinnlögn, þar af 38 lífshættuleg tilfelli.

Þá hafa 35 tilkynningar borist stofnuninni vegna gruns um andláts í kjölfar Covid bólusetninga.

Fram kemur í Fréttablaðinu í dag að fjórar alvarlegar tilkynningar hafi borist vegna 12-15 ára barna. Ætla má að hluti þeirra tilkynninga sem nýlega hafa bæst við varði aldurshópinn 5-11 ára þar sem það er sá hópur sem aðallega hefur verið bólusettur síðustu daga, eða frá 5. janúar sl. Beðið er svars frá Lyfjastofnun um það hversu margar tilkynningar hafa borist fyrir þann aldurshóp.

Spyrja mætti hvort þessar sjúkrahúsinnlagnir eigi þátt í auknu álagi spítalans. Og af þeim tæplega 6000 tilkynntum aukaverkunum, hversu margir hafi þurft að leita á bráðamóttöku eða til heilsugæslunnar (ath. ekki er gert ráð fyrir að fólk tilkynni vægar aukaveranir eins og hita, beinverki og höfuðverk til Lyfjastofnunar).

Hvað er alvarleg aukaverkun samkvæmt Lyfjastofnun?

,,Alvarleg aukaverkun er aukaverkun eða óæskileg áhrif lyfs sem leiðir til dauða, lífshættulegs ástands, sjúkrahúsvistar eða lengingar á sjúkrahúsvist, veldur fötlun eða fæðingargalla hjá mönnum og jafnframt aukaverkun eða óæskileg áhrif lyfs sem leiðir til dauða eða veldur ólæknandi eða langvarandi sjúkdómseinkennum hjá dýrum.“